1 Tikhronike 10 - Siswati 1996 Bible

Kutibulala kwaSawula

¹ EmaFilisti alwa nema-Israyeli; ema-Israyeli abaleka, labanyenti basala bafile eNtsabeni iGilbowa.

² EmaFilisti abahlala emsileni boSawula nemadvodzana akhe. EmaFilisti abulala emadvodzana aSawula: boJonathani, na-Abinadabi, naMalkhi Shuwa.

³ Imphi yashuba ngakuSawula, lababenemba ngebutjoki bamkhandza, bamhlaba ngemicibisholo.

⁴ Sawula wakhuluma neludzibi lwakhe, watsi: “Khipha inkemba yakho ungicedzele, kungaze kufike labantfu labangasoki bangicedzele, ngihlazeke.” Kodvwa loludzibi lwakhe lwalwesaba, lungeke lukwente loko; ngako Sawula watsatsa yakhe inkemba watiwisela kuyo, atibulala.

⁵ Loludzibi lwatsi kube lubone kutsi Sawula sewufile, nalo lwawela enkembeni yalo, lwafa naye.

⁶ Sawula nemadvodzana akhe omatsatfu, ngisho nayo yonkhe indlu yakhe, bafela ndzawonye.

⁷ Onkhe ema-Israyeli labengasesigodzini atsi kube abone kutsi imphi seyibalekile nekutsi Sawula nemadvodzana akhe sebafile, esuka abaleka, ashiya emadolobha awo. EmaFilisti efika ahlala kuwo lawo madolobha.

⁸ Kwatsi ngakusasa emaFilisti nasatewuhlubula letidvumbu talabafile, akhandza Sawula nemadvodzana akhe, bafele eNtsabeni iGilbowa.

⁹ Amhlubula ajuba inhloko yakhe ayitsatsa kanye netikhali takhe, atfumela tigijimi kulo lonkhe lemaFilisti kumemetela lendzaba endlini yabonkulunkulu bawo nakubantfu bakubo.

¹⁰ Afaka tikhali takhe ethempelini labonkulunkulu bawo, aphanyeka inhloko yakhe ethempelini laDagoni.

¹¹ Batsi kube bonkhe bantfu baseJabeshi Gileyadi beve ngako konkhe lokwase kwentiwe ngemaFilisti kuSawula,

¹² tonkhe tihlabani takhona tashuca tayakutsatsa letidvumbu taboSawula kanye nemadvodzana akhe batimikisa eJabeshi. Tase tingcwaba ematsambo abo ngaphansi kwesihlahla lesikhulu saseJabeshi, tazila emalanga lasikhombisa.

¹³ Sawula wafa, ngobe abengaketsembeki kuSimakadze; akazange aligcine livi laSimakadze, wadzimate wayawufuna indlela nasesangomeni imbala,

¹⁴ wangete wayibuta indlela kuSimakadze. Ngaleso sizatfu Simakadze wamnikela ekufeni, bukhosi wabunika Davide, umsa waJese.