1 Samuweli 31 - Siswati 1996 Bible

Kutibulala kwaSawula

¹ EmaFilisti alwa nema-Israyeli; ema-Israyeli abaleka, labanyenti basala bafile entsabeni iGilbowa.

² EmaFilisti abahlala emsileni boSawula nemadvodzana akhe. EmaFilisti abulala emadvodzana aSawula: boJonathani, na-Abinadabi, naMalkhi Shuwa.

³ Imphi yashuba ngakuSawula, labadubula ngebutjoki bamkhandza, bamhlaba kamatima ngemicibisholo.

⁴ Sawula wakhuluma neludzibi lwakhe, watsi: “Khipha inkemba yakho ungicedzele, kungaze kufike labantfu labangasoki bangicedzele, ngihlazeke.” Kodvwa loludzibi lwakhe lwalwesaba, lungeke lukwente loko; ngako Sawula watsatsa inkemba yakhe, watiwisela kuyo, atibulala.

⁵ Loludzibi lwakhe lwatsi kube lubone kutsi Sawula sewufile, nalo lwawela enkembeni yalo, lwafa naye.

⁶ Sawula nemadvodzana akhe omatsatfu, kanye neludzibi lwakhe, nawo onkhe emabutfo akhe bafela ndzawonye ngalanga linye.

⁷ Ema-Israyeli labengasesigodzini nalowo bekangesheya kweJordane, atsi kube abone kutsi imphi yema-Israyeli seyibalekile, nekutsi Sawula nemadvodzana akhe sebafile, esuka abaleka, ashiya emadolobha awo. EmaFilisti efika ahlala kuwo lawo madolobha.

⁸ Kwatsi ngakusasa emaFilisti nasatewuhlubula letidvumbu talabafile, akhandza Sawula nemadvodzana akhe omatsatfu, bafele entsabeni iGilbowa.

⁹ Ajuba inhloko yakhe, atsatsa netikhali takhe, atfumela tigijimi kulo lonkhe lemaFilisti kumemetela lendzaba endlini yabonkulunkulu bawo nakubantfu bakubo.

¹⁰ Afaka tikhali takhe ethempelini la-Ashtarothe, abetsela sidvumbu sakhe elubondzeni lwaseBhethi Shani.

¹¹ Batsi kube bantfu baseJabeshi Gileyadi beve ngalesento semaFilisti lasenta kuSawula,

¹² tonkhe tihlabani takhona tashuca busuku bonkhe tacondza eBhethi Shani. Tafike tetfula tidvumbu taboSawula nemadvodzana akhe elubondzeni lweBhethi Shani, tancandzeka nato tabuyela eJabeshi, lapho tafike tatishisela khona ngemlilo.

¹³ Tatsatsa ematsambo abo tayakuwangcwaba ngaphansi kwesihlahla selitamariske, eJabeshi, tazila emalanga lasikhombisa.