1 Samuweli 30 - Siswati 1996 Bible

Kubhujiswa kwema-Amaleki nguDavide

¹ Davide nelibutfo lakhe befika eSikilagi ngelilanga lesitsatfu. Ema-Amaleki abetselekele iNegevu neSikilagi, ayiphanga. Abefike ahlasela iSikilagi aphindze ayishisa ngemlilo,

² atfumba bafati kanye nabo bonkhe lababekuyo, labadzala nalabancane. Abengazange abulala ngisho namunye wabo, kodvwa abatfumba abaleka nabo.

³ Batsi bayefika boDavide nelibutfo lakakhe eSikilagi, balikhandza lidolobha libhubhe lingumlotsa, bafati babo nebantfwababo, emadvodzana nemadvodzakati abo batfunjiwe.

⁴ Ngako Davide nelibutfo lakakhe bakhala, baze baphelelwa ngemandla ekukhala.

⁵ BomkaDavide bobabili babetfunjiwe, bo-Ahinowami waseJezreyeli, na-Abigayili, umfelokati waNabali waseKhameli.

⁶ Davide wadzabuka kakhulu, ngobe lamadvodza abesakhuluma ngekumgcoba ngematje. Ngulowo nalowo abemunyu emoyeni wakhe ngemadvodzana nangemadvodzakati akhe. Kodvwa Davide watfola emandla kuSimakadze Nkulunkulu wakhe.

⁷ Davide wase ukhuluma ku-Abiyatha, umphristi, umsa wa-Ahimeleki, watsi: “Nginikete sidziya sebaphristi.” Abiyatha wamniketa,

⁸ Davide wabuta kuSimakadze watsi: “Ngibacoshe yini labatfumbi? Ngitabakhandza yini?” Simakadze watsi: “Bacoshe, utabakhandza nome kanjani, futsi utawukhona kukubuyisa loku labakutfumbile.”

⁹ Davide nalelibutfo lakakhe, emadvodza langema-600 labehamba nawo, befika emfudlaneni iBhesori, lapho kwafike kwasala khona labanye,

¹⁰ ngobe emadvodza langema-200 abesadzinwe kakhulu, ngako ehluleka kwewela lomfudlana iBhesori. Kodvwa Davide nemadvodza langema-400 bachubeka, bagijima.

¹¹ Bakhandza umGibhithe esigangeni, bamletsa kuDavide, base bamnatsisa emanti, bamupha nekudla.

¹² Bamupha lucetu lwelicebelengwane lemakhiwa lahlutiwe nemacebelengwane lamabili emagelebisi lomisiwe, wadla, wase ubuyelwa ngemandla. Phela kwase kuphele emalanga lamatsatfu nebusuku bawo angakaze afake lutfo emlonyeni wakhe.

¹³ Davide wambuta watsi: “Uwakabani wena, uwekuklezaphi?” Watsi: “NgingumGibhithe, sigcili salomunye um-Amaleki. Lomnumzane wami ungishiye lapha, nangicalwa kugula, kulamalanga lamatsatfu lendlulile.

¹⁴ Besihlasele iningizimu yemaKherethi neyelive lakaJuda, kanye neningizimu yelive lakaKhalebi, sashisa neSikilagi.”

¹⁵ Davide wambuta watsi: “Ungangiyisa yini kubo labatfumbi?” Wamphendvula watsi: “Funga kimi embikwaNkulunkulu kutsi ungeke ungibulale nome unginikele kumnumzane wami, ngitawube sengiyakumikisa kubo.”

¹⁶ Wamikisa Davide, wabakhandza bakhona lapho, basakateke nato tonkhe leto tikhotsa, badla, banatsa, batitika ngemphango, ngenca yebunyenti baloko lababekutfumbile eveni lemaFilisti nelakaJuda.

¹⁷ Davide wabahlasela wabacitsa kusukela nakuhwalalako, kwaze kwaba ngusebusuku bangakusasa solo abaphetse; kwabate ngisho namunye lowaphunyula ngaphandle kwemajaha langema-400 lagibela emakamela awo, zaya.

¹⁸ Davide wabemuka konkhe loko lobekutfunjwe ngema-Amaleki, ngisho nebafati bakhe bobabili imbala.

¹⁹ Kute lokwase kulahlekile, labancane nalabadzala, bafana nemantfombatana, imphango, nako konkhe lokunye lababekutfumbile; Davide wabuya nako konkhe.

²⁰ Watsatsa tonkhe tifuyo nemihlambi, emabutfo akhe akuchuba embili kunaleti letinye tifuyo, atsi: “Lena yimphango yaDavide.”

²¹ Davide waze wefika kulamadvodza langema-200, labesele emfudlaneni iBhesori ngenca yekutsi abesadzinwe kakhulu, aphuma ahlangabeta Davide nalaba lababenaye. Davide kanye nalaba abenabo wababingelela baseta nje.

²² Kodvwa bonkhe lababenetinhlitiyo letimbi nalabanelutfutfuva emkhatsini walaba lababeta naDavide batsi: “Singeke sibacetunele imphango lesiyiphangile, ngobe abakahambi natsi kuyakulwa. Noko nguleyo naleyo ndvodza sitayinika umfati wayo nebantfwabayo, ihambe.”

²³ Davide wabaphendvula watsi: “Cha, phela, bomnaketfu, ningete nakwenta loko ngaloku lesikunikwe nguSimakadze. Usivikele wanikela labatfumbi betfu etandleni tetfu.

²⁴ Ngubani-ke lotawulalela loku lenikushoko? Sabelo sendvodza lesele netimphahla kufanele silingane nesendvodza leyile yayakulwa. Sonkhe sitawucetunelana ngalokufananako.”

²⁵ Davide wenta leso kwaba simiso nelisiko laka-Israyeli kusukela ngalelo langa kuze kube ngulamuhla.

²⁶ Davide watsi kube efike eSikilagi, watfumela incenye yemphango kubaholi bakaJuda lababebangani bakhe, atsi: “Naso sipho senu lesiyimphango lephuma etitseni taSimakadze.”

²⁷ Wasitfumela kulabo lababeseBetheli, naseRamothi yaseningizimu, naseJathiri;

²⁸ nakulabo labase-Aroyeri, naseSifmothi, nase-Eshtemowa,

²⁹ naseRakali; nakulabo labasemadolobheni emaJerameli nemaKheni;

³⁰ nakulabo lababeseHoma, naseBhori Ashani, nase-Athakhi,

³¹ naseHebroni; nakulabo lababekuletinye tindzawo, lapho Davide nebalandzeli bakhe bebasakatekele khona.