1 Samuweli 24 - Siswati 1996 Bible

Kubonelelwa kwemphilo yaSawula nguDavide

¹ Kwatsi Sawula asabuyile ekucosheni emaFilisti, watjelwa kwatsiwa: “Davide sewusehlane lase-Eni Gedi.”

² Sawula wase ukhetsa tingwazi telucobo kulo lonkhe laka-Israyeli, kwaba ngemadvodza lati-3 000; waphuma wayawufuna Davide kanye nebalandzeli bakhe ngase-Emadvwaleni Emagoga.

³ Wahamba wefika etibayeni tetimvu endleleni, wakhandza kunemhume lapho, Sawula wangena wayawutikhulula kuwo. BoDavide nemabutfo akhe bebasekhatsi kulowo mhume babhacile.

⁴ Lamadvodza atsi: “Lamuhla ngilo lilanga Simakadze lakhuluma ngalo ngesikhatsi atsi kuwe: ‘Ngitawunikela sitsa sakho esandleni sakho, kuze wente kuso njengekutsandza kwakho.’ ” Davide wanyonyoba wajuba umphetfo wasembatfo saSawula bangamboni.

⁵ Emvakwaloko Davide wakhatsateka enhlitiyweni yakhe ngenca yekujuba lomphetfo wengubo yaSawula.

⁶ Wakhuluma kulamabutfo akhe, watsi: “Simakadze akakutsandzi kutsi ngente intfo lenje enkhosini yami, lengulogcotjiwe waSimakadze, ngiphakamise sandla sami etikwayo, ngobe ingulogcotjiwe waSimakadze.”

⁷ Ngalawo mavi Davide wekhuta lamabutfo akhe, wawavimbela kutsi ahlasele Sawula. Sawula waphuma kulomhume, wahamba.

⁸ Davide naye wase uyaphuma kulomhume; wamemeta Sawula watsi: “Bayethe, nkhosi yami.” Watsi uyagucuka Sawula, Davide wakhotsama wabhekisa buso bakhe phansi.

⁹ Watsi kuSawula: “Ubalalelelani labantfu labatsi: ‘Davide ufuna kukulimata?’

¹⁰ Lamuhla utibonele ngewakho emehlo kutsi Simakadze abekunikele kanjani esandleni sami lapha emhumeni. Labanye bebatsi angikubulale, kodvwa mine ngakuhawukela, ngatsi: ‘Ngingeke ngiyiphakamisele sandla inkhosi yami, ngobe ingulogcotjiwe waSimakadze.’

¹¹ Buka, babe wami, buka nasi sicephu sengubo yakho sisesandleni sami! Ngijube umphetfo wengubo yakho, kodvwa wena ngangete ngakubulala. Yati kahle-ke nyalo, ucondzisise kutsi mine anginacala lekwenta bubi nelekumelana nawe. Mine angikakoni ngalutfo, kodvwa nguwe longitfungatsela kutsi utengibulala.

¹² Shangatsi Simakadze angakhipha sigwebo emkhatsini wetfu sobabili. Shangatsi Simakadze angangiphindziselela ngabo bonkhe lobubi lobente kimi; kodvwa mine sandla sami singeke sikutsintse.

¹³ Njengobe kusho sisho salabadzala sitsi: ‘Kubenti balokubi kuvela tento letimbi,’ ngako mine ngingeke ngikubeke sandla.

¹⁴ “Inkhosi yema-Israyeli iphumele kulandzelana nemkhondvo wabani? Umkhondvo wenja lefile! Umkhondvo welikululu?

¹⁵ Shangatsi Simakadze angaba ngumehluleli ehlulele emkhatsini wetfu sobabili, angimelele ngekungitfola ngite licala, angikhulule esandleni sakho.”

¹⁶ Kwatsi kube Davide acedze kusho lamavi, Sawula wabuta watsi: “Livi lakho yini lelo, Davide, ndvodzana yami?” Wakhala kakhulu, amemeta.

¹⁷ Sawula wakhuluma kuDavide, watsi: “Wena ulunge kakhulu kwengca mine; ngobe wena ungentele lokuhle, kodvwa mine ngikubonge ngebubi.

¹⁸ Sewukushito manje lokuhle longentele kona, kutsite nome Simakadze asanginikele esandleni sakho, kodvwa wena wangete wangibulala.

¹⁹ Umuntfu nakabamba sitsa sakhe, uyasiyekela yini siphunyule angakasilimati? Shangatsi Simakadze angakuvuza ngalokuhle ngaloku lokwente kimi lamuhla.

²⁰ Manje sengiyati kutsi ngempela wena utawuba yinkhosi, nekutsi umbuso waka-Israyeli utawusimamisa ngesandla sakho.

²¹ Manje funga kimi ngaSimakadze kutsi ungeke usincume situkulwane sami, nelibito lami ngeke ulesule emndenini wababe.”

²² Ngako Davide wafunga kuSawula. Sawula wase uyancandzeka, wabuyela ekhaya lakhe, kodvwa Davide nebalandzeli bakhe bakhuphukela enqabeni.