1 Samuweli 15 - Siswati 1996 Bible

Kulwa kwema-Israyeli nema-Amaleki

¹ Samuweli wakhuluma kuSawula, watsi: “Ngimi lowatfunywa nguSimakadze kuyakukugcoba kutsi ube yinkhosi etikwesive sakhe, ema-Israyeli; ngako lalela nankhu-ke umlayeto lophuma kuSimakadze.

² Naku lokushiwo nguSimakadze longuSomandla, utsi: ‘Ema-Amaleki ngitawajezisa ngenca yaloko lakwenta kuma-Israyeli ngekuwalalela endleleni, nakaphuma eGibhithe.

³ Hamba manje uyewuhlasela ema-Amaleki, ubhubhise yonkhe intfo yawo. Ungawashiyi aphila: bulala emadvodza, nebafati, nebantfwana, netinswane, netinkhomo, netimvu, nemakamela kanye netimbongolo.’ ”

⁴ Sawula wabita onkhe emadvodza, wawabutsela eThelayimu: Kwakungemabutfo aka-Israyeli lati-200 000 labehamba ngetinyawo, labephuma kaJuda abeti-10 000.

⁵ Sawula wahamba waya kulelidolobha lema-Amaleki, wafike wabhaca esihosheni.

⁶ Wakhuluma kumaKheni watsi: “Hambani, nishiye lama-Amaleki, khona ngingetikunibhubhisa kanye nawo; ngobe nine naba nesihe kuma-Israyeli, nakaphuma eGibhithe.” Ngako emaKheni esuka ahamba ashiya lama-Amaleki.

⁷ Sawula wahlasela ema-Amaleki, wawehlula, kusukela eHavila kuye eShuri, lengasemphumalanga neGibhithe.

⁸ Watfumba Agagi, inkhosi yema-Amaleki, isaphila, kwatsi sive sakhe sonkhe wasibhubhisa ngenkemba.

⁹ Kodvwa boSawula nemadvodza akakhe bamyekela Agagi bangete bambulala, bayekela netimvu, netinkhomo, netinkunzi, nemazinyane lokwakukhuluphele; watsatsa konkhe lokwakukuhle. Konkhe lokwakubukeka kukubi nome kubutsakatsaka bakubhubhisa.

Kucitfwa kwaSawula ebukhosini

¹⁰ Livi laSimakadze lefika kuSamuweli, latsi:

¹¹ “Sengiyatisola kutsi Sawula ngamenta inkhosi, ngobe sewungihlubukile, wangete wayigcina imiyalo yami.” Samuweli wakhatsateka kakhulu, wakhala kuSimakadze bonkhe lobo busuku.

¹² Ekuseni ngeluvivi Samuweli wavuka wahamba wayawuhlangabeta Sawula, kodvwa watjelwa kwatsiwa: “Sawula uye eKhameli, lapho efike watimisela litje lesikhumbuto ngaye, wase uyajika ubuyela entansi eGilgali.”

¹³ Watsi kube Samuweli amkhandze, Sawula watsi kuye: “Simakadze akakubusise! Ngiwufezile umyalo waSimakadze.”

¹⁴ Kodvwa Samuweli watsi: “Pho, kwani lokukhala kwetimvu lengikuva ngetindlebe tami? Kwani lokubhonsa kwetinkhomo lengikuvako?”

¹⁵ Sawula wamphendvula watsi: “Emasotja akutsatse kuma-Amaleki eta nako; agcine timvu netinkhomo letikhuluphele kutsi kutekwentiwa ngako umhlatjelo kuSimakadze Nkulunkulu wakho, kodvwa konkhe loku lokunye sikubhubhisile, kwaphela.”

¹⁶ Samuweli wakhuluma kuSawula, watsi: “Bindza! Ngitakutjela kutsi Simakadze utsiteni kimi kulobusuku.” Sawula watsi: “Ngitjele.”

¹⁷ Samuweli watsi: “Nome wena utibona ungulomncane, kodvwa manje uyinhloko yetive tema-Israyeli; Simakadze wakugcoba kutsi ube yinkhosi etikwema-Israyeli.

¹⁸ Simakadze wakutfuma watsi: ‘Hamba ubabhubhise bonkhe labantfu lababi labangema-Amaleki, ubahlasele uze ubatsanyele baphele batsi nya.’

¹⁹ Awukamlaleli ngani Simakadze? Uyitfumbeleni lemphango, wenta lokubi emehlweni aSimakadze?”

²⁰ Sawula watsi: “Ingani ngimlalele Simakadze. Ngiyile kuyakwenta lomsebenti Simakadze labengitfume wona. Ngiwabhubhise onkhe ema-Amaleki, ngase ngita nalo-Agagi, inkhosi yawo.

²¹ Emabutfo atsatse imphango lekutimvu netinkhomo letikhuluphele kakhulu, kutsi kutewuba ngumhlatjelo kuSimakadze Nkulunkulu wakho eGilgali.”

²² Samuweli wakhuluma watsi: “Simakadze uyajatjuliswa yini ngiminikelo yekushiswa nemihlatjelo kunekulalelwa kwelivi laSimakadze? Kulalela kuncono kunemhlatjelo, kucaphela nekunaka kuncono kunemanoni etihhanca.

²³ Ngobe kuhlubuka kufanana nesono sekubhula, nekutigcabha kufanana nekukhonta tithico. Njengobe walile kutsatsa umyalo waSimakadze, naye sewukwalile kutsi uchubeke ube yinkhosi.”

²⁴ Sawula wakhuluma kuSamuweli, watsi: “Ngonile. Ngiwephulile umyalo waSimakadze kanye nemiyalo yakho. Ngesabe bantfu, ngabe sengiyabayekela.

²⁵ Manje sengiyakuncenga kutsi ungitsetselele sono sami, bese uncandzeka nami, khona ngitewukhonta Simakadze.”

²⁶ Kodvwa Samuweli wamphendvula watsi: “Ngingeke ngincandzeke nawe. Ulilahlile livi laSimakadze, naSimakadze sewukucitsile ekutseni ube yinkhosi etikwesive sema-Israyeli!”

²⁷ Samuweli watsi uyagucuka uyahamba, Sawula wambamba ngemphetfo wemjiva wakhe, wadzimate wadzabuka.

²⁸ Samuweli wakhuluma kuye watsi: “Simakadze sewuwuklebhulile umbuso wema-Israyeli kuwe, kusukela lamuhla, sewuwuniketele kulomunye wabomakhelwane bakho; yebo, uwuniketele kuloncono kunawe.

²⁹ Lowo Loyinkhatimulo yema-Israyeli akawacali emanga nome agucule umcondvo wakhe; ngobe akasiye umuntfu kutsi angaze agucule umcondvo wakhe.”

³⁰ Sawula waphendvula watsi: “Ngonile. Kodvwa mane ungihloniphe embikwalabaholi besive sami nasembikwesive sema-Israyeli; ncandzeka nami, khona ngitewukhonta Simakadze Nkulunkulu wakho.”

³¹ Ngako Samuweli wancandzeka naSawula, naye Sawula wakhuleka kuSimakadze.

³² Samuweli watsi: “Letsani lo-Agagi, inkhosi yema-Amaleki.” Agagi weta kuye atsakasile naye asaticabangela atsi: “Impela buhlungu bekufa sebendlulile.”

³³ Kodvwa Samuweli wakhuluma kuye, watsi: “Njengobe inkemba yakho yacotfula bantfwana bebafati, kanjalo nenyoko naye utakwentiwa angabi naye umntfwana emkhatsini webafati.” Samuweli wahlahlela Agagi embikwaSimakadze eGilgali.

³⁴ Samuweli wesuka waya eRama, kodvwa Sawula wenyuka waya kakhe eGibeya yaSawula.

³⁵ Samuweli waze wafa seloku angayi kuyawubona Sawula, kodvwa waphatseka kabi ngaye. Simakadze watisola ngekutsi abente Sawula kutsi abe yinkhosi yema-Israyeli.