1 kubaseThesalonika 5 - Siswati 1996 Bible

Lungelani kubuya kweNkhosi

¹ Mayelana netikhatsi nangematfuba, bazalwane, anidzingi kubhalelwa ngako.

² Ngobe nine ngekwenu nati kahle kamhlophe kutsi lilanga leNkhosi liyawufika, njengelisela lifika ebusuku.

³ Ngesikhatsi bantfu batsi: “Kunekuthula nenhlalakahle,” ngekushesha lokukhulu kubhujiswa kuyawubatuma njengemhelo ufikela umfati nasatawubeleka; futsi kute loyawusindza.

⁴ Kodvwa nine, bazalwane, anikho ebumnyameni, anikafaneli kutunywa ngulelo langa njengekutunywa lisela.

⁵ Nine nonkhe ningemadvodzana ekukhanya nemadvodzana emini; asisibo bebusuku nebebumnyama.

⁶ Ngako-ke, asingalali njengalabanye; kufanele silindze sizitse.

⁷ Phela labo labalalako balala ebusuku, netidzakwa tidzakwa ebusuku.

⁸ Kodvwa tsine lesibemini asizitse, sembatse sivikelo sesifuba lesikukholwa nelutsandvo, sifake nempantitje lelitsemba letfu lensindziso.

⁹ Ngobe Nkulunkulu akasimiselanga kwehlelwa lulaka lwakhe, kodvwa wasimisela kutsi sitfole insindziso ngeNkhosi yetfu Jesu Khristu,

¹⁰ lowasifela kuze kutsi, nome silindza nome silala, nakabuya, siphile kanye naye.

¹¹ Ngako-ke dvudvutanani nakhane, njengobe nenta nje manje.

Imiyalo yekugcina nekuvalelisa

¹² Siyanincenga, bazalwane, kutsi nibahloniphe labo labasebenta emkhatsini wenu, babaholi benu eNkhosini, labaniyala ngemphilo yebuKhristu.

¹³ Bahlonipheni ngelutsandvo lolukhulu ngenca yemsebenti wabo. Hlalisanani ngekuthula.

¹⁴ Bazalwane, siyanikhutsata kutsi necwayise emavila, nibanike sibindzi labaphelelwa ngemandla emoyeni, ninakekele lababutsakatsaka, babeketeleleni bonkhe.

¹⁵ Bonani kutsi kubete lophindzisela kulomunye lokubi ngalokubi, kodvwa ngato tonkhe tikhatsi yetamani kwenta lokuhle kubo bonkhe bantfu.

¹⁶ Tfokotani njalo.

¹⁷ Thandazani ningayekeli.

¹⁸ Bongani kuko konkhe, ngobe loko kuyintsandvo yaNkulunkulu kuKhristu Jesu ngani.

¹⁹ Ningamcishi Moya Longcwele.

²⁰ Ningakwedzeleli kuphrofetha.

²¹ Hlolisisani konkhe, nibambisise lokulungile,

²² nikugege konkhe lokubonakala kukubi.

Siphetfo

²³ Shangatsi Nkulunkulu wekuthula anganingcwelisa ngalokuphelele, agcine umoya wenu, nemphefumulo wenu, nemtimba wenu, kungabi nasici ekubuyeni kweNkhosi yetfu Jesu Khristu.

²⁴ Yena lowo lonibitako uyawukwenta loko, ngobe wetsembekile.

²⁵ Bazalwane, sikhulekeleni.

²⁶ Bingelelani bonkhe bazalwane ngekwanga lokungcwele.

²⁷ Ngiyaniyalisisa egameni leNkhosi kutsi lencwadzi niyifundzele bonkhe bazalwane.

²⁸ Umusa weNkhosi yetfu Jesu Khristu awube nani.