1 kubaseThesalonika 4 - Siswati 1996 Bible

Imphilo lejabulisa Nkulunkulu

¹ Bazalwane betfu, nafundza kitsi kutsi nifanele nitiphatse njani kuze nijabulise Nkulunkulu, njengobe besenivele nenta. Ngako-ke ngephetsa ngekunincenga kutsi nichubeke nikhutsale kakhulu kukwenta loko,

² ngobe niyayati imiyalo lesaninika yona ngeNkhosi Jesu.

³ Kuyintsandvo yaNkulunkulu kungcweliswa kwenu, bubalekeleni bugwadla nebuphingi.

⁴ Ngamunye ngamunye wenu kufanele akwati kutiphatsela yena umtimba wakhe, awuphatse ngebungcwele nangekuhlonipheka;

⁵ hhayi ngekushisekela kwenkhanuko njengemahedeni langamati Nkulunkulu.

⁶ Akubete lowonako aphambe umzalwane wakhe nome ngani, ngobe Nkulunkulu ungumphindziseli kuto tonkhe letintfo, njengobe saniyalisisa nje.

⁷ Nkulunkulu akasibitelanga ebugwadleni nasebuphingini, kepha wasibitela ebungcweleni.

⁸ Ngako-ke lomelana naloku, akamelani namuntfu, kodvwa umelene naNkulunkulu lonipha Moya wakhe Longcwele.

⁹ Macondzana nelutsandvo lwebuzalwane asikho sidzingo sekunibhalela ngaloko, ngobe Nkulunkulu sewunifundzisile kutsi nifanele nitsandzane njani.

¹⁰ Empeleni loko senikubonakalisile kubo bonkhe bazalwane labaseMasedoniya. Kodvwa siyanikhutsata, bazalwane, kutsi chubekani nikwente loko.

¹¹ Timiseleni kuphila ngekuthula, nicaphele lokucondzene nani, nitisebentele nine ngetandla tenu, njengobe sanitjela.

¹² Ngaleyo ndlela niyawuhlonipheka emkhatsini walabangakholwa nguJesu, ningabi timbungulu.

Kubuya kweNkhosi

¹³ Asitsandzi, bazalwane, kutsi ningete nati ngalabo labafile, kuze ningadzabuki njengalabo labate litsemba.

¹⁴ Njengobe sikholwa kutsi Jesu wafa waphindze wavuka, kanjalo nalabo labafe bakuJesu: Nkulunkulu uyawubavusa ekufeni abaletse kanye naJesu.

¹⁵ Ngaloko-ke sinitjela ngelivi leNkhosi kutsi tsine lesiyawube sisaphila ngelilanga lekubuya kweNkhosi singeke sibendvulele labo lesebafile.

¹⁶ Ngobe iNkhosi lucobo lwayo iyakwehla ezulwini ngelivi lenhlokomo, nangeliphimbo lengilosi lenkhulu, nangelicilongo laNkulunkulu. Labo labafe bakholwa nguKhristu bayawuvuka kucala.

¹⁷ Lapho-ke tsine lesiyawube siphila ngaleso sikhatsi sisasele siyawuhlwitfwa senyuke sihlangane kanye nabo emafini sihlangabete iNkhosi emoyeni, kuze sihlale neNkhosi njalonjalo.

¹⁸ Ngako-ke dvudvutanani ngalamavi.