1 kubaseKorinthe 8 - Siswati 1996 Bible

Inchazelo ngekudla lokunikelwe etithicweni

¹ Mayelana nalokuhlatjelwe tithico siyabona sonkhe, njengaloku nisho nitsi: “Sonkhe sinalo lwati.” Kwati kuyakhukhumeta, kantsi lutsandvo luyakha.

² Nangabe umuntfu atsi kukhona lakwatiko, akati njengaloku kufanele ati.

³ Kodvwa nangabe umuntfu atsandza Nkulunkulu, yena-ke watiwa nguye Nkulunkulu.

⁴ Ngako-ke macondzana nekudla kudla lokuhlatjelwe tithico siyati kutsi: “Kute sithico lesiphilako,” nekutsi: “Nkulunkulu munye kuphela, kute lomunye.”

⁵ Ngobe nome kukhona lokutsiwa kubonkulunkulu, nome kusezulwini, nome kusemhlabeni, njengobe bakhona bonkulunkulu labanyenti, nemakhosi lamanyenti,

⁶ noko kitsi kukhona Nkulunkulu munye, Babe, lokuvela kuye konkhe, natsi sikhonela yena. INkhosi yinye, nguJesu Khristu, lokuvela ngaye konkhe, natsi lesiphila ngaye.

⁷ Kepha akusibo bonkhe bantfu labakwatiko loko. Labanye betayele tithico ngisho nalamuhla, bakudla nje shangatsi kuhlatjelwe sithico; ngaloko-ke nembeza wabo lobutsakatsaka uyabalahla.

⁸ Kepha kudla akusisondzeti kuNkulunkulu; ngobe nome singadli asilahlekelwa lutfo, nome sidla asibuyelwa lutfo.

⁹ Nibocaphela kodvwa, funa lelilungelo lenu libe sikhubekiso kulababutsakatsaka.

¹⁰ Ngobe nangabe umuntfu lonanembeza lobutsakatsaka akubona wena lowatiko uhlanganyela edzilini letithico, angete akhutsateka yini kutsi adle lokuhlatjelwe tithico?

¹¹ Ngako-ke lobutsakatsaka uyabhubha ngenca yelwati lwakho, kantsi naye ungumzalwane Khristu lamfela.

¹² Ngobe nanona bazalwane kanje, nilimata nembeza wabo lobutsakatsaka, nona Khristu.

¹³ Ngako-ke nangabe lokudla kwami inyama kumkhubekisa umzalwane wami, angeke ngisayidla inyama nome nini, kuze ngingamkhubekisi umzalwane wami.