1 kubaseKorinthe 7 - Siswati 1996 Bible

Teluleko ngekushada

¹ Mayelana naloko lenangibhalela ngako, ngitsi kuhle kutsi lomdvuna angalali nalomsikati.

² Kodvwa-ke ngenca yebuphingi, akube nguleyo naleyo ndvodza ibe newayo umfati, nalowo mfati abe neyakhe indvodza.

³ Indvodza ayenelise umfati wayo, nemfati ente njalo endvodzeni yakhe.

⁴ Umfati ute emandla etikwemtimba wakhe, kepha yindvodza yakhe lenawo; nendvodza ite emandla etikwemtimba wayo, kepha ngumfati wayo lonawo.

⁵ Ningagodlelani, kuphela kube kwesikhatsi lesitsite nje, kuye ngekuvumelana kwenu kutsi nitfole litfuba lekuthandaza kahle, nibuye nihlangane futsi, kuze Sathane anganilingi ngekwehluleka kwenu kutibamba.

⁶ Ngiyaniyala, anginishayeli umtsetfo.

⁷ Noko bengitsandza kutsi bonkhe bantfu babe njengami. Kepha-ke ngulowo nalowo muntfu unesakhe siphiwo semusa lesehlukile lasiphiwa nguNkulunkulu; lomunye unesaloluhlobo lolu, lomunye unesaloluhlobo lolwa.

⁸ Kodvwa kulabasengakashadi nakubafelokati ngitsi kuhle kubo nabangahlala babe njengami.

⁹ Kodvwa-ke nabangenako kutibamba, kuncono kutsi bashade, ngobe kuhle kutsi umuntfu ashade kunekutsi ashiswe yinkhanuko.

¹⁰ Kepha labashadile ngiyabayala, kungesimi kodvwa kuyiNkhosi, kutsi umfati angehlukani nendvodza yakhe.

¹¹ Kepha nangabe ehlukana nayo, akahlale angendzi, nome-ke abuyisane nendvodza yakhe; nendvodza ingamlahli umfati wayo.

¹² Kepha kulabanye kusho mine, akusho yona iNkhosi, kutsi nangabe umzalwane anemfati longakholwa, yena-ke lomfati avuma kuhlala naye, angabomlahla.

¹³ Nemfati nangabe anendvodza lengakholwa, kodvwa ivuma lendvodza kuhlala naye, naye-ke angaboyilahla.

¹⁴ Ngobe indvodza lengakholwa ingcwelisiwe ngemfati wayo, nemfati longakholwa ungcwelisiwe ngendvodza yakhe lengumKhristu. Kube bekungenjalo ngabe bantfwabenu bangcolile, kepha njengamanje bangcwele.

¹⁵ Kepha nangabe longakholwa afuna kwehlukana naye, akehlukane naye. Umzalwane nome-ke umzalwanekati ukhululekile kulokunjalo. Nkulunkulu unibitele kutsi nibe nekuthula.

¹⁶ Wena mfati, wati ngani kutsi utayisindzisa indvodza yakho? Wena ndvodza, wati ngani kutsi utamsindzisa umkakho?

Manini kuloko lenabitwa ningiko

¹⁷ Kuphela nje kutsi ngulowo nalowo akachubeke njengobe Nkulunkulu amabele, kube ngulowo njengobe Nkulunkulu ambitile. Yebo, ngiyala kanjalo emabandleni onkhe.

¹⁸ Ukhona yini lowabitwa asasokile? Akasiwuba njengalongakasoki. Ukhona yini lowabitwa angakasoki? Akasitihlupha ngekufuna kusoka.

¹⁹ Kusoka akusho lutfo, nekungasoki akusho lutfo. Lokusho lutfo kugcina imiyalo yaNkulunkulu.

²⁰ Akube ngulowo nalowo eme kuloko labitwa anguko:

²¹ Ubitwe usigcili yini? Ungakhatsateki. Nome ungakhululeka, ungamane usebentise lelo tfuba lonalo.

²² Ngobe lowabitwa yiNkhosi asigcili, ungulokhululekile weNkhosi. Ngalokufananako, nalowo lowabitwa akhululekile, usigcili saKhristu.

²³ Nine nitsengwe nguNkulunkulu ngelinani lelikhulu; ningabi tigcili tebantfu!

²⁴ Bazalwane, akube ngulowo ahlale naNkulunkulu kuloko labitwe anguko.

Teluleko ngalabasengakashadi nangebafelokati

²⁵ Macondzana nalabasengakashadi ngite umyalo weNkhosi, kepha ngitanitjela lengikubonako njengemuntfu lowetsembekile ngekuhawukelwa yiNkhosi.

²⁶ Ngicabanga kutsi ngenca yekubandzeteleka lokukhona kuhle umuntfu ahlale anjengaloku anjalo.

²⁷ Uboshelwe yini kumfati? Ungafuni kukhululeka. Ukhululekile yini kumfati? Ungamfuni umfati.

²⁸ Kodvwa-ke nangabe ushada, awoni; nentfombi nayishada, ayoni. Kepha labashadile bayawuhlupheka emhlabeni, ngifisa kuniphephisa kuloko.

²⁹ Bazalwane, ngitsi: Sikhatsi sesinciphile; kusukela nyalo nalabanebafati ababe njengalabate bafati,

³⁰ nalabakhalako babe njengalabangakhali, nalabatfokotako babe njengalabangatfokoti, nalabatsengako babe njengalabangenalutfo,

³¹ nalabasebentisa lelive babe njengalabangalisebentisi, ngobe simo salelive siyendlula.

³² Angifuni kutsi nikhatsateke. Longakashadi ukhutsalela kweNkhosi, kutsi angayitfokotisa ngani iNkhosi.

³³ Kodvwa loshadile ukhatsalela kwelive, kutsi angamtfokotisa ngani umfati wakhe,

³⁴ iminako yakhe yehlukene ekhatsi. Nalongakendzi nome intfombi ikhutsalela kweNkhosi, kuze ibe ngcwele emtimbeni nasemoyeni. Kepha lowendzile ukhutsalela kwemhlaba, kutsi angayijabulisa ngani indvodza yakhe.

³⁵ Loku ngikusho kuze kusitakale nine, hhayi kutsi ngicondze kunibopha ngentsambo kepha kuze nihambe ngalokufanelekile, nibambelele eNkhosini ngalokuphelele.

³⁶ Kepha umuntfu nakabona kutsi angeke akhone kutibamba entfombini lasayetsembisile, nangabe inkhanuko imehlula, ingekho lenye indlela, akente loko lakufunako: abashade; akusiso sono loko.

³⁷ Kepha lomile acinile enhlitiyweni yakhe angacindzetelwa lutfo, angenta lakubonako; nangabe nje sewutimisele enhlitiyweni yakhe kutsi agcine lowo letsembisene naye ayintfombi, wenta kahle.

³⁸ Ngako-ke loshada lowo letsembisene naye wenta kahle; kepha longashadi wenta kahle kakhulu.

³⁹ Ngekwemtsetfo umfati uboshelwe endvodzeni nayisaphila; kepha nangabe indvodza seyifile, sewukhululekile, angendza nome ngukubani, kuye ngekubona kwakhe, kuphela nje kutsi kube ngusentsandvweni yeNkhosi.

⁴⁰ Uyetsaba nakahlala anjalo. Lowo-ke ngumbono wami, futsi-ke ngicabanga kutsi ngihambisana naMoya waNkulunkulu.