1 kubaseKorinthe 4 - Siswati 1996 Bible

Tikhonti taKhristu nebaphatsi betimfihlakalo taNkulunkulu

¹ Kufanele satiwe kutsi sitikhonti taKhristu nebaphatsi betimfihlakalo taNkulunkulu.

² Futsi-ke baphatsi kufuneka kutsi batfolakale betsembekile.

³ Kodvwa-ke mine kimi kuyintfo lencane kutsi ngehlulelwe ngini nome ngekwehlulela kwebantfu, ngobe nami angitehluleli.

⁴ Ngobe angitikhobosi ngalutfo ngekwami, noko-ke akusho kutsi loko kungenta ngemukeleke kuNkulunkulu kutsi ngilungile. Kodvwa yiNkhosi lengehlulelako.

⁵ Ngako-ke ningacali kwehlulela lutfo sikhatsi singakefiki, neNkhosi ingakefiki. Ngiyo leyawuveta ekukhanyeni lokufihlakele ebumnyameni, ivete ebaleni imicabango yetinhlitiyo. Lapho-ke ngulowo nalowo muntfu uyawutfola kubongwa lokuvela kuNkulunkulu.

Kukhuluma kwebantfu baseKhorinte nekuhlupheka kwebaphostoli

⁶ Loku-ke, bazalwane, ngikucondzise kimi naku-Apolosi ngenca yenu. Fundzani kitsi kutsi ningengcisi kulokubhaliwe, ningagungubali ngalomunye umuntfu nidzele lomunye.

⁷ Vele kambe ngubani lokwenta ube ncono kunalabanye? Yini lonayo longazange uyiphiwe? Nangabe-ke waphiwa, utigabatiselani wente shangatsi awuzange uphiwe?

⁸ Senenele! Seninjingile! Senitente emakhosi ngaphandle kwetfu! Maye, ngifisa shangatsi ngabe ningemakhosi sibili, sitewuhlephunelana nani lokubusa!

⁹ Ngiyabona kutsi Nkulunkulu usimisile tsine baphostoli kutsi sibe bekugcina, sifanane nalabagwetjwe intsambo. Ngobe sentiwe saba ngumbukiso kuyo yonkhe indalo, etingilosini, nakubantfu.

¹⁰ Tsine sitilima ngenca yaKhristu, kodvwa nine nihlakaniphile kuKhristu. Tsine sibutsakatsaka ngenca yaKhristu, kepha nine ninemandla. Nine niyadvunyiswa, kepha tsine siyanyembenywa.

¹¹ Kudzimate kube ngulesikhatsi siyalamba, some, sidzikite, simuklutwe, sibe ngimihambima lete emakhaya.

¹² Siyaphishaneka sisebente ngetandla tetfu. Sitsi setfukwa sibe sibusisa; sitsi sitingelelwa kuhlushwa, sibe sicinisela.

¹³ Sitsi sinyembenywa, sibe sikhuluma ngemoya lomuhle. Kuze kube ngulamuhla sentiwa tibi temhlaba, nekungcola kwetintfo tonkhe.

¹⁴ Anginibhaleli loku ngobe ngicondze kunidlisa ngemahloni, kodvwa ngiyaneluleka njengebantfwabami lengibatsandzako.

¹⁵ Nome nine ningaba nebeluleki labati-10 000 kuKhristu, nite boyihlo labanyenti; ngobe mine nganitala kuKhristu Jesu ngeliVangeli.

¹⁶ Ngako-ke ngiyanincenga kutsi nilingise mine.

¹⁷ Ngaloko-ke sengitfumele kini Thimothi, longumntfwanami lengimtsandzako nalowetsembekile eNkhosini. Nguye-ke lotanikhumbuta ngekuhamba kwami lokukuKhristu Jesu, njengobe ngifundzisa etindzaweni tonkhe nasemabandleni onkhe.

¹⁸ Kepha labanye sebayatikhukhumeta, shangatsi angiseyikuta lapho kini.

¹⁹ Kodvwa ngitawufika lapho kini masinyane, iNkhosi nayivuma, ngitetibonela, hhayi emavi alabo labatikhukhumetako, kodvwa emandla abo.

²⁰ Ngobe umbuso waNkulunkulu awuyi ngemagama ekutjelwa, kodvwa uya ngemandla.

²¹ Manje-ke nifunani? Nifuna ngite kini nendvuku, nome ngite nelutsandvo nemoya lomuhle?