1 kubaseKorinthe 3 - Siswati 1996 Bible

Tisebenti taNkulunkulu

¹ Nami-ke, bazalwane, ngangehluleka kukhuluma kini njengakubantfu baMoya; kodvwa ngangikhuluma kini njengakubantfu bemhlaba, tinswane kuKhristu.

² Nganondla ngelubisi. Anginiphanga kudla lokucinile; ngobe nanisengakakulungeli kukudla, ngisho nanyalo nisengakakulungeli.

³ Nine nisebantfu benyama; ngobe nangabe nisenemona nekubangisana, anisibo yini benyama? Anilingisi bantfu bemvelo yini?

⁴ Ngobe nangabe lomunye atsi: “Mine ngiwaPawula,” lomunye atsi: “Mine ngiwa-Apolosi,” anisibo yini bantfu bemvelo?

⁵ Pho, uyini Apolosi? Uyini Pawula? Batisebenti nje taNkulunkulu lenakholwa ngato, letisebenta njengekwaba kweNkhosi kuleso nakuleso sato.

⁶ Mine ngahlanyela nje, Apolosi yena wafike wanisela, kepha nguNkulunkulu lokhulisile.

⁷ Kepha lohlanyelako nome loniselako akasilutfo, kuphela nguNkulunkulu lokhulisako.

⁸ Lohlanyelako ulingana naloniselako, kodvwa ngulowo uyakwemukela umvuzo longangemsebenti wakhe.

⁹ Ngobe tsine sitisebenti nje taNkulunkulu letibambisene naye, nine niyinsimi yakhe. Nine futsi niyindlu yaNkulunkulu.

Kwakha etikwesisekelo lesisisekelo sibili

¹⁰ Ngemusa waNkulunkulu lengiwuphiwe, nanjengachwephesha wetekwakha, ngabeka sisekelo sendlu, lomunye wakha etikwaso. Kodvwa akube ngulowo nalowo acaphelisise kahle kutsi wakhela njani etikwaso.

¹¹ Ngobe kute lomunye longabuye abeke lesinye sisekelo, ngaphandle kwaleso lesibekiwe lesinguJesu Khristu.

¹² Umuntfu angakha etikwalesisekelo ngegolide, nome ngesiliva, nome ngematje ladule kakhulu, nome ngetingodvo, nome ngetjani, nome ngetinhlanga.

¹³ Kepha umsebenti walowo nalowo uyawuvela ebaleni; ngobe lilanga leNkhosi liyakuwuhlakata liwembule ngemlilo. Yebo, kuyawuhlolwa ngemlilo kutsi umsebenti walowo nalowo unjani.

¹⁴ Nangabe umsebenti wemuntfu lawakhe esisekelweni ungashi, uyakwemukela umvuzo.

¹⁵ Nangabe-ke umsebenti wemuntfu usha, uyawube ulahlekelwe, kepha yena lucobo lwakhe uyawusindziswa, noko kuyawuba shangatsi uphunyule emlilweni.

¹⁶ Anati yini kutsi nine nilithempeli laNkulunkulu nekutsi Moya waNkulunkulu uhlala ekhatsi kini?

¹⁷ Nangabe umuntfu abhidlita lithempeli laNkulunkulu, Nkulunkulu, uyakumbhidlita naye. Ngobe lithempeli laNkulunkulu lingcwele, nine-ke ningilo lelithempeli.

¹⁸ Akubete lotiyengako, nangabe umuntfu atsi uhlakaniphile emkhatsini wenu kulesikhatsi, akabe silima, khona atewuba ngulohlakaniphile.

¹⁹ Ngobe kuhlakanipha kwalomhlaba kubulima kuNkulunkulu; futsi kubhaliwe kutsi: “Ubamba labahlakaniphile ebucilini babo,”

²⁰ nekutsi: “INkhosi iyayati imicabango yalabahlakaniphile kutsi ilite.”

²¹ Ngaloko-ke akubete lotigabatisako atibonge yena ngebantfu, ngobe konkhe kwenu.

²² Nome nguPawula, nome ngu-Apolosi, nome nguKhefase, nome live, nome kuphila, nome kufa, nome ngulokukhona, nome ngulokusetawuba khona, konkhe kwenu.

²³ Nine-ke nibaKhristu, Khristu waNkulunkulu.