1 kubaseKorinthe 2 - Siswati 1996 Bible

Inshumayelo ngaKhristu lobetselwe

¹ Nami, bazalwane, ekufikeni kwami, indzaba yaNkulunkulu leyimfihlakalo, angizange ngiyimemetele ngebungcweti nangenhlakanipho.

² Ngobe ngatimisela kutsi angiyikwati lutfo lolunye emkhatsini wenu ngaphandle kwaJesu Khristu, naye ngimati abetselwe esiphambanweni.

³ Ngangihleti nani nginebutsakatsaka nekwesaba nekutfutfumela lokukhulu.

⁴ Kukhuluma kwami nekushumayela kwami akuzange kube ngemavi ekuhlakanipha lokuhunganako, kodvwa kwaba sibonakaliso saMoya nesemandla.

⁵ Ngentela kutsi kukholwa kwenu kungasimi ekuhlakanipheni kwebantfu, kepha kusime emandleni aNkulunkulu.

Kuhlakanipha kwaNkulunkulu kwembulwa ngaMoya

⁶ Kodvwa sikhuluma inhlakanipho kubantfu lasebakhulile eNkhosini. Kepha lenhlakanipho akusiyo yalesikhatsi nome yebabusi lababhubhako balesikhatsi.

⁷ Kodvwa sikhuluma inhlakanipho yaNkulunkulu leyimfihlo lefihlekile, Nkulunkulu layimisa umhlaba ungakasekelwa, kutsi ibe ludvumo lwetfu.

⁸ Ayatiwa ngisho nangumunye webaholi balesikhatsi salamuhla. Ngobe kube bebayati ngabe abayibetselanga iNkhosi yenkhatimulo.

⁹ Kodvwa njengobe kubhaliwe kutsi: “Loko liso lelingazange selikubone, nendlebe lengazange seyikuve, lokungazange kuphume enhlitiyweni yemuntfu, Nkulunkulu wakulungiselela labamtsandzako.”

¹⁰ Nkulunkulu ukwembulile kitsi ngaMoya wakhe; ngobe Moya Longcwele uhlolisisa konkhe, ngisho nalokujulile kwaNkulunkulu.

¹¹ Empeleni kute umuntfu lowati kwalomunye umuntfu, ngaphandle kwemoya wakhe lokuye. Kuyafanana-ke, nekwaNkulunkulu akwatiwa ngumuntfu ngaphandle kwaMoya waNkulunkulu.

¹² Kodvwa tsine asikanikwa wona umoya welive; kepha sinikwe Moya lovela kuNkulunkulu, khona sitekwati lesikuphiwe nguNkulunkulu ngemusa wakhe.

¹³ Lesikhuluma ngako futsi akusiwo emavi lafundziswa bantfu ngekuhlakanipha, kodvwa afundziswa nguMoya, ngobe sichaza emaciniso aMoya ngaMoya kubantfu labanaMoya.

¹⁴ Umuntfu wemvelo akakwemukeli lokukwaMoya, ngobe kubulima kuye, futsi angeke akuve, ngobe kuphenyisiswa ngaMoya.

¹⁵ Kepha umuntfu lonaMoya waNkulunkulu uphenyisisa konkhe, kantsi kute muntfu longamphenyisisa yena.

¹⁶ UmBhalo utsi: “Ngubani lowati umcondvo weNkhosi? Ngubani longayifundzisa?” Kodvwa tsine sinawo umcondvo waKhristu.