1 kubaseKorinthe 16 - Siswati 1996 Bible

Umnikelo wekusita labangcwele

¹ Macondzana neminikelo lebutselwa kusita labangcwele, njengobe ngayala emabandla aseGalathiya, yentani njalo nani.

² Njalo nje ngelilanga lekucala evikini, akube ngulowo nalowo alondvolote loko lokumlingene, kuze kutsi iminikelo ingentiwa sengikhona.

³ Nase ngifikile, labo lenibakhetsile ngitawubatfumela kanye netincwadzi tekubetfula, bamikise letipho tenu telutsandvo eJerusalema.

⁴ Nangabe kufanele nami ngihambe, ngiyawuhamba kanye nabo, batangiphekeletela.

Luhlelo lwekuhamba kwaPawula

⁵ Ngitawufika lapho kini sengendlule eMasedoniya, ngobe ngifuna kwendlula khona kucala.

⁶ Mhlawumbe ngingahle ngihlale lapho kini kudzimate kwendlule lobusika, kumbe ningangisita ekuchubekeni kwami, nome kukuphi la ngiya khona.

⁷ Angeke nginibone kwamanje ngisetakwendlula, ngobe ngifuna kufike ngihlale lapho kini sikhatsi, iNkhosi nayivuma.

⁸ Kepha ngitawuhlala e-Efesu, kudzimate kufike lilanga lePhentekhoste.

⁹ Ngobe litfuba lekusebenta lingivulekele, noko banyenti labemelene nami.

¹⁰ Nakufika Thimothi lapho kini, nibocaphelisisa kutsi nimemukele, ativele asekhaya, ngobe wenta msebenti munye nami, umsebenti weNkhosi.

¹¹ Ngako-ke kubete lomedzelelako, nimelekelele ngekumphekeletela endleleni naseta kimi, ngobe tsine nebazalwane simbhekile.

¹² Macondzana nemzalwane Apolosi ngamcela kakhulu kutsi ete kini kanye nebazalwane, kepha bekungesiyo intsandvo yakhe kutsi ete kwanyalo, noko utawuta angatfola litfuba.

Sicelo sekugcina

¹³ Lindzani nisime ekukholweni, nibe ngemadvodza, nicine.

¹⁴ Konkhe lenikwentako, akwentiwe ngelutsandvo!

¹⁵ Bazalwane, niyati kutsi bakaStefanasi baba bekucala kubase-Akhaya labaphendvuka nekutsi batimisela kukhonta labangcwele.

¹⁶ Ngiyanincenga kutsi nibatfobele labanjalo nabo bonkhe labasebentisana nabo bashiphaneka.

¹⁷ Ngiyatfokota ngekufika kwaStefanasi, naFothunatusi, na-Akhayikhusi, ngobe bayanimelela nome ningekho.

¹⁸ Ngobe bawuhlumelele umoya wami newenu; ngako-ke bahlonipheni labanjalo.

Imikhontiso yekugcina

¹⁹ Emabandla ase-Asiya ayakhonta kini nonkhe. Bo-Akhwila naPhrisila bakhonta kakhulu kini eNkhosini, kanye nelibandla lelikhontela endlini yabo.

²⁰ Bazalwane bonkhe nabo bayakhonta kini. Bingelelanani ngekwangana lokungcwele.

²¹ Nako-ke kukhonta kwami mine Pawula ngesandla sami.

²² Nangabe umuntfu angayitsandzi iNkhosi, akabe ngulocalekisiwe Wota Nkhosi!

²³ Umusa weNkhosi Jesu awube nani.

²⁴ Lutsandvo lwami alube nani nonkhe kuKhristu Jesu.