1 kubaseKorinthe 15 - Siswati 1996 Bible

Kuvuka kwaKhristu ekufeni

¹ Manje-ke, bazalwane, nginikhumbuta liVangeli lenganishumayela lona nalemukela namanje niseme kulo.

² Nisindziswa ngalo, nangabe nisabambelele evini lenganishumayela lona; nakungenjalo kukholwa kwenu kwaba lite.

³ Ngobe nami nganinika loko lokubalulekile lengakwemukela, kutsi Khristu wafa ngenca yetono tetfu, njengaloko isho imiBhalo,

⁴ nekutsi wembelwa, wabuye wavuswa kulabafile ngelilanga lesitsatfu, njengaloku yayivele ishito imiBhalo,

⁵ nekutsi wabonwa nguKhefase, wase ubonwa ngulabali-12.

⁶ Emvakwaloko wabonwa, ngasikhatsi sinye, bazalwane labendlula ema-500, liningi labo lisekhona naloku ngikhuluma nje, kodvwa labanye sebafa.

⁷ Emvakwaloko wabonwa nguJakobe, wase ubonwa baphostoli bonkhe.

⁸ Ekugcineni kwabo bonkhe wadzimate wabonwa nangimi lenginjengalowatalwa kungesiso sikhatsi sakhe.

⁹ Ngobe mine ngingulomncane kubaphostoli, bengingakafaneli nekutsi kutsiwe ngingumphostoli, ngobe ngatingela ngahlupha libandla laNkulunkulu.

¹⁰ Kepha ngemusa waNkulunkulu nginguloku lengingiko, nemusa wakhe kimi awuzange ube lite, kodvwa ngasebenta kakhulu kunabo bonkhe, noko kungesimi, kodvwa kungumusa waNkulunkulu lonami.

¹¹ Ngako-ke nome kungimi nome kungabo, sishumayela kona loko, nani nakholwa kona loko.

Kuvuka kwalabafile ekufeni

¹² Kepha-ke nangabe kushunyayelwa kutsi Khristu uvusiwe kulabafile, basho kanjani laba labanye emkhatsini wenu kutsi kute lapha kuvuka kulabafile?

¹³ Kodvwa-ke nangabe kungekho kuvuka kulabafile, kusho kutsi akavuswanga-ke naye Khristu.

¹⁴ Kepha nangabe Khristu akavuswanga-ke kulabafile, kusho kutsi kushumayela kwetfu kulite, nekukholwa kwenu kulite.

¹⁵ Yebo-ke sitfolakala sibofakazi bemanga ngaNkulunkulu, ngobe sifakaze kutsi Nkulunkulu wavusa Khristu kulabafile langazange amvuse kambe, nangabe kantsi labafile abavuswa.

¹⁶ Ngobe nangabe labafile abavuswa, kusho kutsi naKhristu akavuswanga-ke.

¹⁷ Kepha nangabe Khristu akavuswanga, kusho kutsi kukholwa kwenu akusiti lutfo, nisesetonweni tenu,

¹⁸ nalabo lasebafa bakuKhristu nabo babhubha.

¹⁹ Nangabe singulabetsembela kuKhristu kulokuphila kwala kuphela, sibantfu bekulilelwa kunebantfu bonkhe.

²⁰ Kepha manje Khristu wavuswa kulabafile, waba ngumvuli wendlela kulabo labatawuvuka kulabafile.

²¹ Njengobe kufa kweta ngemuntfu munye, nekuvuka kulabafile nako kute ngemuntfu munye.

²² Njengobe ku-Adamu bonkhe bayafa, kanjalo futsi nakuKhristu bonkhe bayawuvuswa ekufeni.

²³ Kepha ngulowo nalowo uyawuvuka ngesigaba sakhe: Khristu kucala, bese kuba ngulabo lababaKhristu ekubuyeni kwakhe.

²⁴ Emvakwaloko kuyawufika kuphela, mhlazana anikela umbuso kuNkulunkulu uYise, nasacitse yonkhe imibuso, nebukhosi bonkhe, nemandla onkhe.

²⁵ Ngobe Khristu kumele abuse, aze Nkulunkulu ancobe tonkhe titsa takhe atibeke ngephansi kwetinyawo takhe.

²⁶ Sitsa sekugcina lesiyawucitfwa kufa.

²⁷ “Ngobe Nkulunkulu utfobise tonkhe tintfo ngephansi kwetinyawo takhe.” Kepha nangabe umBhalo utsi: “Tintfo tonkhe titfotjisiwe,” kuyakhanya kutsi ungaphandle kwato Nkulunkulu lotitfobisele ngephansi kwakhe.

²⁸ Kodvwa-ke nangabe tonkhe tintfo setitfotjiselwe ngephansi kwakhe, lapho-ke nayo iNdvodzana yemuntfu iyakutitfoba ngephansi kwalowo lowatfobisa tonkhe tintfo ngephansi kwayo, kuze Nkulunkulu abe nguko konkhe kuko konkhe.

²⁹ Kepha bayakwenta njani lababhajatiselwa kulabafile, nangabe kuliciniso kutsi abavuki? Pho, babhajatiselelwani kulabafile?

³⁰ Pho, tsine yini sibesengotini ngetikhatsi tonkhe?

³¹ Bazalwane, ngekubongwa lenginako ngani kuKhristu Jesu iNkhosi yetfu ngiyacinisa kutsi: Ngifa mihla yonkhe le!

³² Nangabe e-Efesu ngalwa nalokutsiwa tilwane, kungisita ngani loko? Nangabe labafile abavuswa: “Kuncono sidle sinatse, ngobe kusasa sitawufa.”

³³ Ningayengeki: “Bangani lababi bonakalisa similo lesihle.”

³⁴ Sangulukani; ningaphindzi none, ngobe labanye abamati Nkulunkulu. Ngikusho loko khona nitewuba nemahloni.

Imitimba yekuvuka kulabafile

³⁵ Lomunye utawutsi: “Labafile bavuswa njani? Beta banemtimba lonjani?”

³⁶ Silima-ndzini, awati yini kutsi lokuhlanyelako wena akukutfoli kuphila kungakafi kucala?

³⁷ Futsi loko lokuhlanyelako, usuke ungahlanyeli lona likhaba, kepha usuke uhlanyela inhlanyelo lengesilo likhaba, nome ngabe yakolo, nome ngabe yalokunye nje-ke.

³⁸ Kepha Nkulunkulu unika inhlanyelo simo sayo ngekutsandza kwakhe, ngulolo nalolo luhlobo lwenhlanyelo lunesimo salo.

³⁹ Inyama ayifanani yonkhe: lenye yebantfu, lenye yetilwane, lenye yetinyoni, lenye yetinhlanti.

⁴⁰ Ikhona-ke nemitimba yasezulwini nemitimba yasemhlabeni, kepha inkhatimulo yemitimba yasezulwini iyodvwa, neyemitimba yasemhlabeni iyodvwa.

⁴¹ Iyodvwa inkhatimulo yelilanga, iyodvwa inkhatimulo yenyanga, iyodvwa nenkhatimulo yetinkhanyeti; yebo, nguleyo nkhanyeti inekukhatimula lokwehlukile kukwalenye.

⁴² Kunjalo-ke kuvuka kulabafile. Kuhlanyelwa kunekubola, kuvuswe kungasenakubola.

⁴³ Umtimba ungcwatjwa unekudzelelwa, uvuswe unenkhatimulo; ungcwatjwa unebutsakatsaka, uvuswe unemandla.

⁴⁴ Ungcwatjwa ungumtimba wenyama, uvuswe ungumtimba wemoya. Nangabe ukhona umtimba wenyama, kusho kutsi-ke ukhona nemtimba wemoya.

⁴⁵ Kanjalo futsi kubhaliwe kutsi: “Umuntfu wekucala Adamu waba ngumuntfu lophilako;” Adamu wekugcina waba nguMoya lonika kuphila.

⁴⁶ Kepha kwekucala akusiko kwemoya kodvwa kwenyama, bese-ke kwesibili kuba kwemoya.

⁴⁷ Umuntfu wekucala wavela emhlabeni alutfuli; umuntfu wesibili wavela ezulwini.

⁴⁸ Njengobe abenjalo umuntfu welutfuli, banjalo nalabo lababelutfuli; nanjengobe anjalo umuntfu wasezulwini, banjalo nalabo lababasezulwini.

⁴⁹ Futsi-ke njengobe sinelufuto lwalona lowelutfuli, kanjalo siyawuba nelufuto lwalona wasezulwini.

⁵⁰ Nginitjela naku, bazalwane bami, kutsi inyama nengati akunawulidla lifa lembuso waNkulunkulu, nekubola akulidli lifa lelingaboli.

⁵¹ Lalelani, nginitjele imfihlakalo: Asite safa sonkhe, noko siyawuguculwa sonkhe

⁵² ngesikhashana, ngekucwabita kweliso, ngelicilongo lekugcina. Ngobe licilongo liyawukhala, labafile bavuswe bangasenakubola, tsine siguculwe.

⁵³ Ngobe loku lokubolako kufanele kutsi kwembatse kungaboli, naloko lokufako kufanele kutsi kwembatse kungafi.

⁵⁴ Nangabe loko lokubolako sekwembetse kungaboli, naloku lokufako sekwembetse kungafi, kutawube sekugcwaliseke livi lelibhaliwe lelitsi: “Kufa kumitwe kuncoba.”

⁵⁵ “Kufa, kuphi kuncoba kwakho? Kufa, luphi ludvonsi lwakho?”

⁵⁶ Ludvonsi lwekufa sono, nemandla esono ngumtsetfo.

⁵⁷ Kodvwa akabongwe Nkulunkulu losinika kuncoba ngeNkhosi yetfu Jesu Khristu.

⁵⁸ Ngako-ke, bazalwane bami labatsandzekako, banini ngulabasimile labangaceki, nikhutsale emsebentini weNkhosi ngaso sonkhe sikhatsi, nati kutsi kusebenta kwenu akusilo lite eNkhosini.