1 kubaseKorinthe 14 - Siswati 1996 Bible

Tiphiwo tetilimi nekuphrofetha

¹ Jongani lutsandvo, kutsi nilangatelele tiphiwo taMoya, kakhulu kuphrofetha.

² Lokhuluma ngetilimi akakhulumi kubantfu, kepha ukhuluma kuNkulunkulu, ngobe kute lomvako, ukhuluma timfihlakalo akuMoya.

³ Kube kani lophrofethako ukhuluma kubantfu kutsi bakheke, bakhutsateke, badvudvuteke.

⁴ Lokhuluma ngetilimi utakha yena, kodvwa lophrofethako wakha libandla.

⁵ Yebo-kona bengingatsandza kutsi nonkhe nikhulume ngetilimi, kepha bengingatsandza kakhulu kutsi niphrofethe. Vele-ke mkhulu lophrofethako kunalowo lokhuluma ngetilimi, ngaphandle kwekutsi atihumushe, khona kutewusitakala libandla, lakheke.

⁶ Manje-ke, bazalwane, nangita kini ngikhuluma ngetilimi, nginganisita ngani, nangingakhulumi kini ngekwembulelwa lokutsite, nome ngelwati, nome ngekuphrofetha, nome ngekufundzisa?

⁷ Nemintjingozi, lengenamphefumulo, njengelivenge nelugitali, nangabe emanothi ayo angevakali kahle-hle, utakwati ngani kutsi kudlalwani?

⁸ Ngobe nangabe impalampala ingakhali ngalokuvakalako, ngubani longatilungiselela kuya emphini?

⁹ Kuyafanana-ke nakini naningakhiphi inkhulumo lecacile ngelulwimi lwenu, kungacondzakala kanjani loko lokushiwoko? Niyawube nikhuluma emoyeni nje.

¹⁰ Tinyenti tinhlobo tetilimi la emhlabeni, kepha kute nalunye lolungakhulumi lokuvakalako.

¹¹ Kodvwa nangabe ngingalwati lulwimi lolukhulunywa ngulomunye, loko lakukhulumako akuvakali kimi, nami lengikukhulumako akuvakali kuye.

¹² Ngako-ke njengobe nani ninemdlandla ngetiphiwo taMoya, shisekelani kutsi nibe nato kakhulu, kuze kwakheke libandla.

¹³ Ngako-ke lokhuluma ngetilimi, akakhulekele kutsi akwati kutihumusha.

¹⁴ Ngobe nangikhuleka ngetilimi, kukhuleka umoya wami, ingcondvo yami ayisitakali.

¹⁵ Pho, ngitakwenta njani? Ngitawukhuleka ngemoya nangengcondvo, ngihlabele ngekudvumisa ngemoya nangengcondvo.

¹⁶ Ngobe nawobonga Nkulunkulu usemoyeni, lona lote letipho angasho kanjani kutsi: “Amen,” kulokubonga kwakho? Ingani phela akakuva loko lokushoko.

¹⁷ Ngobe nome kubonga kwakho kungaba kuhle kakhulu, kodvwa akwakhi muntfu.

¹⁸ Noko ngibonga Nkulunkulu kutsi mine ngikhuluma ngetilimi kakhulu kunani nonkhe,

¹⁹ kodvwa ebandleni ngingatsandza kukhuluma emagama lasihlanu nje ngengcondvo yami khona ngitewufundzisa labanye, kunekukhuluma ngetilimi emagama lati-10 000.

²⁰ Bazalwane, ningaboba bantfwana ekucabangeni, kodvwa ebubini niboba tinswane, ekucabangeni nibe ngulabakhule impela.

²¹ Kubhaliwe emtsetfweni kutsi: “ ‘Ngiyawukhuluma kulesive ngemilomo yebantfu baletinye tilimi, kepha noko bangeke bangive,’ isho njalo iNkhosi.”

²² Tilimi tisibonakaliso kulabangakholwa, hhayi kulabakholwako; kepha kuphrofetha kusibonakaliso kulabakholwako, hhayi kulabangakholwa.

²³ Libandla nalingahlangana ndzawonye lisuke lonkhe likhulume ngetilimi, bese kungena labangativa nome emahedeni, bangete basho yini kutsi niyahlanya?

²⁴ Kepha nangabe bonkhe baphrofetha, bese kungena umhedeni nome longati lutfo, utawuhlatjwa ngiwo onkhe lamavi abo, ehlulelwe ngiwo.

²⁵ Timfihlo tenhlitiyo yakhe tiyawuvela ekukhanyeni awe phansi ngebuso, athandaze kuNkulunkulu, acinise atsi: “Impela Nkulunkulu ukhona emkhatsini wenu.”

Indlela yekukhonta kwelibandla

²⁶ Ngako-ke, bazalwane, nanibutsanele kukhonta, nibonikana ematfuba: Lomunye akacale liculo, lomunye afundzise, lomunye etfule sembulo, lomunye akhulume ngetilimi, lomunye atihumushe. Konkhe kwenteleni kutsi kwakheke libandla.

²⁷ Nakukhona labakhuluma ngetilimi, ababe babili bangendluli kulabatsatfu, banikane ematfuba, lomunye ahumushe.

²⁸ Kepha nangabe kute lohumushako, akathule lona wetilimi nakungusebandleni, atikhulumele yena yedvwana naNkulunkulu.

²⁹ Mayelana nalabaphrofethako abakhulume babe babili, nome babe batsatfu, labanye bakuhlole ngaMoya.

³⁰ Kodvwa nangabe kwembulwa lutfo kulomunye lohleti phansi, akathule lona lokhulumako.

³¹ Ngaleyo ndlela ningaphrofetha nonkhe ngamunye, baze labanye bafundze futsi bakhutsateke.

³² Imimoya yebaphrofethi itfobela baphrofethi,

³³ ngobe Nkulunkulu akasiye Nkulunkulu wetiphitsiphitsi kodvwa wekuthula. Njengobe kunjalo kuwo onkhe emabandla alabangcwele,

³⁴ bafati abathule emabandleni, ngobe abakavumeleki kutsi bakhulume, kepha abatitfobe njengaloku usho njalo umtsetfo.

³⁵ Nakukhona labafuna kukwati, abakubute emadvodzeni abo emakhaya, ngobe kulihlazo kutsi umfati akhulume ebandleni.

³⁶ Kambe livi laNkulunkulu laphuma kini yini? Nobe kumbe lefika kini nodvwana yini?

³⁷ Nangabe umuntfu atsi ungumphrofethi nome atsi waMoya, kufanele ati kutsi loku lenginibhalela kona ngumyalo weNkhosi.

³⁸ Kepha umuntfu nangakunaki loku, akanganakwa naye.

³⁹ Ngako-ke, bazalwane bami, khutsalelani kuphrofetha; kodvwa ningakuvimbeli kukhuluma ngetilimi.

⁴⁰ Kepha konkhe kwenteni kahle ngenhlelembiso.