1 kubaseKorinthe 12 - Siswati 1996 Bible

Tiphiwo taMoya Longcwele letehlukene nekuphatfwa kwato

¹ Kepha macondzana netiphiwo taMoya, bazalwane, angitsandzi kutsi ningati lutfo ngato.

² Niyati kutsi nisengakakholwa nedukiselwa etithicweni letatitimungulu.

³ Ngako-ke ngitsandza kutsi nati kutsi, kute umuntfu lokhuluma ngaMoya waNkulunkulu longatsi: “Jesu akacalekiswe!” Futsi kute umuntfu longatsi: “Jesu uyiNkhosi!” ngaphandle kwemuntfu lonaMoya Longcwele.

⁴ Kukhona tiphiwo temusa letehlukene, kepha munye lowo Moya.

⁵ Kukhona imisebenti leminyenti leyehlukene yekusitana; kepha yinye leyo Nkhosi.

⁶ Kukhona imisebenti yemandla leyehlukene, kepha munye lowo Nkulunkulu losebenta konkhe kubo bonkhe.

⁷ Ngulowo nalowo uphiwa lokubonakalisa Moya, kuze sakhane.

⁸ Lomunye uphiwa ngaMoya livi lekuhlakanipha, kepha lomunye livi lekwati, ngaye yena lowo Moya,

⁹ lomunye kukholwa, ngaye lowo Moya, lomunye tiphiwo tekuphilisa, ngaye lowo Moya munye,

¹⁰ lomunye kwenta imisebenti yemandla, lomunye kuphrofetha, lomunye kwehlukanisa imimoya, lomunye kukhuluma ngetilimi, lomunye kuhumusha tilimi.

¹¹ Konkhe loko kusetjentwa nguye lowo Moya munye, ababela ngulowo nalowo njengekutsandza kwakhe.

Umtimba munye unetitfo letinyenti

¹² Njengobe nemtimba umunye, kepha unetitfo letinyenti, naloku titinyenti nje, kodvwa tingumtimba munye, unjalo-ke naKhristu.

¹³ Ngobe ngaMoya munye tsine sonkhe sabhajatiswa kutsi sibe ngumtimba munye, nome singemaJuda nome singemaGriki, nome sitigcili, nome singulabakhululekile, tsine sonkhe sanatsiswa Moya munye.

¹⁴ Umtimba awusiso sitfo sinye, kodvwa titfo letinyenti.

¹⁵ Nangabe lunyawo lungatsi: “Loku ngingesiso sandla, angisiye wemtimba,” noko nome lungasho njalo, lusengilo lwemtimba.

¹⁶ Nome indlebe ingatsi: “Loku ngingesilo liso, angisiye wemtimba,” noko nome ingasho njalo, isengiyo yemtimba.

¹⁷ Kube umtimba wonkhe bewuliso, ngabe uva ngani? Kube umtimba wonkhe bewuyindlebe, ngabe liphunga liviwa ngani?

¹⁸ Kodvwa manje Nkulunkulu umisile titfo tonkhe, nguleso naleso emtimbeni, njengekutsandza kwakhe.

¹⁹ Kube kambe titfo tonkhe betisitfo sinye, umtimba ngabe uphi?

²⁰ Manje titfo tinyenti, kodvwa tingumtimba munye.

²¹ Liso alikafaneli kusho esandleni kutsi: “Angikudzingi;” nenhloko futsi ayikafaneli kusho etinyaweni kutsi: “Anginidzingi.”

²² Kantsi nje ngempela leto titfo temtimba lekungatsi tibutsakatsaka kunaletinye tiyadzingeka.

²³ Naleto titfo temtimba lekungatsi tedzelelekile kunaletinye sitatisa kakhulu, naleto lesinemahloni ngato tihlonishwa kakhulu

²⁴ kunaleto lesingenamahloni ngato. Kepha Nkulunkulu wawuhlanganisa umtimba, wanika leti letedzelelekile ludvumo lolukhulu kakhulu,

²⁵ kuze kubete kwehlukana emtimbeni kepha titfo tonkhe tinakekelane ngalokufananako.

²⁶ Nangabe kuhlupheka sitfo sinye, kuhlupheka titfo tonkhe kanye naso; nangabe kudvunyiswa sitfo sinye, kujabula titfo tonkhe kanye naso.

²⁷ Kepha nine ningumtimba waKhristu netitfo ngabanye.

²⁸ Nkulunkulu umise labatsite ebandleni: kucala baphostoli, kwesibili baphrofethi, kwesitsatfu bafundzisi, bese kuba ngulabenta imisebenti yemandla, nalabanetiphiwo temusa tekuphilisa, nebasiti, nebaholi, nalabakhuluma ngetilimi.

²⁹ Babaphostoli bonkhe yini? Babaphrofethi bonkhe yini? Babafundzisi bonkhe yini? Benta imisebenti yemandla bonkhe yini?

³⁰ Bonkhe banetiphiwo temusa tekuphilisa yini? Bakhuluma ngetilimi bonkhe yini? Bonkhe bahumusha tilimi yini?

³¹ Kepha langatelelani tiphiwo letimcoka. Ngisetawunikhombisa futsi indlela lekungiyona iyinhle kakhulu.