1 kubaseKorinthe 11 - Siswati 1996 Bible

¹ Hambani etinyatselweni tami, njengobe nami ngihamba etinyatselweni taKhristu.

Kushucula inhloko enkonzweni

² Ngiyanincoma ngobe ningikhumbula etintfweni tonkhe, nibambelele etimfundzisweni lenganifundzisa tona.

³ Kepha-ke ngitsandza kutsi nati kutsi, inhloko yawo onkhe emadvodza nguKhristu, nenhloko yemfati yindvodza, nenhloko yaKhristu nguNkulunkulu.

⁴ Nguleyo naleyo ndvodza lesuke ithandaza nome iphrofetha ifake lutfo enhloko, isuke ihlazisa inhloko yayo, Khristu.

⁵ Kepha ngulowo nalowo mfati losuke athandaza nome aphrofetha, angabophi lutfo enhloko, usuke ahlazisa inhloko yakhe, indvodza yakhe, ngobe loko kuyaye kufanane nekutsi uhhulile.

⁶ Nangabe umfati angambonyi inhloko yakhe, akahhule; nangabe kulihlazo kumfati kuhhula, akashucule.

⁷ Ngobe empeleni indvodza ayikafaneli kushucula enhloko, ngobe ingumfanekiso neludvumo lwaNkulunkulu, kodvwa umfati uludvumo lwendvodza.

⁸ Indvodza ayitsatfwanga kumfati, kodvwa ngumfati lowatsatfwa endvodzeni, nakadalwa.

⁹ Futsi indvodza ayidalelwanga umfati, kodvwa ngumfati lowadalelwa indvodza.

¹⁰ Ngako-ke ngenca yetingilosi umfati kufanele abe neluphawu lwekuhlonipha enhloko yakhe.

¹¹ Noko eNkhosini umfati akasilutfo ngaphandle kwendvodza, nendvodza ayisilutfo eNkhosini ngaphandle kwemfati.

¹² Njengobe umfati atsatfwa endvodzeni, kanjalo indvodza italwa ngumfati, kepha konkhe kuvela kuNkulunkulu.

¹³ Tiboneleni nine ngekwenu kutsi kulungile yini kutsi umfati athandaze kuNkulunkulu angakashuculi lutfo enhloko?

¹⁴ Imvelo yona ngekwayo ayisiyo yini lefundzisa kutsi indvodza lenetinwele letindze iyatihlazisa?

¹⁵ Kodvwa umfati nakanetinwele letindze, kuludvumo kuye. Ngobe kuye tinwele letindze tiliduku lemvelo lelingesuki.

¹⁶ Kodvwa-ke nangabe umuntfu afuna kuphika inkhani, tsine site lelinye lisiko enkonzweni, nemabandla aNkulunkulu ate lelinye.

Indlela yekuphatsa Sidlo seNkhosi

¹⁷ Kulemiyalo lelandzelako anginincomi noko, ngobe emihlanganweni yenu yekukhonta nihlanganela kakhulu lokubi kunekuhlanganela lokulungile.

¹⁸ Ngobe kwekucala nje, nanihlangana njengelibandla, ngiva kutsi kuyaye kube khona kwehlukana emkhatsini wenu, lengicishe ngikukholwe.

¹⁹ Ngobe vele kubhekekile kutsi kube khona kwehlukana emkhatsini wenu, kuze kutsi labetsembekile babonakale.

²⁰ Nanibutsana ndzawonye, akusiko kudla Sidlo seNkhosi loko.

²¹ Ngobe ekudleni kwenu ngulowo nalowo uchubeka nekudla kwakhe kudla, lomunye alambe, lomunye anatse adzakwe.

²² Kantsi nite yini tindlu tekudlela netekunatsela, nome nedzelela libandla laNkulunkulu, nikhinyabete labo labatimphuya? Ngingatsini nje kini? Nginincome? Cha, ngeke nginincome ngaloko.

²³ Ngobe mine ngakwemukela eNkhosini loko lenganinika kona, kutsi iNkhosi Jesu ngalobo busuku latsengiswa ngabo, watsatsa sinkhwa,

²⁴ wabonga wasihlephula, watsi: “Loku ngumtimba wami lohleshulelwe nine. Loku kwenteni kuze ningikhumbule.”

²⁵ Ngalokufananako watsatsa indzebe emvakwekudla kwakusihlwa, watsi: “Lendzebe sivumelwane lesisha, lesentiwe ngengati yami; yentani loku ngetikhatsi tonkhe, naninatsa kuyo, kuze ningikhumbule.”

²⁶ Ngobe nanidla lesinkhwa ninatse kulendzebe, nifakazela kufa kweNkhosi, ize ibuye.

²⁷ Ngako-ke lowo lodla lesinkhwa aphindze anatse kulendzebe ngalokungakafaneli, unelicala lekona umtimba nengati yeNkhosi.

²⁸ Kodvwa umuntfu akatihlolisise yena, emvakwaloko-ke adle lesinkhwa anatse kulendzebe.

²⁹ Ngobe lodlako anatse, utidlela atinatsele yena licala lekwehlulelwa, nangabe angawehlukanisi umtimba weNkhosi.

³⁰ Ngenca yaloko labanyenti emkhatsini wenu babutsakatsaka bayagula, labanye sebafa.

³¹ Kepha kube besitehlulela tsine ngalokufanele, besingeke sehlulelwe.

³² Kepha nasehlulelwa yiNkhosi, siyalwa ngiyo, kuze singalahlwa kanye nelive.

³³ Ngako-ke, bazalwane bami, nanibutsanela sidlo, nibomelana.

³⁴ Nakukhona lolambile, abodla ekhaya, khona ningetiwubutsanela kulahlwa. Lokunye lokusalako sengiyawukusho, nangifika lapho.