1 kubaseKorinthe 1 - Siswati 1996 Bible

Singeniso nekubonga Nkulunkulu

¹ Lencwadzi iphuma kuPawula, lowabitwa ngentsandvo yaNkulunkulu kutsi abe ngumphostoli waKhristu Jesu, kanye nakuSostene, umzalwane.

² Iya ebandleni laNkulunkulu leliseKhorinte, kubo labangcwelisiwe kuKhristu Jesu, babitelwa kuba ngulabangcwele kanye nabo bonkhe, etindzaweni tonkhe, labakhuleka egameni laJesu Khristu, loyiNkhosi yabo neyetfu.

³ Akube kini umusa nekuthula lokuvela kuNkulunkulu longuBabe wetfu, naseNkhosini yetfu Jesu Khristu.

⁴ Ngibonga Nkulunkulu wami ngato tonkhe tikhatsi. Ngimbonga ngani ngenca yemusa wakhe leniwuphiwe kuKhristu Jesu,

⁵ kutsi nicetjiswe ngetindlela tonkhe kuye, ekukhulumeni konkhe naselwatini lonkhe.

⁶ Ngisho nebufakazi ngaJesu Khristu baciniswa kini,

⁷ khona ningetiwusilalelwa nangusinye sipho semusa ngesikhatsi nisemele kubonakaliswa kweNkhosi yetfu Jesu Khristu.

⁸ Yena uyawunicinisa nani, kudzimate kube ngusekupheleni, nitfolakale nite licala mzukwana welilanga leNkhosi yetfu Jesu Khristu.

⁹ Wetsembekile Nkulunkulu lowanibitela ebudlelwaneni neNdvodzana yakhe Khristu iNkhosi yetfu.

Kwehlukana lobekusebandleni laseKhorinte

¹⁰ Bazalwane bami labatsandzekako, ngiyanincenga ngelibito leNkhosi yetfu Jesu Khristu kutsi nivumelane ngantfo yinye nonkhe; kubete kwehlukana emkhatsini wenu, kodvwa nipheleliswe emcondvweni munye nasembonweni munye.

¹¹ Loku ngikusho ngobe sengivile ngani, bazalwane bami, ngitjelwe bendlu yakaKlowe, kutsi kukhona siphitsiphitsi sekwehlukana emkhatsini wenu.

¹² Ngisho loku kwekutsi lomunye utsi: “Mine ngiwakaPawula,” lomunye atsi: “Mine ngiwaka-Apolosi,” nalomunye atsi: “Mine ngiwakaKhefase,” nalomunye atsi: “Mine ngiwakaKhristu.”

¹³ Khristu wehlukene yini? NguPawula yini lowabetselwa ngenca yenu? Nabhajatiselwa egameni laPawula yini?

¹⁴ Noko ngibonga Nkulunkulu nje kutsi angizange sengibhabhatise muntfu emkhatsini wenu, ngaphandle kwaKhrispu naGayusi;

¹⁵ ngako kute longatsi nabhajatiselwa egameni lami.

¹⁶ Labanye lengababhabhatisa bakaStefanasi. Ngaphandle kwalabo angisho kutsi ukhona lomunye lengambhabhatisa.

¹⁷ Ngobe mine Khristu akangitfumelanga kona kuyawubhabhatisa, kodvwa wangitfumela kutsi ngiyewushumayela liVangeli, hhayi ngekuhlakanipha kwemavi, funa sentiwe lite siphambano sakhe.

Kuhlakanipha kwaNkulunkulu nekwelive

¹⁸ Livi lesiphambano libulima kulababhubhako, kodvwa kitsi tsine lesisindziswako lingemandla aNkulunkulu.

¹⁹ Ngobe kubhaliwe kutsi: “Ngiyawucitsa kuhlakanipha kwalabahlakaniphile, nekucondza kwetati ngikwente kube lite.”

²⁰ Siphi sihlakaniphi? Siphi sati semtsetfo? Uphi umphikisi walesikhatsi? Nkulunkulu akakwenti bulima yini kuhlakanipha kwalelive?

²¹ Ngobe phela ekuhlakanipheni kwaNkulunkulu live alizange limati Nkulunkulu ngekuhlakanipha kwalo. Kwaba kuhle kuye kusindzisa labakholwako ngenshumayelo lebulima.

²² Ngobe emaJuda afuna tibonakaliso, kantsi emaGriki wona afuna kuhlakanipha.

²³ Kodvwa tsine sishumayela Khristu abetselwe esiphambanweni, losikhubekiso kumaJuda nebulima kubetive.

²⁴ Kodvwa kulabo lababitiwe, kumaJuda nakumaGriki, sishumayela Khristu longemandla aNkulunkulu nekuhlakanipha kwaNkulunkulu.

²⁵ Ngobe bulima baNkulunkulu buhlakaniphile kunekuhlakanipha kwebantfu, nebutsakatsaka baNkulunkulu bunemandla kunemandla ebantfu.

²⁶ Bazalwane bami, khumbulani kubitwa kwenu, kutsi ababanyenti labahlakaniphile ngekwasemhlabeni, ababanyenti nalabanemandla, ababanyenti nalabahloniphekile ngekutalwa kwabo.

²⁷ Kodvwa Nkulunkulu wakhetsa lokubulima emhlabeni, kuze ajabhise labahlakaniphile, wakhetsa lokubutsakatsaka, kuze ajabhise lokunemandla.

²⁸ Nkulunkulu wakhetsa lokubukeleka phansi nalokwedzelelekile emhlabeni; wakhetsa netintfo letingekho, khona atewucitsa letikhona,

²⁹ kuze kubete muntfu lotibongako embikwaNkulunkulu.

³⁰ Yena ungumtfombo wemphilo yenu kuJesu Khristu, lamenta waba kuhlakanipha kwetfu, nekulunga, nekungcweliswa, kanye nekuhlengwa.

³¹ Ngako-ke: “Lotibongako, akatibonge ngeNkhosi,” njengobe kusho umBhalo.