1 Emakhosi 9 - Siswati 1996 Bible

Kutibonakalisa kwesibili kwaNkulunkulu kuSolomoni

¹ Watsi kube Solomoni acedze kwakha lithempeli laSimakadze kanye nesigodlo sakhe, asakufeze konkhe labefise kukwenta,

² Simakadze waphindza watibonakalisa kuye kwesibili, njengobe abebonakele kuye eGibeyoni.

³ Simakadze wakhuluma kuye, watsi: “Ngiwuvile umthandazo wakho nekuncenga kwakho lokwente kimi; lelithempeli lolakhile sengilingcwelisile, ngekutsi ngibeke Libito lami lapho kulo phakadze naphakadze. Emehlo ami nenhlitiyo yami kuyawuhlala kulapho kulo ngaso sonkhe sikhatsi.

⁴ “Wena-ke nangabe ungahamba ngebucotfo benhlitiyo nangekucondza embikwami, ulingise uyihlo Davide, wente konkhe lengikuyala ngako, ugcine timiso nemitsetfo yami,

⁵ ngiyawusimisa sihlalo sakho sebukhosi etikwa-Israyeli phakadze naphakadze, njengobe ngametsembisa Davide, uyihlo, ngesikhatsi ngitsi: ‘Akuyikwenteka kutsi weswele umuntfu esihlalweni sebukhosi saka-Israyeli.’

⁶ “Kodvwa nangabe nine nome emadvodzana enu nigucuka, nisuka kimi, ningayigcini imiyalo yami netimiso tami lengininike tona, nisuke kuto niyewukhonta labanye bonkulunkulu nikhuleke kubo,

⁷ Israyeli ngiyakumsusa eveni lengimnike lona, ngililahle nalelithempeli lengilingcwelisele Libito lami. Israyeli sewuyawuba siga nentfo yekuphukutwa, abe yinhlekisa kuto tonkhe tive.

⁸ Noko nome kwanyalo lelithempeli lisenesitfunti lesimatima kangaka, bonkhe labendlula ngakulo bayawumangala bahhalatise, batsi: ‘Simakadze uyenteleni lentfo lenjena kulelive nakulelithempeli?’

⁹ Bantfu bayawuphendvula batsi: ‘Kungobe bamfulatsela Simakadze Nkulunkulu wabo, lowakhipha bokhokho babo eGibhithe, besuka bagugumatsa labanye bonkulunkulu basebentele bona, babakhonta bakhuleka kubo. Nguko nje Simakadze asabehlisele lenhlekelele lengaka.’ ”

Sivumelwane saSolomoni naHiramu

¹⁰ Ekupheleni kweminyaka lengema-20 Solomoni labekakha ngayo tindlu letimbili: lithempeli laSimakadze nesigodlo senkhosi,

¹¹ inkhosi Solomoni yabe seyinika Hiramu, inkhosi yaseThire, emadolobha langema-20 aseGalile, ngobe Hiramu abemnike yonkhe imisedari, netipheshula kanye negolide labeyidzinga.

¹² Kodvwa watsi Hiramu nakesuka eThire kuyawubona lamadolobha labewaphiwe nguSolomoni, afike angete amjabulisa.

¹³ Wabuta watsi: “Madolobha mani lawa longiphe wona, mnaketfu?” Wawetsa watsi Live laKhabuli. Kwaba libito lawo kwaze kwaba ngulamuhla.

¹⁴ Hiramu abesatfumele kuSolomoni igolide leyayingemakhilogremu labengaba ti-4 000.

Lokunye lokwafezwa nguSolomoni

¹⁵ Lona ngumlandvo wenkhosi Solomoni ngekubutsekisa kwakhe bantfu nekubasebentisa kwakhe ngenkhani ekwakheni lithempeli laSimakadze, nesigodlo sakhe, nasekwakheni tibebesi, nasekwakheni lubondza lwaseJerusalema, neHasori, neMegido kanye neGezeri.

¹⁶ Faro, inkhosi yaseGibhithe, abehlasele watfumba iGezeri, wayishisa ngemlilo. Wabulala takhamiti tayo, emaKhenani, wabe sewuyenta sipho semshado endvodzakatini yakhe leyayiyinkhosikati yaSolomoni.

¹⁷ Solomoni wakha iGezeri kabusha, waphindze wakha neBhethi Horoni Lengentansi,

¹⁸ neBhalathi, neThadmori lesehlane, ekhatsi eveni lakhe;

¹⁹ wakha onkhe emadolobha lapho abenetingungu khona, kanye nemadolobha etincola takhe nemahhashi akhe, nako konkhe labefisa kukwakha eJerusalema, naseLebanoni, nakulo lonkhe lelo live labelibusa.

²⁰ Bonkhe bantfu lababesele kuma-Amori, nakumaHethi, nakumaPheresi, nakumaHivi, nakumaJebhusi, lababengesiwo ema-Israyeli,

²¹ lokusho kutsi titukulwane tato letatisasele kulo lonkhe live, lapho ema-Israyeli ehluleka khona kutibhubhisa aticedze, tonkhe-ke leto tive Solomoni watibutsekisa watisebentisa ngekutigcilata, njengobe kusenjalo nalamhla loku.

²² Kodvwa Solomoni akazange ente ngisho nome munye um-Israyeli kutsi abe sigcili; ema-Israyeli wona abengemabutfo akhe emphi, netiphatsimandla takhe tasembusweni, nebaholi bakhe, netindvuna takhe temabutfo, netebashayeli bakhe betincola, nebagibeli bakhe bemahhashi.

²³ Solomoni abenetindvuna letinkhulu letatingema-550, letatiphatsa imisebenti yakhe kanye nalababenta leyo misebenti.

²⁴ Kwatsi kube kufike indvodzakati yaFaro iphuma eDolobheni laDavide, ite esigodlweni Solomoni labesayakhele sona, Solomoni wakha tibebesi.

²⁵ Katsatfu ngemnyaka Solomoni abenta umnikelo wekushiswa nemnikelo wekuthula elatini labelakhele Simakadze, ashise nemphepho embikwaSimakadze kanye nayo, kuze atewufeza leyo mininingwane yasethempelini.

²⁶ Inkhosi Solomoni waphindze wakha nemikhumbi e-Esiyoni Geberi lesedvutane ne-Elathi, ka-Edomu elugwini lweLwandle Lolubovu.

²⁷ Hiramu watfumela emadvodza akakhe, ematilosi labenelwati ngetaselwandle, kutsi asebente kanye nemadvodza akaSolomoni kuleyo mikhumbi.

²⁸ Abehamba ngemkhumbi aye e-Ofiri, abuye negolide leyayingemakhilogremu langetulu kweti-14 000, afike ayetfule enkhosini Solomoni.