1 Emakhosi 22 - Siswati 1996 Bible

Kwelulekwa kwa-Ahabi ngumphrofethi Mikhaya

¹ Kwaze kwaphela iminyaka lemitsatfu kute imphi emkhatsini wemaSiriya nema-Israyeli.

² Kodvwa kwatsi ngemnyaka wesitsatfu Jehoshafati, inkhosi yakaJuda, wehla wayawubonana nenkhosi yaka-Israyeli.

³ Ahabi, inkhosi yaka-Israyeli, bese iyale tindvuna tayo yatsi: “Anati yini kutsi iRamothi Gileyadi yakitsi, kodvwa kuze kube ngunyalo, kute lutfo lolwentiwe kuze siyitsatse etandleni tenkhosi yaseSiriya?”

⁴ Ngako yabuta Jehoshafati, yatsi: “Ungahamba yini nami siyekulwa neRamothi yaseGileyadi?” Jehoshafati waphendvula inkhosi yaka-Israyeli, watsi: “Mine ngifanana nawe, bantfu bami banjengebantfu bakho, nemahhashi ami anjengemahhashi akho.”

⁵ Kodvwa Jehoshafati wachubeka wakhuluma enkhosini yaka-Israyeli, watsi: “Cala kucala ufune seluleko saSimakadze.”

⁶ Ngako inkhosi yaka-Israyeli yase ibutsela ndzawonye baphrofethi lababengaba ngema-400, emadvodza odvwa, yababuta yatsi: “Ngingaya yini kuyawuhlasela iRamothi Gileyadi, nome ngiyekele?” Baphendvula batsi: “Hamba, ngobe Simakadze utayinikela etandleni tenkhosi.”

⁷ Kodvwa Jehoshafati wabuta watsi: “Sekute yini lomunye umphrofethi waSimakadze lapha lesingabuta kuye?”

⁸ Inkhosi Ahabi yaphendvula Jehoshafati, yatsi: “Usekhona munye lesingabuta ngaye kuSimakadze, kodvwa ngiyamenyanya, ngobe akaze nje aphrofethe lokuhle ngami, kodvwa uphrofetha lokubi kodvwa. NguMikhaya, umsa waJimla.” Jehoshafati waphendvula watsi: “Inkhosi ayikafaneli kukusho loko.”

⁹ Ngako Ahabi, inkhosi yaka-Israyeli, wase ubita lomunye wetindvuna takhe, watsi: “Landza Mikhaya, umsa waJimla, masinyane.”

¹⁰ Babegcoke imijiva yabo yebukhosi bo-Ahabi, inkhosi yaka-Israyeli, banaJehoshafati, inkhosi yakaJuda, bahleti etihlalweni tabo tebukhosi, ebaleni lekubhulela kolo, eceleni kwelisango lelingena eSamariya; bonkhe baphrofethi bebaphrofetha embikwabo.

¹¹ Sedekiya, umsa waKhenana, yena abesente timphondvo tensimbi, wamemeta atsi: “Naku lokushiwo nguSimakadze: ‘Ngaleti utawuhlaba emaSiriya aze afe, aphele.’ ”

¹² Bonkhe-ke nalaba labanye baphrofethi babekhuluma intfo yinye, batsi: “Hlasela iRamothi Gileyadi, uyehlule. Ngobe Simakadze utayinikela etandleni tenkhosi.”

¹³ Lesigijimi lebesilandze Mikhaya samhlebela, simdvonsa ngendlebe, satsi: “Buka la, njengendvodza yinye laba labanye baphrofethi baphrofethe imphumelelo yenkhosi Ahabi. Ngako-ke nawe emavi akho abovumelana newalaba labanye, ukhulume lokuhle.”

¹⁴ Kodvwa Mikhaya waphendvula watsi: “Ngifunga kuphila kwaSimakadze, ngitamtjela loko lengikutjelwa nguSimakadze kuphela.”

¹⁵ Watsi kube efike, inkhosi yambuta yatsi: “Mikhaya, singaya yini kuyawuhlasela iRamothi Gileyadi, nome siyekele?” Waphendvula Mikhaya watsi: “Hlasela uncobe, ngobe Simakadze utayinikela esandleni senkhosi.”

¹⁶ Inkhosi Ahabi yatsi kuye: “Ngitakutjela kangaki kutsi ungangitjeli lutfo lolunye ngaphandle kweliciniso egameni laSimakadze?”

¹⁷ Mikhaya wase uyaphendvula, watsi: “Ngibone onkhe ema-Israyeli ahlakatekile etintsabeni njengetimvu letite umelusi; Simakadze watsi: ‘Labantfu abanamelusi. Nguloyo akatibuyelele ekhaya lakhe ngekuthula.’ ”

¹⁸ Ahabi, inkhosi yaka-Israyeli, watsi kuJehoshafati: “Angikakutjeli-ke kutsi kute lokuhle langahle akuphrofethe ngami, kodvwa lokubi kuphela?”

¹⁹ Mikhaya wachubeka watsi: “Ngako-ke lalela livi laSimakadze: Ngabona Simakadze ahleti esihlalweni sakhe sebukhosi nayo yonkhe imphi yasezulwini ime ngakuye imtungeletile ngesekudla sakhe nangesancele.

²⁰ Simakadze watsi: ‘Ngubani lotasihungela Ahabi kutsi ayewuhlasela iRamothi Gileyadi atiyele yena ekufeni kwakhe?’ “Lomunye waphakamisa loku, lomunye waphakamisa lokwa.

²¹ Ekugcineni kwesuka umoya, weta wema embikwaSimakadze watsi: ‘Mine ngitamhunga.’

²² “Simakadze wawubuta watsi: ‘Kanjani?’ “Umoya waphendvula watsi: ‘Ngitawuphuma ngibe ngumoya wemanga emlonyeni wabo bonkhe baphrofethi bakhe.’ “Simakadze watsi: ‘Cha, wena-ke utawuphumelela kumhunga nembala. Hamba, wente njalo.’

²³ “Ngako-ke Simakadze ubeke umoya wemanga emlonyeni wabo bonkhe baphrofethi bakho. Simakadze ukulungiselele sehlakalo kutsi sikwehlele.”

²⁴ Sedekiya, umsa waKhenana, wasukuma wafumba Mikhaya ngemphama ebusweni, atsi: “LoMoya waSimakadze uhambe ngakuphi, nawusuka kimi uyewukhuluma kuwe?”

²⁵ Mikhaya waphendvula watsi: “Loko uyawukubona ukwati, mhlazana uhamba sewuyawubhaca ekamelweni lelisekhatsi.”

²⁶ Ahabi, inkhosi yaka-Israyeli, wase ukhipha umyalo watsi: “Tsatsani Mikhaya nimbuyisele emuva ku-Amoni, indvuna yelidolobha, nakuJowashi, indvodzana yenkhosi,

²⁷ nitsi: ‘Inkhosi itsi: “Valelani nangu umuntfu esitokisini ningamniki lutfo ngaphandle kwesinkhwa nemanti, ngize ngibuye ngiphephile.” ’ ”

²⁸ Mikhaya watsi: “Nawungahle nje ubuye uphephile, Simakadze utawube akaze wakhuluma ngami.” Wachubeka watsi: “Nonkhe nine tive, wanakeni lamavi ami.”

Kubulawa kwa-Ahabi eRamothi Gileyadi

²⁹ Ngako-ke Ahabi, inkhosi yaka-Israyeli, kanye naJehoshafati, inkhosi yakaJuda, base bayakhuphuka baya eRamothi Gileyadi.

³⁰ Ahabi wakhuluma kuJehoshafati watsi: “Mine ngitawungena emkhatsini wemabutfo ngiphice umkhondvo, kodvwa wena ungatigcoka tingubo takho tebukhosi.” Ngako Ahabi, inkhosi yaka-Israyeli, wase uphica umkhondvo wangena emkhatsini wemabutfo agcoke letinye tingubo.

³¹ Inkhosi yaseSiriya beyiyale tindvuna tayo tetincola temphi letingema-32, yatsi: “Nine ningalwi namuntfu lomunye, nome mncane nome mkhulu, nicondzane kuphela nenkhosi yaka-Israyeli Ahabi.”

³² Letindvuna tetincola temphi tatsi natibona Jehoshafati, tacabanga tatsi: “Ngempela lena ngiyo inkhosi yaka-Israyeli,” ngako tagucukela kuye tiyekumhlasela, kodvwa watsi Jehoshafati nakakhala amemeta,

³³ letindvuna tetincola temphi tambona kutsi akasiyo lenkhosi yaka-Israyeli, tase tiyayekela kumcosha.

³⁴ Kodvwa lomunye wantsala butjoki bakhe wajijimeta, kwagwazeka Ahabi, inkhosi yaka-Israyeli, emahlanganweni etembatfo takhe tensimbi letatimvikela. Inkhosi Ahabi wakhuluma kuloloshayela incola yakhe yemphi, watsi: “Jikisa incola, ungikhiphe lapha emphini. Sengilimele.”

³⁵ Lonkhe lelo langa imphi yayibambene etulu, inkhosi yasekelwa encoleni yayo, ibhekene nemaSiriya. Linceba layo lopha ingati yaze yageletela phansi encoleni, kwatsi kusihlwa inkhosi Ahabi yafa.

³⁶ Latsi lilanga nalishonako, kwamenyetelwa kuyo yonkhe inkambu, kutsiwa: “Ngulowo nalowo akabuyele ekhaya lakhe, ngulowo eveni lakubo.”

³⁷ Wafa kanjalo-ke Ahabi, inkhosi, watsatfwa wayiswa eSamariya, bafike bamfihla khona.

³⁸ Lencola yakhe bayigezela esitibeni lesiseSamariya, lapho kwakugeza khona tingwadla, tefika tinja tacapha ingati ya-Ahabi, njengobe livi laSimakadze lalishito.

³⁹ Leminye imininingwane ngekubusa kwa-Ahabi lefaka konkhe lakwenta, nesigodlo lasakha wasihlobisa ngematinyo endlovu, nemadolobha lawakhela tinqaba, kubhaliwe encwadzini yemilandvo yemakhosi aka-Israyeli.

⁴⁰ Ahabi wafa; Ahaziya, umsa wakhe, waba yinkhosi esikhundleni sakhe.

Jehoshafati, inkhosi yakaJuda

⁴¹ Jehoshafati, umsa wa-Asa, wabekwa waba yinkhosi yakaJuda ngemnyaka wesine wekubusa kwa-Ahabi, inkhosi yaka-Israyeli.

⁴² Jehoshafati abeneminyaka lengema-35 budzala ngesikhatsi abekwa kuba yinkhosi. Wabusela eJerusalema iminyaka lengema-25. Libito lenina bekungu-Azubha, indvodzakati yaShilhi.

⁴³ Kuko konkhe Jehoshafati wahamba etinyatselweni teyise Asa, akazange aphambuke kuto, wenta lokuhle emehlweni aSimakadze. Noko tindzawo letiphakeme tekukhontela tithico akazange atisuse, ngako bantfu babesachubeka nekwentela kuto imihlatjelo batfuncise netimphepho.

⁴⁴ Jehoshafati futsi abehlalisene ngekuthula nenkhosi yaka-Israyeli.

⁴⁵ Leminye imininingwane ngekubusa kwenkhosi Jehoshafati, tintfo latiphumelelisa, nekuhlasela kwemabutfo akhe, kubhaliwe encwadzini yemilandvo yemakhosi akaJuda.

⁴⁶ Wacosha imisalela yetitabane telithempeli letatisasele emvakwekubusa kweyise, Asa.

⁴⁷ Kwasala sekute inkhosi e-Edomu; ngako kwase kubambe lisekela.

⁴⁸ Jehoshafati wakha imikhumbi yekuhweba elwandle kutsi ibohamba iye e-Ofiri, ilandze igolide, kodvwa noko ayizange iphumelele kuhamba, ngobe yephukela e-Esiyoni Geberi.

⁴⁹ Ngaleso sikhatsi Ahaziya, umsa wa-Ahabi, wakhuluma kuJehoshafati, watsi: “Vumela emadvodza akami kutsi ahambisane nemadvodza akakho emikhunjini.” Kodvwa Jehoshafati wala.

⁵⁰ Jehoshafati wase uyakhotsama, wafihlwa kuboyisemkhulu, eDolobheni laDavide, uyisemkhulu. Jehoramu, umsa wakhe, waba yinkhosi esikhundleni sakhe.

Ahaziya, inkhosi yaka-Israyeli

⁵¹ Ahaziya, umsa wa-Ahabi, wabekwa waba yinkhosi yaka-Israyeli eSamariya; wabekwa ngemnyaka weli-17 wekubusa kwaJehoshafati, inkhosi yakaJuda. Ahaziya wabusa sive saka-Israyeli iminyaka lemibili.

⁵² Wenta lokubi emehlweni aSimakadze, ngobe walandzela etinyatselweni taboyise nenina, nasendleleni yaJerobowamu, umsa waNebati, lowabangela ema-Israyeli kutsi one.

⁵³ Wakhonta Bhali, wakhotsama kuye, ngaleyo ndlela wacunula Simakadze Nkulunkulu wema-Israyeli, wamtfukutselisa. Ahaziya walingisa uyise.