1 Emakhosi 21 - Siswati 1996 Bible

Sivini saNabothi

¹ Emvakwaloko kwase kuba nesehlakalo lesenteka ngenca yesivini saNabothi waseJezreyeli. Lesivini sasiseJezreyeli eceleni kwesigodlo senkhosi Ahabi, inkhosi yaseSamariya.

² Ahabi watsi kuNabothi: “Nginike lesivini sakho, kuze ngihlanyele tibhidvo, njengobe naku sisedvutane nesigodlo sami nje. Ngitakuntjintjisela ngesivini lesincono kunaso, nome-ke ngikubhadale leyo mali lotayifuna, nangabe utsandza.”

³ Kodvwa Nabothi wamphendvula, watsi: “Simakadze akasungivumela kutsi ngikunike lifa labobabemkhulu.”

⁴ Ngako Ahabi wabuyela ekhaya ahluneme atfukutsele, ngobe Nabothi waseJezreyeli atsite: “Ngingeke ngikunike lifa labobabemkhulu.” Wafike walala embhedzeni wakhe, acumbelene; wadvuba nekudla kudla.

⁵ Umkakhe Jezebeli wangena wambuta, watsi: “Uhlunemeleni kanjena? Awudli ngani?”

⁶ Wamphendvula watsi: “Kungenca ngobe ngitsite ngitsi kuNabothi waseJezreyeli: ‘Ngitsengisele sivini sakho, nome-ke nawutsandza ngikwenanisele ngalesinye sivini esikhundleni saso,’ yena wala watsi: ‘Ngingeke ngikunike sivini sami.’ ”

⁷ Umkakhe Jezebeli watsi: “Lena ngiyona ndlela lowenta ngayo yini njengenkhosi ka-Israyeli? Vuka udle! Jabula futsi! Mine ngitakutfolela lesivini saNabothi, waseJezreyeli.”

⁸ Ngako wabhala tincwadzi ngelibito la-Ahabi, wanamatsisela luphawu lwa-Ahabi kuto, watitfumela kubaholi nebahlonishwa labahlala edolobheni lakaNabothi kanye naye Nabothi.

⁹ Kuletincwadzi abebhale kutsi: “Memetelani lilanga lekuzila, bese nihlalisa Nabothi embonisweni emkhatsini wesive.

¹⁰ Kodvwa nibobe senihlalisa emahuzu lamabili embikwakhe, niwente afakaze kutsi ucalekise Nkulunkulu nenkhosi, bese nimkhiphela ngephandle, nimgcobe ngematje, aze afe.”

¹¹ Ngako baholi nebahlonishwa labebahlala edolobheni lakuboNabothi benta njengobe batjelwe nguJezebeli etincwadzini labebabhalele tona.

¹² Bamemetela kuzila, babeka Nabothi embonisweni emkhatsini webantfu.

¹³ Kwase kuvela emacili lamabili ahlala macondzana naye, abeka Nabothi licala embikwebantfu, atsi: “Nabothi ucalekise Nkulunkulu nenkhosi.” Ngako base bayamtsatsa Nabothi bamkhiphela ngephandle kwelidolobha, bamgcoba ngematje, waze wafa.

¹⁴ Base batfumela livi kuJezebeli batsi: “Nabothi sewugcotjwe ngematje, waze wafa.”

¹⁵ Watsi kube eve Jezebeli kutsi Nabothi sewufile, wakhuluma ku-Ahabi, watsi: “Sukuma utsatse sivini saNabothi, waseJezreyeli, lala kukutsengisela sona ngesiliva kutsi sibe sakho. Akasekho manje, sewufile.”

¹⁶ Ahabi watsi kube eve kutsi Nabothi sewufile, wasukuma wehla wayawutsatsa sivini saNabothi, wasenta sakhe.

¹⁷ Livi laSimakadze lefika ku-Elija, waseThishbe, latsi:

¹⁸ “Yehla uye ku-Ahabi, inkhosi yema-Israyeli, lobusela eSamariya. Manje usesivinini saNabothi, lapho ayele kuyawusenta sakhe.

¹⁹ Ufike umtjele utsi: ‘Naku lokushiwo nguSimakadze: “Awukasontsi umuntfu yini kuze utsatse lomhlaba wakhe?” ’ Bese utsi kuye: ‘Naku lakushoko Simakadze: “Kuleyo ndzawo, lapho tinja tacapha khona ingati yaNabothi, tinja tiyawuphindze ticaphe khona ingati yakho; yebo, yakho ingati.” ’ ”

²⁰ Ahabi watsi ku-Elija: “Wo! Sewungitfolile, sitsa sami!” Elija waphendvula watsi: “Ngikutfolile, ngobe utitsengise wena ngekwenta lokubi emehlweni aSimakadze.

²¹ Simakadze utsi: ‘Ngitakwehlisela sigemegeme etikwakho. Ngitawubhubhisa intalelwane yakho, ngijube bonkhe labadvuna ka-Ahabi, ka-Israyeli, labancane nalabadzala.

²² Indlu yakho ngitayilingisa leya yakaJerobowamu, umsa waNebati, neyakaBhasha, umsa wa-Ahiya, ngobe ungicunulile, ngaze ngatfukutsela, wenta nema-Israyeli ona.’

²³ “Macondzana naJezebeli Simakadze utsi: ‘Tinja tiyawudlela Jezebeli ngaselubondzeni lwaseJezreyeli.’

²⁴ “Tinja tiyakudla labo baka-Ahabi labayawufela ekhatsi edolobheni, tinyoni tasemoyeni tiyawutondla ngalabo labayawufela etigangeni.”

²⁵ Kute indvodza lenjenga-Ahabi leyatitsengisa yona ekwenteni bubi emehlweni aSimakadze, ifucwa ngumkayo Jezebeli.

²⁶ Watiphatsa ngemanyala lamakhulu ngekutsi alandzelane nekukhonta tithico njengema-Amori, Simakadze lawakhukhula, ngesikhatsi nakufika ema-Israyeli.

²⁷ Watsi kube Ahabi eve lamavi, wadzabula tingubo takhe, wembatsa emasaka, wazila, walala ngemasaka, wahamba angulotfotjisiwe.

²⁸ Livi laSimakadze lefika ku-Elija, waseThishbe, latsi:

²⁹ “Ubonile yini kutsi Ahabi utitfobe kanjani embikwami? Ngenca yekutsi utitfobile kimi, ngingeke ngisamehlisela lesigemegeme etikhatsini takhe, kodvwa ngiyawusehlisela etikwendlu yakakhe ngesikhatsi sekubusa kwemsa wakhe.”