1 Emakhosi 20 - Siswati 1996 Bible

Kulwa kwema-Israyeli nemaSiriya

¹ Bheni Hadadi, inkhosi yaseSiriya, wahlomisa onkhe emabutfo akhe, asitwa ngemakhosi langema-32 labehamba ngemahhashi nangetincola temphi; wenyuka wayawuhlasela iSamariya, wayivimbetela.

² Watfumela titfunywa edolobheni ku-Ahabi, inkhosi yaka-Israyeli, watsi: “Inkhosi Bheni Hadadi itsi:

³ ‘Isiliva yakho negolide yakho kwami, kanye nebafati bakho labahle kakhulu nebantfwabakho labahle kakhulu bami.’ ”

⁴ Inkhosi yaka-Israyeli yaphendvula, yatsi: “Kunjengobe usho, nkhosi yami, mine nako konkhe lenginako kwakho.”

⁵ Titfunywa taphindze tabuya futsi, tafike tatsi: “Inkhosi Bheni Hadadi itsi: ‘Ngitfumele ngatsi letsa isiliva yakho, negolide yakho, nebafati bakho kanye nebantfwabakho.

⁶ Kodvwa kusasa, ngalesikhatsi, ngitawutfumela tindvuna tami titewufunisisa lapho esigodlweni sakho nasetindlini tetindvuna takho. Titakuchwaga konkhe lokungemagugu akho, tihambe nako.’ ”

⁷ Inkhosi yaka-Israyeli yabita bonkhe baholi belive layo yakhuluma kubo, yatsi: “Niyabona kambe kutsi lomuntfu ufuna kususa lutfutfuva! Utsite nakatfumela afuna bafati bami, nebantfwabami, nesiliva yami, negolide yami, mine angikamaleli.”

⁸ Baholi nebantfu bonkhe baphendvula, batsi: “Ungamlaleli, futsi ungakwenti loko lakushoko.”

⁹ Ngako Ahabi waphendvula titfunywa tenkhosi Bheni Hadadi, watsi: “Tjelani inkhosi yami kutsi ngitsi: ‘Inceku yakho itawukwenta konkhe loko lokufune kucala, kodvwa loku losewukufuna nyalo ngingeke ngikuvume.’ ” Titfunywa tatsatsa lemphendvulo tayibuyisela enkhosini Bheni Hadadi.

¹⁰ Bheni Hadadi watfumela lomunye umlayeto ku-Ahabi atsi: “Ngitakuta nemadvodza lenele kutsi ngitewubhubhisa lelidolobha lakho, lamadvodza atsatse leto timvutfu ngetandla tawo. Shangatsi bonkulunkulu bangangishaya ngife, nangehluleka kukufeza loko.”

¹¹ Inkhosi yaka-Israyeli yaphendvula, yatsi: “Nibomtjela kutsi saga sitsi: ‘Lowo lotewuhlasela akatigabatisi asengakalwi, kodvwa loko ukwenta emvakwemphi asalwile.’ ”

¹² Lomlayeto wefika enkhosini Bheni Hadadi asanatsa nalawa lamanye emakhosi emathendeni awo. Wavele watjela emabutfo akhe watsi: “Tilungiseleleni kuhlasela.” Ngako atilungiselela kuhlasela lelo dolobha.

¹³ Ngasona leso sikhatsi kwefika umphrofethi enkhosini Ahabi, watsi: “Simakadze utsi: ‘Uyayibona yini lemphi lenkhulu kangaka? Ngitayinikela esandleni sakho, kuze wati kutsi mine nginguSimakadze.’ ”

¹⁴ Ahabi wabuta watsi: “Kodvwa ngubani lotakwenta loko?” Lomphrofethi waphendvula watsi: “Simakadze utsi: ‘Loko kutakwentiwa tindvuna letincane letingaphansi kwetindvuna tetifundza.’ ” Ahabi wabuta watsi: “Ngubani lotawucala kucala kuhlasela?” Lomphrofethi waphendvula watsi: “Nguwe.”

¹⁵ Ngako Ahabi wabita tonkhe tindvuna letincane letingaphansi kwetindvuna tetifundza, taba ngemadvodza langema-232, asawonkhe. Wahlanganisa lamanye ema-Israyeli, wona aba ti-7 000 asawonkhe.

¹⁶ Baphuma emini kuyawuhlasela ngesikhatsi Bheni Hadadi nalamakhosi langema-32 labemsita, baselibele kutinklinkla ngetjwala emathendeni abo.

¹⁷ Letindvuna letincane letingaphansi kwetindvuna tetifundza taviva tona tayawuhlasela kucala. Bheni Hadadi abetfumele tinhloli letabuya tafike tambikela tatsi: “Kukhona emadvodza lavivako ashuca aphuma ngaseSamariya.”

¹⁸ Watsi: “Babambeni basaphila, nome beta ngekuthula nome bete ngemphi.”

¹⁹ Tindvuna letincane letingaphansi kwetindvuna tetifundza taphumela ngephandle kwelidolobha tilandzelwa ngemabutfo,

²⁰ ngulowo nalowo wabulala leyo ndvodza labelwa nayo. Atsi nakubona loko emaSiriya abaleka, ema-Israyeli awalandzela ngemuva awacosha. Kodvwa Bheni Hadadi, inkhosi yemaSiriya, wagibela lihhashi wabaleka nalamanye emadvodza akakhe nawo labegibele akawo.

²¹ Inkhosi yaka-Israyeli yasondzela yabhubhisa lamahhashi kanye netincola, yawashaya yawabhuca emaSiriya.

²² Emvakwaloko, umphrofethi waphindze wabuyela enkhosini yaka-Israyeli, wafike watsi: “Cinisa emabutfo akho, ubone kutsi kufanele wenteni, ngobe kulentfwasahlobo letako inkhosi yaseSiriya itawuphindze ibuye itekuhlasela futsi.”

Kuhlasela kwemaSiriya kwesibili

²³ Ngasona leso sikhatsi tindvuna tenkhosi yaseSiriya teluleka inkhosi, tatsi: “Bonkulunkulu babo bonkulunkulu bemagcuma. Ngiko nje babenemandla kakhulu kunatsi, badzimate basehlula. Kodvwa nasingalwa nabo sisematsafeni, nakanjani sitakuba nemandla kunabo.

²⁴ Yenta naku: Wesuse onkhe lamakhosi lapho aphetse ngakhona, bese ufaka letinye tindvuna etikhundleni tawo.

²⁵ Kufanele uphindze wakhe libutfo lelingangalelo lelakulahlekela, lihhashi ngelihhashi nencola ngencola, khona sitekulwa nalama-Israyeli ematsafeni. Nakanjani sitawuba nemandla kunawo.” Wativumela, wenta njengobe tatincomile.

²⁶ Entfwasahlobo lelandzelako Bheni Hadadi wahlomisa emaSiriya enyuka aya e-Afeki kuyakulwa nema-Israyeli.

²⁷ Nema-Israyeli atsi kube ahlome, atsatsa imiphako yawo, aphuma ayawuhlasela. Ema-Israyeli akamba aba ticumbi letimbili njengemihlambi lemibili yetimbuti abhekana nawo, kantsi emaSiriya wona abegcwele lonkhe lelo tsafa.

²⁸ Lomuntfu waNkulunkulu wefika wakhuluma enkhosini yaka-Israyeli, watsi: “Naku-ke lokushiwo nguSimakadze, utsi: ‘Njengobe emaSiriya acabanga kutsi Simakadze ungunkulunkulu wemagcuma, akasiye nkulunkulu wematsafa, yonkhe lemphi yawo ngitayinikela etandleni tenu, kuze nati kutsi mine nginguSimakadze.’ ”

²⁹ Kwaphela emalanga lasikhombisa emabutfo akambe abhekene, kwatsi ngelilanga lesikhombisa kwahlaselwana. Ema-Israyeli abulala emadvodza lahamba ngetinyawo labeti-100 000 emaSiriya ngalanga linye.

³⁰ Lawa lamanye avele abalekela edolobheni lase-Afeki, lapho atsi nakefika khona, lubondza lwalelo dolobha lwadzilikela etikwalababeti-27 000 bawo. Bheni Hadadi wabalekela edolobheni, wafike wabhaca ekamelweni lelalingekhatsi endlini.

³¹ Tindvuna takhe takhuluma kuye, tatsi: “Sesivile kutsi emakhosi endlu yaka-Israyeli anesihe. Asambe siye enkhosini yaka-Israyeli sivunule emasaka lapha elukhalweni sibophe tintsambo lapha etinhloko tetfu. Mhlawumbe angahle akusindzise angakubulali.”

³² Ngako bavunula emasaka etinkhalweni tabo, babopha tinhloko tabo ngetintsambo, bahamba baya enkhosini yaka-Israyeli bafike batsi: “Inceku yakho Bheni Hadadi itsi: ‘Ngicela kutsi ungangibulali.’ ” Inkhosi yaphendvula yatsi: “Usaphila yini? Phela ungumnaketfu.”

³³ Letindvuna taBheni Hadadi tashesha takutsatsa loko njengesibonakaliso sekwemukeleka, Ahabi nakatsi: “Yebo, Bheni Hadadi ungumnaketfu.” Ngako tasheshe tawaphindza lamavi latsi: “Yebo, Bheni Hadadi ungumnakenu!” Ahabi wakhuluma kuto, watsi: “Hambani nimlandze.” Watsi kube Bheni Hadadi efike, Ahabi wamcela kutsi ekhwele naye encoleni yakhe.

³⁴ Bheni Hadadi wakhuluma kuye, watsi: “Ngitakuwabuyisa onkhe lamadolobha latfunjwa ngubabe kuyihlo. Nawe ungatentela timakethe edolobheni laseDamaseko, njengobe nababe atenta eSamariya.” Ahabi waphendvula watsi: “Ngitakukhululela etikwalesivumelwane.” Ngako benta leso sivumelwane, wase uyamkhulula.

Kusolwa kwa-Ahabi ngumphrofethi

³⁵ Ngelivi laSimakadze lomunye wemadvodzana ebaphrofethi wakhuluma kulomunye umnganakhe, watsi: “Ngishaye ngalesikhali sakho,” kodvwa lomnganakhe wala.

³⁶ Ngako lomphrofethi watsi: “Njengobe ungakamlaleli Simakadze, utawutsi nawusuka lapha, libhubesi likubulale.” Yatsi lendvodza nayisuka ihamba, yakhandvwa libhubesi lelayibulala.

³⁷ Lomphrofethi wakhandza lenye indvodza lakhuluma kuyo watsi: “Ngicela ungishaye.” Ngako lendvodza yamshaya, yamlimata.

³⁸ Lomphrofethi wahamba wayakumela inkhosi eceleni kwendlela. Waphica umkhondvo ngekufaka ingadibe leyayisitselise emehlo.

³⁹ Yatsi inkhosi nayendlula, lomphrofethi wammemeta watsi: “Inceku yakho yangena ekhatsi nemphi, lomunye wase uletsa sitsa lesasitfunjiwe watsi: ‘Gadza lomuntfu, nakabaleka, loko utakukhokha ngemphilo yakho, nome-ke ukhokhe emakhilogremu langaba ngema-34 esiliva’,

⁴⁰ kodvwa ngenca yemisebenti bengiyenta lendvodza ibese iyanyamalala.” Inkhosi yaka-Israyeli yaphendvula, yatsi: “Ngiso leso sigwebo sakho, sewusishito.”

⁴¹ Lomphrofethi washesha wesusa lengadibe emehlweni akhe, inkhosi yambona kutsi ungulomunye webaphrofethi.

⁴² Wakhuluma enkhosini watsi: “Naku-ke lokushiwo nguSimakadze: ‘Sewukhulule lomuntfu bengitsite akafe, ngako loko utakukhokha ngemphilo yakho, nesive sakho sitawubhujiswa ngenca yekuyekela lamabutfo akakhe.’ ”

⁴³ Inkhosi yabuyela esigodlweni sayo eSamariya idvubutekile, ikhubekile.