1 Emakhosi 2 - Siswati 1996 Bible

Imiyalo yaDavide yekugcina kuSolomoni

¹ Kwatsi nase kusondzele sikhatsi saDavide sekufa, wabe sewuyala Solomoni, umsa wakhe,

² wakhuluma kuye watsi: “Sengitakufa njengebantfu bonkhe. Ngako cina, utibonakalise uyindvodza,

³ ucaphelisise konkhe lokushiwo nguSimakadze Nkulunkulu wakho: Hamba etindleleni takhe, ugcine timiso takhe, nemiyalo yakhe, nemitsetfo yakhe, netimfanelo takhe, njengobe kubhaliwe emtsetfweni waMosi, khona utawuchuma kuko konkhe lokwentako, nome ngukuphi lapho uya khona,

⁴ kuze naSimakadze asigcine setsembiso sakhe lasenta kimi nakatsi: ‘Nangabe titukulwane takho ticaphelisisa kutsi tiphila njani, nangabe futsi tihamba ngekwetsembeka embikwami ngayo yonkhe inhlitiyo nangawo wonkhe umphefumulo wato, ungeke umeswele umuntfu loyawuhlala esihlalweni sebukhosi saka-Israyeli.’

⁵ “Manje-ke, uyati kutsi Jowabe, umsa waSeruya, wentani kimi, nekutsi wentani kuletindvuna temphi letimbili bo-Abneri, umsa waNeri, na-Amasa, umsa waJetheri. Wababulala, wacitsa ingati yabo, kwaba shangatsi ngusemphini, kantsi bekusikhatsi sekuthula. Ngaleyo ngati yabo wabhoca ngayo libhande lakhe elukhalweni kanye neticatfulo takhe.

⁶ Yenta kuye njengekubona nekuhlakanipha kwakho, kodvwa ungamyekeli aze atifele ngekuthula.

⁷ “Kodvwa uboba nemusa kumadvodzana aBhazilayi wakaGileyadi, uwente abe ngulabanye balabo lotabodla nabo etafuleni lakho. Bema ngakimi bangisekela ngesikhatsi ngibalekela umnakenu Absalomu.

⁸ “Khumbula, kutsi unaShimeyi, umsa waGera, umBhenjamini waseBhahurimu, lowangicalekisa kabuhlungu mhlazana ngiya eMahanayimu. Watsi naketa kutengihlangabeta eJordane, ngafunga kuye ngaSimakadze ngatsi: ‘Ngingeke ngikubulale ngenkemba.’

⁹ Kodvwa nyalo, ungamtsatsi njengemuntfu lote licala. Wena uyindvodza lenekuhlakanipha; utawukwati kutsi utakwenta njani kuye; wena nje ciniseka kutsi uyabulawa.”

Kufa kwaDavide

¹⁰ Davide wase uyakhotsama, wangcwatjwa eDolobheni laDavide.

¹¹ Abesabuse sive sema-Israyeli iminyaka lengema-40. Iminyaka lesikhombisa abebusela eHebroni, kwatsi lengema-33 wabusela eJerusalema.

¹² Ngako Solomoni wahlala esihlalweni sebukhosi seyise Davide, kubusa kwakhe kwatinta.

Kufa kwa-Adoniya

¹³ Adoniya, umsa waHagithi, wahamba waya kuBhatisheba, unina waSolomoni. Bhatisheba wambuta, watsi: “Ute ngekuthula yini?” Waphendvula watsi: “Yebo, ngite ngekuthula.

¹⁴ Kukhona lengicela kukukhuluma kuwe.” Bhatisheba watsi: “Kulungile, ungakukhuluma.”

¹⁵ Watsi: “Njengobe wati, umbuso bekungewami. Israyeli wonkhe abesabheke kimi kutsi ngiyinkhosi yakhe. Kodvwa tintfo tajika, umbuso watsatfwa ngumnaketfu, ngobe lowo mbuso yena uwunikwe nguSimakadze.

¹⁶ Manje sengicela intfo yinye kuwe. Ngicela ungali.” Watsi: “Kulungile, ungakhuluma.”

¹⁷ Wachubeka watsi: “Ngicela ungicelele inkhosi Solomoni, ngobe angeke ale kuwe, ungicelele kutsi anginike Abishagi, waseShunemu, kutsi atewuba ngumkami.”

¹⁸ Bhatisheba wamphendvula, watsi: “Kulungile, ngitakukhulumela enkhosini.”

¹⁹ Watsi Bhatisheba nakaya enkhosini Solomoni kuyawukhulumela Adoniya, inkhosi yasukuma yamhlangabeta, yamkhotsamela, yase ihlala phansi esihlalweni sayo sebukhosi. Bekanesihlalo sebukhosi lesasiletselwe unina, lafike wahlala kuso, ngesekudla senkhosi.

²⁰ Bhatisheba wakhuluma watsi: “Nginesicelo lesincane lengicela kusetfula kuwe, ngicela ungemukele.” Inkhosi yaphendvula yatsi: “Kulungile, make, setfule; ngiyakwemukela.”

²¹ Wase utsi: “Mane utsatse Abishagi, waseShunemu, umnike Adoniya, umnakenu, ashade naye.”

²² Inkhosi Solomoni yaphendvula unina yatsi: “Umcelelani Abishagi, waseShunemu, kutsi abe ngumka-Adoniya? Ungamane sale umcelela bukhosi. Empeleni ungumnaketfu lomdzala, kantsi futsi na-Abiyatha, umphristi, kanye naJowabe, umsa waSeruya, bangakuye!”

²³ Inkhosi Solomoni yafunga ngaSimakadze, yatsi: “Shangatsi Nkulunkulu angangishaya ngife, nangabe Adoniya angakakhokhi ngekuphila kwakhe ngalesicelo lasentile!

²⁴ Ngifunga kuphila kwaSimakadze longuyena angimise esihlalweni sebukhosi sababe Davide, setsembiso sakhe usigcinile, wase ungipha umbuso mine kanye netitukulwane tami. Yebo, ngifunga kuphila kwaSimakadze kutsi Adoniya utakufa lamuhla loku!”

²⁵ Ngako inkhosi Solomoni yatfumela Bhenaya, umsa waJehoyada, waya ku-Adoniya, wafike wambulala.

Kudzingiswa kwa-Abiyatha nekufa kwaJowabe

²⁶ Inkhosi Solomoni yakhuluma ku-Abiyatha, umphristi, yatsi: “Ncandzeka, ubuyele ekhaya kini e-Anathothi. Kufanele ufe, kodvwa ngingeke ngikubulale nyalo, ngobe wetfwala libhokisi lesivumelwane saSimakadze Somandla embikwababe, Davide, wabambisana nababe kuto tonkhe tinkinga takhe.”

²⁷ Solomoni wase ukhipha Abiyatha esikhundleni sebuphristi baSimakadze, ngako lagcwaliseka kanjalo livi laSimakadze labelikhulume eShilo ngemndeni wa-Eli.

²⁸ Jowabe weva ngaloko lekwase kwentekile. Jowabe abedudene na-Adoniya, noko akazange ahambisane na-Absalomu. Jowabe wabaleka waya ethendeni lebukhona baSimakadze, wafike wankonkoshela timphondvo telilati.

²⁹ Inkhosi Solomoni yeva kutsi Jowabe abesabalekele ethendeni laSimakadze, wafike wankonkoshela lilati. Ngako Solomoni watfumela Bhenaya, umsa waJehoyada, watsi kuye: “Hamba, ufike umbulale!”

³⁰ Ngako Bhenaya wangena ethendeni laSimakadze, wafike watsi kuye: “Inkhosi itsi: ‘Phuma!’ ” Kodvwa waphendvula watsi: “Cha, ngitawufela lapha.” Bhenaya wahamba wayawubika enkhosini, watsi: “Jowabe ungiphendvule kanjena.”

³¹ Inkhosi yatfumela Bhenaya yatsi: “Yenta njengobe asho. Mbulale, bese uyamngcwaba, khona kungetiwuba khona nome munye endlini yababe loyawuba nelicala lengati lengenacala ngalabantfu lababulawa nguJowabe.

³² Simakadze utamkhokhisa lengati layicitsa; ngaphandle kwemvume yababe Davide, wabulala emadvodza lamabili ngenkemba. Bobabili, bo-Abneri, umsa waNeri, indvuna yemphi yaka-Israyeli, na-Amasa, umsa waJetheri, indvuna yemphi yakaJuda, babencono, bacotfo kakhulu kunaye.

³³ Shangatsi licala lekucitfwa kwengati yabo lingaba setikwenhloko yaJowabe nasetitukulwane takhe phakadze naphakadze; kodvwa Davide netitukulwane takhe, nendlu yakhe, nesihlalo sakhe sebukhosi kuyakuba nekuthula kwaSimakadze phakadze naphakadze.”

³⁴ Ngako Bhenaya, umsa waJehoyada, wahamba wafike wabulala Jowabe; wangcwatjwa eveni lakhe, ehlane.

³⁵ Inkhosi yabeka Bhenaya, umsa waJehoyada, kutsi aphatse umbutfo esikhundleni saJowabe, kwase kutsi esikhundleni sa-Abiyatha wabeka Sadoki, umphristi.

Kufa kwaShimeyi

³⁶ Inkhosi yatfumela kuShimeyi umlayeto lotsi: “Takhele indlu eJerusalema uhlale khona, kodvwa ungacali uye kulenye indzawo.

³⁷ Mhlazana waphuma nje wewela Sigodzi saseKhidroni, ubovele wati kutsi utakufa; licala lengati yakho liyawubasetikwakho.”

³⁸ Shimeyi waphendvula inkhosi, watsi: “Loko lokushoko kuhle kakhulu, nkhosi. Inceku yakho itakwenta loko lokushiwo yinkhosi.” Shimeyi wahlala eJerusalema sikhatsi lesidze.

³⁹ Kodvwa emvakweminyaka lemitsatfu, tigcili takhe letibili teca tabalekela kumsa waMakha, longu-Akhishi, inkhosi yaseGathi. Shimeyi watjelwa kwatsiwa: “Tigcili takho tiseGathi.”

⁴⁰ Watsi kube akuve loko, wekhweta sihlalo embongolweni yakhe wagibela kuyo waya ku-Akhishi eGathi, kuyawufuna letigcili takhe. Ngako Shimeyi waya eGathi, walandza letigcili takhe wabuya nato.

⁴¹ Kwatsi kube Solomoni abikelwe kutsi Shimeyi sewusukile eJerusalema waya eGathi, nekutsi sewubuyile,

⁴² inkhosi yabita Shimeyi, yatsi kuye: “Angizange ngikufungise ngaSimakadze yini, ngakuyala ngatsi: ‘Mhlazana waphuma waya kulenye indzawo, ubovele wati kutsi utakufa’? Ngaleso sikhatsi wakhuluma kimi, watsi: ‘Loko lokushoko kuhle. Ngitakwenta.’

⁴³ Manje-ke, awusekasigcini ngani leso sifungo sakho kuSimakadze, ugcine lomyalo lengakunika wona?”

⁴⁴ Inkhosi yachubeka yakhuluma kuShimeyi, yatsi: “Nawe uyakwati enhlitiyweni yakho konkhe lokubi lowakwenta kubabe Davide. Manje-ke Simakadze utakukhokhela ngaloko lokubi lowakwenta.

⁴⁵ Kodvwa inkhosi Solomoni itawubusiswa, nesihlalo sebukhosi saDavide siyawuhlala siphephile ngaSimakadze phakadze naphakadze.”

⁴⁶ Inkhosi yase itfuma Bhenaya, umsa waJehoyada, waphumela ngephandle wafike wagadla kuShimeyi wamlahla phansi; wafa. Umbuso wonkhe wasima ngalokuphelele etandleni taSolomoni.