1 Emakhosi 13 - Siswati 1996 Bible

Umuntfu waNkulunkulu labechamuka kaJuda

¹ Ngelivi laSimakadze kwefika umuntfu waNkulunkulu eBetheli aphuma kaJuda, Jerobowamu aseme eceleni kwelilati kutekwenta umhlatjelo.

² Lomuntfu wakhala asola lilati ngekuyalwa nguSimakadze, watsi: “Maye, lilati! Lilati! Naku lokukhulunywa nguSimakadze: ‘Indvodzana letakutsiwa nguJosaya libito layo, itawutalwa emndenini waDavide. Etikwakho utakwenta umhlatjelo ngebaphristi labakhonta bonkulunkulu etindzaweni letiphakeme, bona laba labenta umnikelo lapha etikwakho, ematsambo ebantfu atawushiselwa lapha etikwakho.’ ”

³ Ngasona leso sikhatsi lomuntfu waNkulunkulu wabanika sibonakaliso watsi: “Nasi-ke sibonakaliso lesetfulwa nguSimakadze: Lelilati litawuchekeka ekhatsi, umlotsa losetikwalo ucitseke.”

⁴ Yatsi kube inkhosi, Jerobowamu, ive loko lokwakukhulunywa ngulomuntfu waNkulunkulu ngelilati lelalilapho eBetheli, yelula sandla sayo, yamkhomba, yatsi: “Mbambeni!” Kodvwa lomkhono leyayiwelulile ikhomba ngawo lomuntfu waNkulunkulu womelela, wangabe usagobana.

⁵ Nalelilati lachekeka ekhatsi, umlotsa walo wacitsekela phansi, kwaya njengaleso sibonakaliso lesasetfulwe ngulomuntfu waNkulunkulu, kwaya njengekwelivi laSimakadze.

⁶ Inkhosi yakhuluma kulomuntfu waNkulunkulu, yatsi: “Ngicela ungincusele kuSimakadze, Nkulunkulu wakho, ungithandazele, khona atewuphilisa lomkhono wami.” Kwatsi lomuntfu waNkulunkulu nakamncusela kuSimakadze, umkhono wenkhosi Jerobowamu waphiliswa, waba njengakucala futsi.

⁷ Inkhosi yakhuluma kulomuntfu waNkulunkulu, yatsi: “Wota sambe siye ekhaya lami utewutfola lokudliwako, ngitabe sengikunika nesipho.”

⁸ Kodvwa lomuntfu waNkulunkulu waphendvula lenkhosi, watsi: “Nome ngabe bewutanginika incenye yaloko lonako, bengingeke ngihambe nawe, futsi bengingeke ngidle nekudla, nginatse nemanti akakho,

⁹ ngobe ngiyalwe livi laSimakadze, latsi: ‘Akukafaneli ukudle ngisho nekudla kwakhona, ungawanatsi ngisho nemanti akhona, futsi ungancandzeki ngalendlela lote ngayo.’ ”

¹⁰ Ngako-ke wancandzeka ngalenye indlela, wayiyekela lena labete ngayo lapha eBetheli.

Umphrofethi lomdzala waseBetheli

¹¹ Kwakukhona umphrofethi lotsite lomdzala labehlala lapha eBetheli. Ngalelo langa kwefika emadvodzana akakhe amtekela ngako konkhe loko lokwase kwentiwe ngulomuntfu waNkulunkulu eBetheli. Bamtjela nekumtjela uyise konkhe labekukhulume enkhosini Jerobowamu.

¹² Uyise wawabuta watsi: “Uhambe ngayiphi indlela?” Emadvodzana akhe amkhombisa leyo ndlela labehambe ngayo umuntfu waNkulunkulu, labephume kaJuda.

¹³ Ngako wakhuluma kumadvodzana akhe, watsi: “Bophelani sihlalo embongolweni yami.” Batsi kube babophele sihlalo embongolweni yakhe, wagibela, wahamba

¹⁴ walandzela lomuntfu waNkulunkulu. Wamkhandza ahleti ngaphansi kwesihlahla lesikhulu sem-okhi, wafike wambuta watsi: “Wena unguye yini lomuntfu waNkulunkulu labephuma kaJuda?” Waphendvula watsi: “Nginguye.”

¹⁵ Lomphrofethi-ke wakhuluma kuye, watsi: “Wota sambe siye ekhaya uyewutfola lokudliwako.”

¹⁶ Kodvwa lomuntfu waNkulunkulu waphendvula, watsi: “Ngingeke ngincandzeke ngibuyele nawe emuva, kantsi futsi ngingeke ngidle kudla nawe nome nginatse nawe emanti kulendzawo.

¹⁷ Ngiyalwe nguSimakadze watsi: ‘Kufanele ungakudli kudla, ungawanatsi nemanti akhona, ngisho nendlela lote ngayo ungabuyi ngayo.’ ”

¹⁸ Nalomphrofethi lomdzala waphendvula, watsi: “Nami futsi ngingumphrofethi njengawe. Ingilosi ikhulume kimi ngelivi laSimakadze, yatsi: ‘Mlandze, ute naye lapha kakho, khona atekudla kudla, anatse nemanti.’ ” Kodvwa abecala emanga.

¹⁹ Ngako lomuntfu waNkulunkulu wancandzeka naye wayakudla naye, wanatsa naye endlini kakhe.

²⁰ Batsi basehleti etafuleni badla, livi laSimakadze lefika kulomphrofethi lomdzala labencandze lomuntfu waNkulunkulu.

²¹ Wamemeta, akhuluma kulomuntfu waNkulunkulu labephuma kaJuda, watsi: “Naku lokushiwo nguSimakadze: ‘Njengobe ungakamlaleli Simakadze, ngekutsi wente umyalo Simakadze Nkulunkulu wakho lakunike wona,

²² kodvwa uncandzekile, wafike wadla wanatsa, lapho bekungakafaneli kutsi udle unatse khona, sidvumbu sakho singeke singcwatjwe lapho kwafihlwa khona boyihlomkhulu.’ ”

²³ Watsi kube lomuntfu waNkulunkulu acedze kudla nekunatsa, lomphrofethi labemncandzekisile wamlungiselela imbongolo yakhe.

²⁴ Watsi asahamba endleleni, wahlangana nelibhubesi, lambamba lambulala, sidvumbu sakhe sadzilikela phansi emgwacweni, lembongolo nalelibhubesi kwema eceleni kwesidvumbu.

²⁵ Bantfu lababendlula ngakhona lapho basibona lesidvumbu siphansi, nelibhubesi lime eceleni kwaso, base bayahamba bayawubika edolobheni, lapho bekuhlala khona lomphrofethi lomdzala.

²⁶ Watsi lomphrofethi lamncandza endleleni kube akuve loko, watsi: “Ngulomuntfu waNkulunkulu longalilalelanga livi laSimakadze, Simakadze umnikele kulelibhubesi lelimdladlabule lambulala, njengobe livi laSimakadze belimcaphelisile.”

²⁷ Lomphrofethi wakhuluma kulamadvodzana akhe, watsi: “Ase ningekhwetele sihlalo embongolweni ngitewuhamba,” nembala bamlungisela.

²⁸ Waphuma wahamba, wakhandza leso sidvumbu sidzindzibele endleleni, lembongolo nalelibhubesi kume eceleni kwaso. Lelibhubesi belingakasidli lesidvumbu, kantsi futsi nalembongolo belingakayidzabuli.

²⁹ Lomphrofethi wasicukula lesidvumbu salomuntfu waNkulunkulu, wasekhweta embongolweni, wabuyela naso emuva edolobheni lakubo, kutsi atemlilela, bese uyamngcwaba.

³⁰ Lesidvumbu wasingcwaba ethuneni lakhe, bamlilela batsi: “Hhawu, mnaketfu!”

³¹ Watsi kube amngcwabe, wakhuluma kumadvodzana akhe, watsi: “Nase ngifile, nibongingcwaba kulo lelithuna, lapho kungcwatjwe khona lomuntfu waNkulunkulu; ematsambo ami nibowabeka eceleni kwematsambo akhe.

³² Ngobe lomlayeto lawukhuluma ngelivi laSimakadze macondzana nelilati laseBetheli kanye nato tonkhe tindzawo letiphakeme tekukhonta letisemadolobheni aseSamariya, nakanjani utakwenteka.”

Sono saJerobowamu

³³ Ngisho nome sekwenteke loku, Jerobowamu akazange aphendvuke etindleleni takhe letimbi, kodvwa wachubeka wabeka baphristi bekukhonta etindzaweni letiphakeme tekukhontela, abekhetsa nome ngumuphi umuntfu labefisa kuba ngumphristi, amehlukanisele indzawo lephakeme yekukhonta.

³⁴ Lesi kwaba sono sendlu yakaJerobowamu lokungusona sabangela kutsi indlu yakhe yonkhe ibhubhe iphele ingasabikho emhlabeni.