1 Emakhosi 1 - Siswati 1996 Bible

Davide ebudzaleni bakhe

¹ Ngesikhatsi inkhosi Davide asamdzala kakhulu asakhulile ngeminyaka, abesahlala ngekuva emakhata, angasafutfumali, kwale nome tisebenti takhe setimembesa ngetingubo.

² Ngako tinceku takhe takhuluma kuye, tatsi: “Ake simane sifunele inkhosi litjitji lelitakuyinakekela liyonge, lilale eceleni kwayo, kuze inkhosi itfole kufutfumala.”

³ Tinceku tafuna litjitji lelihle kulo lonkhe laka-Israyeli, taze tatfola Abishagi, labewaseShunemu, tamtsatsa tamletsa enkhosini.

⁴ Lelitjitji lalilihle kakhulu; lavele layinakekela inkhosi, layonga, lahlala nayo, kodvwa inkhosi ayizange ilale nalo.

Kutibeka kwa-Adoniya

⁵ Adoniya, unina wakhe labenguHagithi, watibeka embili watsi: “Ngimi lotawuba yinkhosi.” Ngako walungisa tincola nemahhashi, kanye nemadvodza langema-50 ekugijima embikwakhe.

⁶ Uyise Davide abengazange amekhute, ambute nekumbuta atsi: “Uyentelani lentfo lenjana?” Adoniya abemuhle kakhulu, elama Absalomu.

⁷ Adoniya wakhuluma naboJowabe, unina labenguSeruya, kanye na-Abiyatha, umphristi; nabo bamsekela.

⁸ Kodvwa boSadoki, umphristi, naBhenaya, umsa waJehoyada, naNathani, umphrofethi, naShimeyi, naReyi, kanye nabomahlalesangweni belikhetselo baDavide abazange batihlanganise na-Adoniya.

⁹ Adoniya wanikela ngetimvu, nangetinkhomo, nangematfole labekhuluphele eTjeni laZohelethi, edvute na-Eni Rogeli. Wamema bonkhe bomnakabo, bantfwabenkhosi, kanye nawo onkhe emadvodza akaJuda labetindvuna tenkhosi,

¹⁰ kodvwa akazange abameme boNathani, umphrofethi, naBhenaya, nabomahlalesangweni belikhetselo, naSolomoni, umnakabo.

Kubekwa kwaSolomoni

¹¹ Ngako Nathani wabuta Bhatisheba, unina waSolomoni, watsi: “Awukeva yini kutsi Adoniya, lotalwa nguHagithi, sewutibeke inkhosi, inkhosi yetfu Davide ingati.

¹² Manje-ke ase ngikweluleke kutsi imphilo yakho neyaSolomoni, indvodzana yakho, ungayisindzisa kanjani.

¹³ Hamba uyewungena enkhosini Davide, ufike ukhulume kuye utsi: ‘Nkosi yami, awuzange ufunge yini kimi, mine ncekukati yakho, watsi: “Impela Solomoni, indvodzana yakho, iyawuba yinkhosi emvakwami, ihlale esihlalweni sami sebukhosi”? Pho, sekwenteke kanjani manje kutsi Adoniya bese uba yinkhosi?’

¹⁴ Utawutsi uselapho ukhuluma nenkhosi, ngite nami ngingene ngitewucinisa loko bewukusho.”

¹⁵ Ngako Bhatisheba wahamba wayawubona inkhosi leyase igugile ekamelweni layo, lapho Abishagi, waseShunemu, abeyinakekela ayongela khona.

¹⁶ Bhatisheba wakhotsama waguca embikwenkhosi. Inkhosi yambuta yatsi: “Ufunani?”

¹⁷ Wakhuluma kuyo watsi: “Nkhosi yami, wena, cobo lwakho, wafunga kimi, mine ncekukati yakho, ngaSimakadze Nkulunkulu wakho, watsi: ‘Solomoni, indvodzana yakho, uyawuba yinkhosi emvakwami, ahlale esihlalweni sami sebukhosi.’

¹⁸ Kodvwa manje Adoniya sewuyinkhosi, kodvwa inkhosi yami ayikwati loko.

¹⁹ Sewente umhlatjelo ngetinkhomo letinyenti, nangematfole lakhuluphalisiwe, nangetimvu letinyenti, wamema bonkhe bantfwabenkhosi, na-Abiyatha, umphristi, naJowabe, indvuna yemphi, kodvwa akammemi Solomoni, inceku yakho.

²⁰ Nkhosi yami, onkhe emehlo aka-Israyeli abuke wena, kutsi atekuva kuwe kutsi ngubani lotawuhlala esihlalweni sebukhosi senkhosi yami, abe yinkhosi emvakwayo.

²¹ Ngaphandle kwaloko, inkhosi itawutsi ingahamba iye kubakubo, mine nendvodzana yami, Solomoni, sitawuphatfwa njengemavukelambuso.”

²² Watsi asakhuluma nenkhosi, kwefika Nathani, umphrofethi.

²³ Base babikela inkhosi, batsi: “Kukhona umphrofethi Nathani, lapha ngephandle.” Ngako Nathani waya wangena enkhosini, wefika wakhotsama abhekise buso bakhe phansi.

²⁴ Nathani wakhuluma watsi: “Nkhosi, ngitewubuta kutsi Adoniya sewumbeke kuba yinkhosi yini emvakwakho, nekutsi sewutawuhlala esihlalweni sakho sebukhosi yini?

²⁵ Lamuhla nje Adoniya sewehlile wayakwenta umhlatjelo ngetinkhomo letinyenti, nangematfole lakhuluphalisiwe, nangetimvu letinyenti. Umeme bonkhe bantfwabenkhosi, netindvuna temphi, na-Abiyatha, umphristi. Manje nje bayadla banatsa naye, batsi: ‘Lunwele loludze! Nkhosi Adoniya!’

²⁶ Kodvwa mine, nceku yakho, naSadoki, umphristi, naBhenaya, umsa waJehoyada, kanye nenceku yakho, Solomoni, akasimemi.

²⁷ Kungabe loku kwentiwe yinkhosi yami yini ingasatitjeli netinceku tayo kutsi ngubani lotawuhlala esihlalweni sebukhosi senkhosi yami abe yinkhosi emvakwayo?”

²⁸ Davide, inkhosi, wakhuluma watsi: “Bitani Bhatisheba asondzele.” Ngako wasondzela, wema embikwenkhosi.

²⁹ Inkhosi yenta sifungo yatsi: “Ngifunga kuphila kwaSimakadze, longikhulule kuto tonkhe tinhlupheko tami,

³⁰ lamuhla ngitasigcina leso setsembiso lengasenta kuwe egameni laSimakadze Nkulunkulu wema-Israyeli, kutsi Solomoni, indvodzana yakho, nguye lotawuba yinkhosi emvakwami, ahlale esihlalweni sami sebukhosi esikhundleni sami.”

³¹ Ngako Bhatisheba wakhotsamisa buso bakhe wabubhekisa phansi, waguca embikwenkhosi, watsi: “Shangatsi inkhosi yami Davide angaphila phakadze!”

³² Davide, inkhosi, wakhuluma watsi: “Ngenisani boSadoki, umphristi, naNathani, umphrofethi, kanye naBhenaya, umsa waJehoyada.” Batsi kube befike embikwenkhosi,

³³ yakhuluma kubo yatsi: “Tsatsani tinceku tenkhosi yenu, nigibelise Solomoni, indvodzana yami, etikwemnyuzi wami, nimsingatse nehle naye, niye eGihoni.

³⁴ Nitawutsi ningefika lapho, boSadoki, umphristi, naNathani, umphrofethi, batawube sebayamgcoba, bambeke abe yinkhosi etikwema-Israyeli. Nibobe senishaya kakhulu impalampala, nimemete nitsi: ‘Lunwele loludze! Nkhosi Solomoni!’

³⁵ Nitawube senenyuka naye; nguye lotakuta atewuhlala esihlalweni sami sebukhosi, abuse esikhundleni sami. Sengimbeke inkhosi etikwa-Israyeli naJuda.”

³⁶ Bhenaya, umsa waJehoyada, waphendvula inkhosi, watsi: “Amen! Akube njalo! Shangatsi loko Simakadze, Nkulunkulu wenkhosi yami, lakushoko kungaba njalo!

³⁷ Njengobe Simakadze abenenkhosi yami, shangatsi angaba naye naSolomoni, khona atekwenta sihlalo sakhe sebukhosi sibe sikhulu kakhulu kunesihlalo sebukhosi senkhosi yami, inkhosi Davide!”

³⁸ Ngako boSadoki, umphristi, naNathani, umphrofethi, naBhenaya, umsa waJehoyada, nemaKherethi kanye nemaPhelethi behla bagibelise Solomoni etikwemnyuzi wenkhosi Davide, bamsingatsa baya naye eGihoni.

³⁹ Sadoki, umphristi, watsatsa luphondvo lwemafutsa ethendeni lelingcwele, wagcoba ngawo Solomoni. Base bashaya impalampala, bonkhe bantfu bamemetela batsi: “Lunwele loludze! Nkhosi Solomoni!”

⁴⁰ Bonkhe bantfu benyuka bamlandzela, bashaya nemintjingozi bajabule kakhulu, kwaze kwanyakata ngisho nemhlaba ngenca yemsindvo.

⁴¹ Adoniya kanye nato tonkhe timenywa takhe bakuva loko, lapho sebacedzela kudla lidzili labo. Batsi kube beve kukhala kwempalampala, Jowabe wabuta watsi: “Wani lomsindvo longaka losedolobheni?”

⁴² Watsi asakhuluma nje, kwefika Jonathani, umsa wa-Abiyatha, umphristi. Adoniya watsi: “Ngena. Indvodza leyetsembeke njengawe ifanele kuta netindzaba letimnandzi.”

⁴³ Jonathani waphendvula, watsi: “Cha, kute lokumnandzi! Inkhosi yetfu Davide sewubeke Solomoni kutsi abe yinkhosi.

⁴⁴ Inkhosi itfumele boSadoki, umphristi, naNathani, umphrofethi, naBhenaya, umsa waJehoyada, nemaKherethi kanye nemaPhelethi, bamgibelisa emnyuzini wayo inkhosi.

⁴⁵ BoSadoki, umphristi, naNathani, umphrofethi, sebamgcobe eGihoni kutsi abe yinkhosi. Besuke lapho ngekujabula, lidolobha nalo lananatela loko kujabula. Nguwo nje lomsindvo leniwuvako.

⁴⁶ Ngetulu kwaloko Solomoni sewutsetse indzawo yakhe esihlalweni sebukhosi;

⁴⁷ ngisho netindvuna tasebukhosini setifikile kutawuhalalisela inkhosi yetfu, Davide, tafike tatsi: ‘Shangatsi Nkulunkulu wakho angenta libito laSolomoni lidvume, latiwe kakhulu kunelakho, nesihlalo sakhe sebukhosi sibe sikhulu kakhulu kunesakho!’ Nenkhosi ivele yakhotsama khona embhedzeni wayo,

⁴⁸ yatsi: ‘Akadvunyiswe Simakadze, Nkulunkulu wema-Israyeli, lovumele emehlo ami kutsi lamuhla abone lowo longilandzelako esihlalweni sami sebukhosi!’ ”

⁴⁹ Tonkhe timenywa ta-Adoniya tatsi kube tikuve loko, tetfuka tatfutfumela, tasakateka, kwaba ngulowo nalowo wabaleka ngendlela yakhe.

⁵⁰ Kodvwa Adoniya, ngekwesaba lokukhulu labekuko ngaSolomoni, wesuka lapho wayawunkonkoshela timphondvo telilati.

⁵¹ Solomoni watjelwa ngaleyo ndzaba, kwatsiwa: “Adoniya wesaba inkhosi Solomoni, sewunkonkoshele timphondvo telilati, utsi: ‘Inkhosi Solomoni ayifunge kimi lamuhla kutsi inceku yakhe angeke ayibulale ngenkemba.’ ”

⁵² Solomoni waphendvula, watsi: “Nangabe phela atibonakalisa ayindvodza leyetsembekile, ngisho nelunwele lunye lwenhloko yakhe lungeke luwele phansi; kodvwa nakutfolakala lokubi kuye, utakufa.”

⁵³ Ngako Solomoni, inkhosi, watfumela emadvodza, afike amehlisa elatini. Adoniya weta wafike wakhotsama phansi embikwaSolomoni; Solomoni, inkhosi, wakhuluma kuye watsi: “Hamba ubuyele ekhaya lakho.”