Jacques 5 - Gisir

Gunwerise bikiti

¹ Sige nyulilu anu, yenu bikiti, lile anu, bime anu gukyelu mvange tsi gunurugile.

² Bukiti bu enu bubole, bidwaru bi enu byasyegu ne misobu.

³ Menive menu me kunge ne putu mabase ne mali. Mali mane mbeyi gu yenu beni, me gunyenze nyuru tsi enu gere ruvi. Nusegukige menive lavane tsufu tsi disukisilu.

⁴ Labe anu divane di bedyanzitsi be byambe bi enu, nusebuse bevege! Bagwanuni gukyelu enu. Mifundu mi awu myavuduge kwange gu maru me Nyambi, Fumu gori tsi nzambi.

⁵ Mu bulongu bubu, nutsibe ne busine ne mbili migangu, nusevage motsu me nuseronde. Nutsevonge gere bibulu byabegu gweboku.

⁶ Nusekilige batu be sandi ne mbele, nusebeboke, besagagene.

Guvingile ne gitu tugu yi Fumu

⁷ Bane be Nyambi, vingile anu ne gitu kwange Fumu gurugile. Labe anu neve muvaritsi gavingilili bivaru birege gwele, kwange bi disukisilu.

⁸ Yenu gwandi vingile anu, base anu ne karu, mbare tugu yi Fumu yikebeli.

⁹ Bane be Nyambi nuyagwanune yenu ne yenu, nutsatse tabulilu bumbanze ne Nyambi. Nzonzi ke vane, ake ve mune ndagu!

¹⁰ Bane be Nyambi, bange anu ne bebigitsi bambile mu dine di Fumu, besindile mukengu ne gitu.

¹¹ Labe anu, batu bagageni mu meguge, dwagwambili re bene muyangu. Nulu gilombi gi Sob, mutu wuvingile ne gitu. Nwayabi gi Nyambi muvege gu disukisilu. Yi, Fumu base ne ndembu ne gigebe.

¹² Gulu gulu, bane be Nyambi, nuyaleve mu dine di nzambi, mu dine di butambe, nesi mu kepagere givave. Gusinge gu agu ke vane gusinge, gubuse gu agu ke vane gubuse. Nonge nukole gube mu bumbanze bu Nyambi.

Ngudu dulembu

¹³ Ve gari enu, ve mutu wakengi? Alembi. Ve mutu wune muyangu? Ayimbi nimbu tsi Fumu.

¹⁴ Ve mutu wabeli ve gari enu? Arombi bivunde bi dibundu, begumwitile matsi, begulembe Nyambi gukyelu andi mu dine di Fumu.

¹⁵ Gere beselembe ne gitu, ndembu yine yigubeluse gibedu. Fumu gumurelige. Gere asevage mabi Nyambi gumunyese.

¹⁶ Fungule anu mabi menu yenu ne yenu, lembe anu gukyelu mbatsi, mbatsi gwandi alembi gukyelu agu, nonge nuke beluge. Ndembu yi mutu wusungeme yine ndure.

¹⁷ Eli abe mutu munongumosi ne yetu. Agwarise gulembe nonge mvule yitsatse noge, gusenoge mvule mu butambe mu mipume mireru ne girini.

¹⁸ Negukunde lembe nyongu mosi, nzambi negunogise mvule, butambe negubendise bivaru.

¹⁹ Bane be Nyambi, ve gari enu gere mutu marageme ne bureti, gere wumosi mamugabuse,

²⁰ yabe anu re awagusuli muvagitsi mabi mu nzile paru, agamukani monyu ne gubunzule mbili mabi.