Jacques 4 - Gisir

Bambemanu ne Nyambi

¹ Mebadi ne mibokunu myarugili gu ve gari enu? Myarugili mu puse tsi enu tsibi tsyagubeni gu gari tsi enu.

² Nune puse ne givave gi nusabenze denge. Vane beli guboke. Nuke ne bungusu nusabenze denge gi nwarondi, vane nwagageni nwagubeni. Nusandi ne gi nwarondi, mbare nusakivuli Nyambi.

³ Gere nwagwivuli nusadengi mbare nivu tsi enu tsi sandi tsiboti, nwagwivuli ke gukyelu gunonze puse tsi enu tsibi.

⁴ Nwafudi Nyambi gere mugetu watubi disongi! Nusayabi re guronde bulongu, guvine Nyambi? Awarondi gube mbatsi bulongu ayi mbeni yi Nyambi.

⁵ Nwayabi re gukulegeni direndu re Nyambi sarondi givale gu Dinyuni di aduvege.

⁶ Tumbe gyesi gi Nyambi gaduvegi gi gineni, neve direndu re «Nyambi galimbuli bisi dunangu, tumbe agagwaguli ne gyesi bisi dilembitogu.»

⁷ Kabe gobise anu Nyambi, gagene anu ne Mbeni agurageme nenu.

⁸ Bambeme anu ne Nyambi, agubambeme nenu. Gunge anu mekake menu, bevagitsi mabi, sungige anu mirime mi enu mine mbili pasi!

⁹ Rangemine anu mukengu enu, lile anu, nyonge anu. Gisyevu gi enu gi kalugi metsange, sige muyangu enu wubi munyongu.

¹⁰ Kuteme anu ve wusu Fumu, agunurelige!

Nuyabe nzonzi bembatsi

¹¹ Bane be Nyambi, nuyagelesene yenu ne yenu. Awageli mbatsi, ne wakwevagi nzonzi andi, agageli ne gukwevage nzonzi mugage Nyambi. Lavane, pasi re wuke nzonzi mugage, wuse gandi mutu wamugobisi.

¹² Nyambi vike re gavegi mugage. Yandi re nzonzi. Yandi re benze gobule negubuse gobule. Tumbe ndyayu, wu nye gube nzonzi mbatsi agu?

Nubandekene yenu miyugu

¹³ Sige yenu nwagwambili re «Pasi re sandi nemuni mugese dugwende gu yadi gyagi, dugumane mupume, duguvage mukite, dugudenge doli.»

¹⁴ Lavane nusayabi neve nugubile mugese. Nugere mwe dimungi dyavudugi mwe gigumbi sige dyatsyemugi kwe.

¹⁵ Labe anu, mbere nwagwambili re «Gere Fumu tsesinge, duguvage nane, duguvage didi.»

¹⁶ Tumbe, negu ngenze nune dunangu ne pedi. Dunangu du munongu wune du sandi duboti.

¹⁷ Wotsu wayabi vage diboti, wusa divagi, agavagi dibi.