Jacques 2 - Gisir

Nuyabe ne dupasu

¹ Bane be Nyambi, yenu nune gitu mu Fumu etu didume, Sesu Kirisete, nonge nuyapagise mutu.

² Pasi re gikiti gine moru wu putu ne bidwaru biboti amagwingene gu dibundu di enu. Sige mugeli ne bidwaru bimwinzi yingene gwandi.

³ Pasi re nwakibe gobise gikiti ne gumwambile re «Tsagene ndyayu vave, ve gipu!» sige mugeli re «Ndyayu, bange meteli!» mandi re «Tsagene ndyayu vetsi, ve byeru bi ami!»

⁴ nane, nusemavage dupasu yenu ne yenu? Bune buse ke bumbanze bu murime wubi?

⁵ Bane be Nyambi, yulu anu. Nyambi sale batu bene bugeli ve wusu bumongu nonge bekube bikiti mu gitu, bekudile meboti gu bulongu bu Nyambi vangenine botsu bamurondi.

⁶ Tumbe yenu, nwapedi mugeli! La vane, abanukwani negunubege ve wusu migage, bikiti bine mba?

⁷ Nane sandi musyengu ne dine diboti «Sesu Kirisete» di Nyambi tsinuvege?

⁸ Nwavagi dikengi gere nwagobisi mugage bulongu bu Nyambi, nevu direndilu re «Ronde mbatsi agu nevu wakwerondili.»

⁹ Tumbe gere nune mbale ne gyari ne batu, nwavagi dibi, vane migage myanukambisi mbare nusamigobisi.

¹⁰ Pasi re mutu masumune mugage wumosi, ne gugobise mimosi, wugitsimbu ne migage myotsu.

¹¹ Mbare wagwambili re «Wusagutube disongi», wagwambili gwandi re «Wusaguboke.» Mbare, pasi re wusatube disongi, tumbe waboke mutu, wasumune migage.

¹² Kabe yambile anu ne gutsagene gere batu begusosisu ne mugage wagobuli.

¹³ Yi, gigumbi gi gusosisu, gusagube gigebe gu batu besabe ne gigebe ne bembatsi. Tumbe awune gigebe agadili gigebe gi Nyambi wisi gusosisu.

Gitu gi sandi ne bigume gitu gifu

¹⁴ Bane be Nyambi, ke gye gwambile re «Nine gitu», gere asagirigitse mu givagitsi? Gitu gine gigubenze mwobule?

¹⁵ Mandi mbatsi sandi ne bidwaru ne biguye wisi wotsu.

¹⁶ A gye gumwambile re «Yende pembi ne polu, dware bidwaru bi gyotsi yange!» gere asamuvege byotsu byagwendi ne monyu?

¹⁷ Munongu mosi ne gitu, pasi re gisalabene mugivagitsi, gi gere givave gifu.

¹⁸ Gotsu begwambile re, «Wune ane gitu, wumosi ane givagitsi!» Menu nyagwaguli re tigitsi gitu gi agu gi sandi ne givagitsi, nikukurigitse gitu gi ami mu bivagitsi bi ami.

¹⁹ Wune gitu re Nyambi yi yimosi? Diboti. Menyuni mabi gwandi mene gitu tumbe maregemi ne wome!

²⁰ Gimbesi gyeni! Warondi labe gilimbe re gitu gi sandi ne bivagitsi gi sandi ne musumbu?

²¹ Aberam, mugulu etu, aseyabegenu re mutu wu sungeme gukyelu bivagitsi bi andi, mbare asake mwane andi Isake ve gitale gi pagu?

²² Walabi, gitu gi andi ne bivagitsi bi andi byetsemine, gitu gi andi gibe giduge dibandu bivagitsi bi andi.

²³ Re nane, dilabenine neve direndilu re «Aberam vagile Nyambi gitu, sige Nyambi mwene re mutu wu sungeme ne gugengile gitu gi andi.» Nyambi munenge re mbatsi ami.

²⁴ Kabe nwalabi re, mutu gayabegenu re asungeme gukyelu bivagitsi seke mu gitu vike.

²⁵ Re nane dibile ne Rahab yibange gilembi. Ayabegenu re asungeme gukyelu bivagitsi bi andi, mbare arare bilumbi bi bisi Iserayel sige abevyosile gu nzile nzusu gu gubekane.

²⁶ Munongu mosi ne nyuru tsi sandi ne givefu tsifu, gitu gwandi gi sandi ne bivagitsi gifu.