Jacques 1 - Gisir

Gubwegise

¹ Menu Sake, yi muvige Nyambi ne Fumu Sesu Kirisete. Nyabwegisi digumi ne bibeye di bifumbe bi Iserayel bi panzegene.

Divage di gugwarile mu gitu

² Bane be Nyambi, nesi nu mu kepagere dumangu, banganu ne muyangu neni.

³ Mbare nwayabi re gere gitu gi enu gidyole mu dumangu, gyanuvegi gikanene gi gusindile.

⁴ Nonge nusindili kwange gusuke, vane nugube nusungeme, nuduge, nusagukambe ne givave.

⁵ Gere wumosi ve gari enu agakambu ne dyele, ayivuli Nyambi, agumuvege mbare Nyambi agavegi mwenzegeli asagwanuni.

⁶ Tumbe ayivule Nyambi ne gitu, ayabe ne page. Mbare mutu wune page ayi gere mungibe wu nzube wasibigu ne punge gyari ne gyari.

⁷ Awune ayapikile re aguvegu givave ne Fumu.

⁸ Mutu wu gere ndelenge, ayi gyari ne gyari.

⁹ Mwane Nyambi wu gigaye, abi ne muyangu mbare Nyambi gumunangige ve mbure gobe.

¹⁰ Mwane Nyambi wu gikiti abi ne muyangu mbare Nyambi gumudyamise. Ayi gere bisinge bi kumu byaniti.

¹¹ Ve nyangu ya balili, kagese ya byumusi, ne gutsyemune buvwandi bu awu. Re nane, wisi, gikiti gutsyemugile mu mubingu bidyanzu bi andi.

¹² Diboti gu mutu wasindili dumangu, mbare aguvegu gipugi gi monyu peke peke yi Nyambi vangenine botsu bamurondi.

Dumangu sarugili gu Nyambi

¹³ Mutu wotsu ve wusu dibi, ayavage re «Nyambi gamangi murime!» Mbare Nyambi samangu ne dibi, sige yandi beni asamangi mutu mu dibi.

¹⁴ Mutu wotsu ayi mu dumangu ve gakwesili gubegu, kwange gwakilu mu murambu ne migangu mi andi mibi.

¹⁵ Sige migangu mibi myaburi mabi, pasi re mabi me mafune maburi gufu.

¹⁶ Bane be Nyambi nuyatsimbu.

¹⁷ Gidime gyotsu giboti ne pagu boti byasundili gu nzambi, byadurugili gu Nyambi, yi sunde dyumbi, tsungi ne mbwelile. Gu yandi gu sandi kalu kalu, gu sandi gupupe, gu sandi posi.

¹⁸ Aronde duvege yandi beni monyu mu musamu andi, wu bureti, nonge dubi mu mulonge rege mu byotsu bi yandi sunde.

Gulu ne gugobise musamu Nyambi

¹⁹ Bane be Nyambi, nwayabi didi, mutu wotsu alengi negulu, tumbe abi page gwambile ne gutibe kabu,

²⁰ mbare mutu wune kabu asavagi mambu me boti ve wusu Nyambi.

²¹ Redibandu yusule anu motsu mavagi mwinzi ne motsu mepave ne bubi bu enu. Sangile anu ne murime mosi musamu wu Nyambi gaveri gu mirime mi enu, mbare wune dinyange di gunwobule.

²² Gobisanu musamu Nyambi, nuyasingene ke ne gumulu, nuyakwetsimbisu.

²³ Mbare wotsu wagulu musamu, wusamugobisi, abagunu ne mutu wakwegengili mu dumwenu wakwelabi neve avu.

²⁴ Ne gukwegengile, arageme negulibegene vane ne vane neve avu, asakalugi.

²⁵ Tumbe mutu wakutisi mugage ngenze, wagobuli, aganamini ne woni, agamugobisi, asasingeni ke negumulu gu gumulibegene. Vane agube ne muyangu mu motsu me agavagi.

²⁶ Pasi re mutu gapikili re ayi mwane Nyambi wu sungeme, pasi re a sandi girange gi dulimi du andi, agakwetsimbisu yandi beni dulembu du andi du sandi ne musumbu.

²⁷ Ve wusu Nyambi taye etu, labe ndwani boti gulembile, gubandekene bekwili ne tsane mu meguge mawu, duyakwebunze ne mambu me bulongu.