Évangile selon Luc 6 - Gisir

Sesu ayi Fumu wisi gukole

¹ Wisi mosi wu gukole, Sesu ne bebingitsi bandi, bevyogilange vegari gyambe gi putu. Bebingitsi bane, bedoke putu, negusule bipupu, bayange misu me putu.

² Farisi tsibe vane bambile re «Agye nwavagile mambu me savagu wisi gukole?»

³ Sesu negubagule re «Nusetangune mu gisangumu gi Nyambi, dyambu di Davide vage yandi ne batu bandi negulu nzale?

⁴ Nevubingenine gu gari kane ndagu Nyambi, abonge pembi tsi ndagu Nyambi tsi muvegitsi pagu amuvege. Avege gwandi batu babe nandi gilonge, yawu botsu bayi, nesi nane mugage Moyise wagwambili re Ka bevegitsi be pagu begayi pembi tsine.»

⁵ Sesu negukunde bambile re «Menu, Mwane mutu ni fumu wisi gukole.»

Sesu beluse Mutu wube ne dikake divole

⁶ Wisi mosi gwandi wu gukole, Sesu negwingene gu ndagu ndembu, gwenenze batu musamu Nyambi. Ve gari awu, gube mutu wube ne dikake di mebagele divole.

⁷ Bivunde bi migage mi Moyise ne Farisi bekebange dyele digufurigile Sesu dyambu. Redibandu bemugengilange bekulabe gere agubeluse mutu wune wisi gukole.

⁸ Tumbe, Sesu ayabange pikile tsi awu. Vane, Sesu negwambile gibedu: «Retseme vegari batu botsu.» Neguretseme, negube meteli.

⁹ Vane, Sesu negubambile re «Nyanwivuli: Mugage Moyise wagwambili re Wisi gukole, dwavagi diboti vo dibi, dwagobuli mutu, vo dwamusisi gufu?»

¹⁰ Vane, negugengise batu botsu, negwambile gibedu re: «Simbule wogu.» Negusimbule, Dikake di andi negubeluge.

¹¹ Tumbe betibe kabu yineni. Bekwambesenange yawu ne yawu dibeguvage Sesu.

Sesu asale vegari bebingitsi digumi di bilumbi ne bilumbi bibeye

¹² Wisi mosi, Sesu negwende gu mukongu. Avyose dibeti dyotsu gune negulembange Nyambi.

¹³ Wisi ne gutsamuge, Sesu arombe bebingitsi bandi. Asale digumi ne bebeyi. Abevege gidyanzu gyone, ne dine dyone di bilumbi.

¹⁴ Labanu mine mawu: Simu wu Sesu vege dine di Pyere ne mwane taye andi Anderé. Sake ne San, Filip, Baretelemi,

¹⁵ Matye, Tome, Sake mwane Alefé, Simu wa nengure giyani,

¹⁶ Suda mwane Sake ne Suda Iskaryote mutu wusumbise Sesu.

Sesu ganenzi bumongu ne gubeluse bibedu

¹⁷ Sesu negusunde mukongu ne bebingitsi bandi. Mbili bebingitsi bemubingange bekube vane ve mudembi, negusikeme. Ne batu berambugile gu Sudé, ne gu Serisalem, ne Tir ne Sidu yadi tsi mbeke mubu.

¹⁸ Botsu beruge gusegulu ndongi tsi Sesu, ne guse belusu. Batu bebegisungu ne menyuni mabi, Sesu akumesanze mu nyuru tsi awu.

¹⁹ Batu botsu berondange mubembe mbare ngudu yi vudugange mu yandi re yi belusange bibedu byotsu.

Diboti ne milogu

²⁰ Vane, Sesu negugengise bebingitsi bandi, negwambile re «Nyambi gavagi diboti gu yenu bigaye, mbare meboti me bulongu bu Nyambi menu.

²¹ Diboti gu yenu nune nzale ne kyawu, mbare nugukure ne mbili biguye. Diboti gu yenu nwalili ne kyawu, mbare nugube ne mugangu.

²² Diboti gu yenu nwabingi mwane mutu. Gukyelu yine, batu begunuvine, begunusanze, begunusyenge, beguyunze mine menu.

²³ Ve mambu mane me gulabenine, banganu ne mugangu, ginanu, mba Nyambi agunuvege mbili meboti gu yulu. Munongumosi nevu mikoku mi awu bevagilange bebigitsi.

²⁴ Milogu gu yenu bisine, mbare nwamane dile menu meboti.

²⁵ Milogu gu yenu nwadile ne kyawu mbili meboti, mbare gigumbi gya rugi, nugube ne nzale. Milogu gu yenu nwasyevi nekyawu, mbare nugutsore, ne gulile veveni.

²⁶ Milogu gu yenu, gere batu botsu be ne tangulu boti gu yenu, mbare re nane mikoku mi awu mivagilange ne bebigitsi be gufure.»

Girondu gu batu banuvini

²⁷ «Tumbe nyanwambili, yenu nwanyulu, rondanu batu banuvini, bevagili anu meboti.

²⁸ Veganu mule batu banulogi, lembanu Nyambi gukyelu batu banukwani.

²⁹ Gere mutu gakudimbi mbate ve direme, murigitsi dine direme gwandi. Gere mutu makubonge ngoye kutu, wuyamukale gubonge gwandi ngoyi yi gutsi.

³⁰ Ke pagere mutu wakwivuli givave muvegi. Gere mutu makubonge givave wuyamwivule.

³¹ Vaganu mambu meboti gu bembatsi, nevu nwarondili re yawu gwandi benuvagi.

³² Gere nwarondi ke banurondi, nwapikili re Nyambi agunugobise dikengi gukyelu yine? Nesi bevagitsi be mabi barondi batu baberondi.

³³ Gere nwavagi diboti ka batu banuvagi diboti, nwapikili re Nyambi agunugobise dikengi gukyelu yine? Nesi bevagitsi be bitsimbu bavagi munongu mosi.

³⁴ Gere nwasombisi doli ka batu benwapikili re begunugabusile, nwapikili re Nyambi agunugobise dikengi gukyelu yine? Nesi bevagitsi be bitsimbu basombeseni nesi yawu ne yawu. Ne gitu re mbatsi agumugabusile ve wusu.

³⁵ Tumbe rondanu batu banuvini, bevagili anu meboti, sombisanu batu nesi nwayabi re besa benze nugabusile. Nyambi gunuvege meboti meneni, negube bane be Nyambi Yulu, mba Nyambi yandi beni, ayi muboti nesi mu batu besayabi diboti di andi ne biyani.

³⁶ Rigitsanu gigebe, neve Taye enu.»

Nuyavege bembatsi mbele

³⁷ «Nuyagele bembatsi, nonge yenu gwandi nutsatse gelu. Nuyavege bembatsi mbele, Nyambi gwandi asagunuvege mbele. Nyesanu bembatsi, nonge Nyambi gwandi akununyese.

³⁸ Veganu bembatsi bivave bi barondi, nonge Nyambi gwandi akunuvege. Nyambi agubasise ponzi tsi enu kwange ne gulunde. Neve wavegili bembatsi, Nyambi gwandi agukuvege munongu mosi.»

³⁹ Sesu negukunde beverile kugu: «Mwisi pafu benze begise mwisi pafu? Yawu botsu babeye besagupudumuge gu dubile?

⁴⁰ Mudyanzitsi asayabi vyagunu ne mulonzi andi. Tumbe mubingitsi wunenge dikengi gidyanzu, agube munongu mosi ne mulonzi andi. Tumbe asagumuvyogilile.

⁴¹ Agye wagengilili ke dugunze gu disu di mbatsi, wusalabi gikoge gi gu di agu?

⁴² Gye gwambile mbatsi re nzili gusule dubanze gu disu di agu, ndyayu wusalabi gikoge gi gu di agu? Givyangi gyeni, regile gusule gikoge gu di agu, wukelabe dikengi gu gusule dubanze dugu disu di mwane taye agu.»

Muri gayabegenu ke mu milunde mi andi

⁴³ «Muri wuboti wusaburi mulunde wubi. Muri wubi wusaburi mulunde boti.

⁴⁴ Muri agayabegenu kane mulunde andi. Batu besasuki tsungubali mu mukumi. Dusabenze ragesenu poge mu dibale.

⁴⁵ Batu botsu beboti barigitsi mambu meboti me barari gu mirime mi awu. Batu babi barigitsi mambu mabi me base gu mirime mi awu. Ne gungenze mambu magwambili mutu marigitsi pikile tsyarugili gu murime andi.»

Ndagu beyi

⁴⁶ Sesu negukunde bambile re «Agye nwagwarili gunenge “Fumu, Fumu”, gere nusavagi me nyanwambili?

⁴⁷ Mutu wotsu warugi gumenu, wagulu musamu ami, wakobisi nyanurigitsi nevu ayivu:

⁴⁸ Ayi munongu mosi ne mutu warunge ndagu, agapakili gubuke veveni kwange negu digunge nesi agutsumige mekutu. Nevu ndagu yi rungu dikengi, ve giningu gipandile, mupupe neguse yisibige, mambe me seberuse ndagu yine.

⁴⁹ Tumbe mutu wagulu musamu ami wusavagi di nyagwambili ayi munongu mosi ne mutu wuserunge ndagu ve musyegi asebuke veveni mevulu nesigutsumige mekutu. Mupupe neguse sibige ndagu yine, vane ne vane yitige, yotsu yi panzige.»