Évangile selon Luc 21 - GisirPagu yi mukwili gigaye 1 Sesu negunangule misu gu yulu alabange bikiti biverange pagu mu byevi gu ndagu Nyambi. 2 Alabe gwandi mukwili gigaye avere fure beye tsisane musumbu. 3 Sesu negwambile re «Ngenze nyanwambili mukwili wuwu wu gigaye asevere vyagunu ne yawu botsu. 4 Mbare yawu botsu besevere mu byevi doli tsise vyogililange tsisabe nawu ne musumbu. Tumbe yandi asevere tsyotsu tsi tsibange nandi gu gudenge monyu.» Tsangu gupanze ndagu Nyambi 5 Batu bemosi bambilange gukyelu ndagu Nyambi benyungilange memani meboti ne birungu bibevege Nyambi gugukembise ndagu Nyambi. Tumbe Sesu negwambile re 6 «Guguruge gigumbi gi byotsu bi nwagengisi nwanyungili bigupanzu memani motsu meguniguge.» Ndimbu tsyarigitsi disukisilu di bulongu 7 Bemwivule re «Mulonzi, a motsu mane meguruge gigumbi gye? A ndimbu yi gube gye yi duguyabile re megulabene?» 8 Sesu negubagule re «Nubandekene nuyatsimbisu. Mbare mbili batu beguruge mu dine dyami begusegwambilange re “Menu Kirisete Mwobutsi” ne “Gigumbi gyaruge.” Nuyabebinge. 9 Ve nugulilu tsangu tsi ngube ve batu begurangile, nuyadume. Mbare nonge re motsu mane me guregile guruge. Tumbe sagube disuke di bulongu nekyawu.» 10 Akundebambile re «Batu be melongu memosi begubokene ne melongu mefimbe. Bulongu bune kanangu bugudimbene ne kanangu yifimbe. 11 Butambe buguregeme veveni mu mbili mbure, gugube bivunge ne mindale. Dugulabe bimage bineni byavegi wome gu nzambi ndimbu tsisamelabene ne mbetsi. 12 Tumbe nesi mambu motsu mane megulabene dyambu direge begunugange, begunukwane, begunusake mu mekake me bivunde bi migage gwetabule bumbanze gu ndagu tsi ndembu. Begunuvere gu nzugu gukyelu dine dyami, begunubege ve wusu kanangu ne ngowu. 13 Mambu mane megunurugile nonge nukube mbeye tsi ami. 14 Nuyabe ne pikile tsigukebe dyele digukwe gobule. 15 Mbare nigunuvege gyambitsi gi ginami batu banuvini besagubuse. 16 Nugusaku nesi ne be taye tsi enu, ne nguyi, ne bane be taye tsi enu, ne biburu bi enu, ne mbatsi tsi enu. Nuguboku mbili ve gari enu. 17 Nuguvinu ne batu botsu gukyelu dine dyami. 18 Tumbe nesi dunange dumosi du murwagu dusagutsyemuge. 19 Gikanene gi enu gi gunuvege monyu.» Sesu gagwambili re Serisalem gupanzige 20 Ve nugulabile Serisalem gutsyengu ne gori, yabanu re digwere digupanzile Serisalem dyaruge. 21 Vane begube gu Sudé berini gu mikongu, begube gu gari yadi Serisalem bevudugi, begube gu byambe beyagwingene gu yadi. 22 Mbare gugube mewisi me gugabuse nyongu mbare motsu me rendu megulabene. 23 Milogu gu begetu begube ne mimi ne begetu begunwisange mewisi mane, mbare gugube nzuki neni gu bulongu bune. Nyambi gutibile batu bane kabu. 24 Beguboku ne dibambu, begubegu gu buvige mu melongu motsu. Batu be sandi Sif begutsarile Serisalem kwange ve gigumbi gi awu giguvilu. Tugu yi Mwane Mutu 25 Gugube ndimbu gu dyumbi, gu tsungi ne gu mbwelile. Mu mutambe melongu megube ne medume duvogusu du mungibe nzube dugubevege wome. 26 Batu begufu ne wome ve gupikilange yawu mambu me guruge mu butambe, ndure tsi nzambi tsi guregeme. 27 Vane begulabe Mwane mutu guruge atsyengu ne dimungi abase ne ngudu ne didume. 28 Ve mambu motsu mane megupakile guruge, simbuganu, nangulanu miru, mbare dukebeli negobulu. Kugu yetsigu ne muri wanengure figyé 29 Vane Sesu negubeverile kugu: «Gengilanu muri wanengure figyé ne miri minzusu. 30 Ve nugulabile megaye mawu gupakile gufule nuguyabe re dimfule dikebeli. 31 Munongumosi ve nugulabile mambu mame guruge yabanu re gigumbi gikebeli gi Nyambi gure gusebegise batu bandi. 32 Nyanwambili ngenze, batu belabe mambu mane besagutsyemuge yawu botsu nesi mambu motsu mane meguruge. 33 Nzambi ne butambe begutsyemuge tumbe mambu motsu menzegwambile mesagutsyemuge.» Diboti di gulubuge 34 «Bandekenanu nuyavyose monyu enu mu meyaye, ne budyongi, ne pikile tsi monyu mbare wisi wune wugunusutisu gere mbuse. 35 Mbare wugudimbegene mu botsu bemu mutambe. 36 Tumbe lubuganu, lembanu gigumbi gyotsu nonge nukudenge ngudu yigobuge mu mambu motsu me guruge nukube meteli ve wusu Mwane mutu.» Mewisi me disukisilu me Sesu gu ndagu Nyambi 37 Sesu vyose wisi gu ndagu Nyambi negunenzange. Avudugange gwevyose dibeti gu mukongu wu miri myanengu re Olivi. 38 Bumongu bwotsu burugange mekyele meneni gu ndagu Nyambi gusemulilu. |
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
The Seed Company