Évangile selon Luc 19 - Gisir

Sesu gumbu Sasé

^1-2 Sesu negwingene gu Seriko, ve adalilange yadi yine, abengune ne mutu wanengure Sasé, givunde gi bebolitsi be lepu ayibange gikiti.

³ Akebange gulabe Sesu. Tumbe nevu ayibange mugufi, aserungule gumwene mbare gubange mbili batu.

⁴ Ayende mbangu gu wusu mu nzile yi Sesu vyogilange, abare gu muri wuneni, nonge akemwene.

⁵ Sesu neguvuduge gu dibandu di muri agengile gu yulu, negulabe Sasé gu yulu muri amwambile re «Sasé, vuru negusunde, mbare nemuni nigwingene gu ndagu agu.»

⁶ Sasé negusunde mbangu mbangu, negumubege gu ndagu andi ne mugangu.

⁷ Batu negulabe nane, bekwamugange, bekwambilange re «A gye mutu wuwu magwetsagenine gu mutu wu sandi ne monyu wuboti?»

⁸ Sasé meteli ve wusu Sesu, amwambile re «Fumu, nikapasi meboti mami vegari, dikabu dimosi nikadivegi bigayi. Pasi re nzefude mutu, nigumugabusile nyongu yine.»

⁹ Sesu negumwambile re «Nemuni Nyambi seruge gugobule ndagu yiyi, mbare yandi gwandi mwane Aberam.

¹⁰ Mbare Mwane Mutu ruge gusekebe negusegobule batu batsyemugilu dibondu.»

Kugu yi memani me kunge

¹¹ Ve Sesu yibile beli neguvudege gu Serisalem, akuverile batu barugili negulu musamu andi kugu, mbare batu bepikilange re bulongu bu Nyambi bu gulabene ne mepape.

¹² Sesu negwambile re «Mutu gitsapele gi mindumbe akwende gu bulongu butage gu kanangu neni gwebyatsu kanangu yi gubange ve nzime andi, akukunde ruge.

¹³ Nesi agwende, arombe digumi di bedyanzitsi bandi, abegabile mwane mwane yandi fure dimani di kunge dine disumbu dineni negubambile re “Funisanu doli tsine kwangene ve nigurugile.”

¹⁴ Tumbe batu be bulongu bune bemuvinange, bekurume batu gu bulongu bwende yandi, gwebambile re “Mundumbe, dusarondi re mutu wune abi kanangu etu.”

¹⁵ Tumbe negubyatsu kanangu, agabuge gu bulongu bu andi. Arombe bedyanzitsi be yandi vege fure doli, nonge akuyabe durangu du fure doli tsibesefune.

¹⁶ Mudyanzitsi wurege neguruge amwambile re “Fumu, fure doli agu yi kunge yisefune gwandi digumi di fure.”

¹⁷ Fumu negumwambile re “Diboti, wu mudyanzitsi wuboti, wutsibe wusungeme mu mambu megegi, nikakubyatsi Givunde gi digumi di yadi.”

¹⁸ Wumubeyi neguruge negwambile re “Fumu, fure yi wusepege yisefune fure yiranu gwandi.”

¹⁹ Negumwambile re “Ndyayu nyakubyatsi givunde gi yadi yiranu.”

²⁰ Mudyanzitsi wunzusu neguruge, negusemwambile re “Fumu, labe fure agu yi kunge. Nzeyibandekene niyipyete ne tsande.

²¹ Mbare nzekulu wome. Ndyayu wu mutu wurange. Wabongi gi ndyayu wusasunze, wabuki bi ndyayu wusevare.”

²² Kanangu negumwambile re “Mudyanzitsi wubi, nyakutabulili bumbanze mu mambu me ndyabeni wusegwambile. Wuseyabange re ni mutu wurange, nyabongi binzasunze, nyabuki binzevare,

²³ dibandu gye wusagwesunzile fure ami gu dimani dyaswegili doli? Ve nzerugile mbere nzeragesenu tsyafune.”

²⁴ Vane, negwambile babe vane, “Mudumbi anu fure yikunge yi nandi. Yi vegi anu mudianzitsi wune digumi.”

²⁵ Bemwambile re “Fumu, akene digumi di fure.”

²⁶ Kanangu negubagule re “Nyanwambile, wotsu wune givave begukunde muvege vyagunu. Tumbe wu sandi negivave begumusule nesi gi nandi.

²⁷ Batu bapini, besaronde re nibi Kanangu, bebegi anu gunu, beboki anu ve misu mami.”»

Sesu kagwendi gu Serisalem

²⁸ Negumane gwambile nane, Sesu ne bumongu bende gu Serisalem.

²⁹ Mbere bekebeli neguvuduge gu Betefase ne Betani, gu gyari gi mukongu wu miri myanengu re Olivi. Sesu arume bebingitsi bandi bebeyi gu wusu,

³⁰ abambile re «Yendanu gu dimbu digengesene. Ve nuguvudugile, nuguragesenu mwane gibulu gyanengure ane, gitungu, gisebetsitsageninu. Ginyanguli anu. Gimbegili anu gunu.

³¹ Pasi re mutu senwivule re “Dibandu gye nwaginyangulili?” Mwambili anu re “Fumu gagirombi.”»

³² Bebingitsi babeyi berumu bende, beragesenu motsu kanevu Sesu bambilile.

³³ Ve benyangulile mwane gibulu gyanengure ane, benga gyoni bebambile re «Dibandu gye nwanyangulili mwane gibulu gine?»

³⁴ Bagule re «Fumu gakirombi.»

³⁵ Bemubegile mwane gibule. Besunze ve yulu gibulu bidwaru bi awu. Benangige Sesu ve yulu gibulu gyeni.

³⁶ Ve Sesu yendilange, batu bekwalange bidwaru bi awu mu nzile.

³⁷ Beli guvuduge gu Serisalem, mu nzile yasundi gu mukongu wu miri myanengu re Olivi, gigondu gyotsu gi bebingitsi bandi, begangu ne mune mugangu. Bekwimbange gu yulu dine di Nyambi gukyelu bimage bi yawu belabe bi Sesu avage.

³⁸ Bambile re «Nyambi avegi mule gu kanangu yarugi gu dine di Fumu. Polu gu yulu. Didume gu Nyambi.»

³⁹ Batu be dibundu di Farisi babe vegari awu bambile Sesu re «Mulonzi, votse bebingitsi bagu.»

⁴⁰ Sesu bagule re «Nyanwambili, nesi besevole, memani megwamuge.»

Sesu galili gukyelu Serisalem

⁴¹ Sesu mbeke beli neguvuduge gu yadi Serisalem, negulabe yadi yine, alile gukyelu andi.

⁴² Negwambile re «Serisalem, wusayabe neve wubenze dengile polu. Re dibandu wusabenze kunde yene.

⁴³ Gugube tsufu batu bakuvini begurunge murumbe gusedimbene nagu. Begukutsyenge, begukubakige mutsyelu tsyotsu.

⁴⁴ Begukunige ne ndyayu ne batu bagu. Ve gari agu besakusisile nesi dimani. Mbare wusayabe gigumbi gi Nyambi seruge gusekwamuse.»

Sesu gasanzi besumbitsi gu gari ndagu Nyambi

⁴⁵ Sesu negwingene gu gari ndagu Nyambi akusanze batu besumbisange.

⁴⁶ Akubambilange re «Direndu mu bisangumu gi musamu Nyambi re “Ndagu ami yigube ndagu yi ndembu.” Tumbe yenu, nwayikaluse ndagu midagi.»

⁴⁷ Anenzange wisi wotsu gu ndagu Nyambi. Bivunde bi bevegitsi be pagu, ne bivunde bi migage mi Moyise, bivunde bi dibundu bekebange guboke Sesu.

⁴⁸ Tumbe beseyabange neve beguvagile, mbare batu botsu berondange gulu mambu me yandi yambilange.