Évangile selon Luc 18 - GisirKugu yi mukwili ne nzonzi 1 Sesu ne gubeverile kugu yi guberigitse re beyadede belembingi Nyambi gigumbi gyotsu. 2 Negubambile re «Gube gu yadi, nzonzi yise dumange Nyambi, yise gobisange kepagere mutu. 3 Gu yadi yine yamosi, gube gwandi mugetu mukwili, wurugange gigumbi gyotsu gusegwambile nzonzi re “Tabulili bumbanze ne mbeni ami.” 4 Gigumbi gyotsu, nzonzi yine abusange gutabule musosu wune. Tumbe akekwekwambilange yandi beni re “Ngenze nzadumi Nyambi, nzagobisi kepagere mutu, 5 tumbe neve mukwili wuwu anegikanene nigumutabulile bumbanze nonge atsatse kurugange gusepage duvoguse gigumbi gyotsu.”» 6 Sesu negukunde gwambile re «Yulu anu dyagwambili nzonzi yibi yiyi. 7 Tumbe Nyambi sagutabulile bumbanze batu bandi bamulembi nyangu ne dibeti? Agutsinge negubamuse? 8 Nyanwabili re agubetabulile bumbanze mbangu mbangu. Tumbe ve gurugile Mwane Mutu, aguseragesenu batu bamuvingili ne gitu gutsi?» Kugu yi Farisi ne mubolitsi lepu 9 Negukunde beverile kugu gukyelu batu beyabange re besungeme ve wusu Nyambi, bekulenzange bembatsi botsu: 10 «Batu bebeyi bende gu ndagu Nyambi gwelembe. Mutu wu dibundu di Farisi ne mubolitsi lepu. 11 Mutu wu dibundu di Farisi neguretseme akulembange gutsye murime re “Tate Nyambi, nyakugabusili diboti mbare nzane batu bemosi badagi, besesungeme, bavagi mesongi. Nzamunongu mosi ne mubolitsi lepu wuwu. 12 Nyasindili nzale tsufu beye mu tsonu. Nyakuvegi gimosi gu digumi mu byotsu binyadili.” 13 Mubolitsi lepu ayibange tage ne batu. Aserungulange gengise nesi misu gu yulu. Tumbe akukwedimbange ve tulu, akwambilange re “Tate Nyambi, nimuvagitsi mabi. Nyulu ngebe.” 14 Ngenze nyanwambili, mubolitsi lepu reyibe asungeme ve wusu Nyambi, ve agabugile gu ndagu andi. Sabe mutu wu dibundu di Farisi. Mbare mutu wakwenanguli, Nyambi gamusunzi. Wakwesunzi, Nyambi gamupandisi.» Sesu gavegi bane begegi mule 15 Batu bekubege bane begegi gu Sesu nonge akubebembe. Bebingitsi be Sesu negulabe nane bekubekale. 16 Tumbe Sesu negurombe bane, negwambile re «Nuyakale bane begegi guruge gu menu. Nuyabegandise, mbare bulongu bu Nyambi bu munongu mosi ne bane begegi.» 17 Negungenze, nyanwambili, kepagere mutu wusasingi bulongu bu Nyambi munongumosi ne mwane mugegi asagwingene. Gikiti ne Sesu 18 Givunde gi Sif kwivule Sesu re «Mulonzi boti, nivagi tsye nikudenge monyu yi peke peke?» 19 Sesu negumwagule re «Gye wanengili re Mulonzi boti? Gusandi mutu wuboti, vengu ke Nyambi vike. 20 Wayabi migage mi Nyambi: Wuyatube disongi. Wayaboke mutu. Wuyadage. Wuyafuregile mbatsi dyambu. Gobise taye ne nguye agu.» 21 Givunde gi Sif negumwagule re «Nyagobisi migage myotsu mine pakile ve bulengi bu ami.» 22 Sesu negulu mambu me mutu wune yambile, negumwagule re «Wukyasali ne dimosi. Sumbise byotsu binagu. Gabile bigayi doli tsine, pasi wavage nane, Nyambi gukuvege meboti gu nzambi. Sige ruge, mbingi.» 23 Mutu wune negulu nane, atsore. Mbare ayibange gikiti gineni. 24 Sesu negulabe re amatsore, negwambile re «Dirange di bikiti gwingene gu bulongu bu Nyambi.» 25 Munongumosi, diserange di gibulu gineni ne pagese gwingene gu divulu di tsongi. Tumbe dirange veveni gikiti gwingene gu bulongu bu Nyambi. 26 Batu bulungu mambu me Sesu yambilange, bambile re «A vane, nye benze gobulu?» 27 Sesu negubagule re «Mambu motsu me batu besabenze vage, Nyambi gamevagi.» 28 Pyere negwambile Sesu re «Labe, yetu dwasise byotsu bitsibe netu gu gukubinge.» 29 Sesu negubagule re «Negungenze nyanwambile re mutu wugusise ndagu andi, mugatsi andi, bane be taye tsi andi, biburu bi andi, bane bandi, gukyelu bulongu bu Nyambi, 30 agudenge meboti membili ne gigumbi gigi, kwange gigumbi gyarugi. Agudenge monyu yi peke peke.» Sesu kakundi yabisi dufu ne durambugu du andi 31 Sesu negubonge digumi di bebingitsi bandi ne bebingitsi bebeyi, negubambile re «Yulu, anu gwendi anu gu Serisalem, gu gurigitsilu motsu me bebigitsi berende gukyelu Mwane mutu. 32 Mbare agusaku mu mekake me batu be melongu mesusu, begumudoke, begumukwane, begumutule mati, 33 begumudimbe migebi, begumuboke. Wisi wu mureru agurambunge gu dufu.» 34 Tumbe bebingitsi beseyulungu mambu motsu me Sesu yambilange, mbare mabe me sweme gu yawu. Sesu gabelusi mutu ne pafu 35 Sesu mbeke beli ne yadi Seriko, gube mutu wube ne pafu ve mbeke nzile avondange. 36 Negulu duvogusu du batu begogulange, akwivule: «A mune duvogusu dune gye?» 37 Bemwambile re «Sesu yi Nasarete gavyogi.» 38 Negwamuge re «Sesu, Mwane Davide, nyulu ngebe.» 39 Batu babe ve wusu bekumuvotsange re «Vole.» Tumbe akukunde gwamuge vyagunu «Mwane Davide, nyulu ngebe.» 40 Sesu negusikeme. Neguvege bebingitsi bandi dinyange re «Mumbegilyanu.» Negubambeme ne Sesu, Sesu mwivule re 41 «Warondi re nikuvagi tsye?» Yandi ne gwagule re «Fumu, nyarondi gulabe dikengi neve nibilange.» 42 Sesu negumwagule re «Labe, gitu gi agu gyakubeluse.» 43 Vane ne vane negulabe dikengi. Negubinge Sesu negwene dumisange dine di Nyambi. Bumongu negulabe nane, yawu gwandi bekedumisange dine di Nyambi. |
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
The Seed Company