Évangile selon Luc 16 - Gisir

Gilombi gi muraritsi lubuge

¹ Sesu negwambile bebingitsi bandi re «Gube gikiti, gibange ne muraritsi wubandekenange meboti mandi motsu. Gukuruge mutu gusemwambile re “Muraritsi wune agayunzi meboti magu.”

² Fumu meboti negurombe muraritsi meboti mandi negumwambile re “Nyagulu tsangu tsibi gukyelu agu. Ndabisi neve wabandekenini meboti mami. Kabe nikakusuli. Wusakunde bandekene meboti mami.”

³ Muraritsi negukwekwambile re “A nivatsye, gere fumu akanyusuli mu gidyanzu? Nzandi ne ngudu tsi guvare byambe. Guvonde, nigulu gisoni.

⁴ Nesi fumu senyusele mu gidyanzu, nyayabi neve niguvagile, nonge batu bekutare gumbu gi awu.”

⁵ Muraritsi negurombe batu benwanange fumu andi wumosi ne wumosi. Mutu wurege neguruge, amwivule: “Wanwani fumu ami tangu tsye?”

⁶ Amwagule re “Nyanwani fumu agu kame mirege mi matsi.” Muraritsi negumwagule re “Bonge mbangu mbangu gisangumu gi agu gi dinwane tsagene vane rende mu gisangumu gi dinwane megumi meranu me mirege mi matsi.”

⁷ Negukunde gwambile wunzusu re “Wanwani fumu ami tangu tsye?” “Nyanwani fumu agu kame puke tsi putu.” Negumwambile re “Bonge gisangumu gi agu gi dinwane rende megumi ginane me puke.”

⁸ Fumu negulu neve muraritsi wune vagile amugabusile diboti, gukyelu dyele ditsibe nandi. Givagitsi gi awu gi mambu yawu ne yawu gi vyagunu ne bane be giyalele. Munongu mosi ne bane be dilale didi bene dyele vyagenu ne bane be giyalele.»

⁹ Sesu negukunde bambile re «Nyanwambili ne meboti menenu, yamusanu batu nonge bekube mbatsi tsi enu, mbare gigumbi gi meboti mane meguvilu. Nyambi gunusinge gu ndagu andi yi peke peke.

¹⁰ Mutu wotsu wusungeme gu mambu megegi, asungeme gwandi gu mambu meneni. Mutu wotsu wusesungeme gu mambu megegi, asagube gwandi asungeme gu mambu meneni.

¹¹ Pasi re nusabe nusungeme gu gubandekene meboti menu me bulongu, nye gunuvege meboti mengenze?

¹² Pasi re nusabe nusungeme gu gubandekene meboti me mutu nzusu, nye gunuvege menu?

¹³ Gusandi mudyanzitsi wubenzedyanzile fumu beye. Aguvine wumosi, akuronde wufimbe. Vane agugobise wumosi, akulenze wufimbe. Munongumosi nusabenze dyanzile Nyambi negube muvige doli.»

Sesu gabigisi farisi

¹⁴ Batu be dibundu di farisi negulu motsu me Sesu yambilange, bekumudokange mbare babange ne mugangu meboti me bulongu.

¹⁵ Tumbe Sesu negubambile re «Nesi yenu nwavagi mambu megukwekurigitse ve misu me batu re nusungeme, tumbe Nyambi gayabi pikile tsi mirime mi enu mbare mambu me batu balabi re dyambu dineni, Nyambi gadyeni re dyambu di sandi ne musumbu.

¹⁶ Nesi Sambatisete guruge, batu beyabange migage mi Moyise ne bisangumu bi bebigitsi berende. Bepakile nenze musamu boti ve gigumbi gi Sambatisete, mwane mwane kebe ngudu tsi gwingene gu bulongu bu Nyambi.

¹⁷ Nzambi ne tsyengi begutsyemuge, tumbe nesi murendu mosi wu mugage Nyambi wusagubunzulu.

¹⁸ Kepagere mutu wasanzi mugatsi andi, wagongi wunzusu, agatubi disongi. Wotsu wagongi mugetu wusesanzu gu dyonge, agatubi disongi.»

Gilombi gi gikiti ne gigaye gyanengure Lasare

¹⁹ «Gube gikiti gi dwarange ka bidwaru biboti bi lenge bine disumbu dineni. Tsufu tsyotsu avagange mulambu neni.

²⁰ Gube gwandi gigayi gyanengure Lasare. Gibange gifidugilu ne pure melamine ve mune ndagu gikiti.

²¹ Arondange guye nesi bigugufu bibondugange gutsye tavuli gikiti. Tumbe mondi tsirugange gusevende pure tsi andi.

²² Gigayi ne gufu, byanze bi Nyambi bemubege ve mbeke Aberam. Gikiti gwandi negufu bemutsige.

²³ Gu batu bafu, gu gikiti kengilange veveni, negugengile, akulabe gutage Lasare ve mbeke Aberam.

²⁴ Vane, gikiti negwamuge re “Tate Aberam, nyulu ngebe. Nyakulembigi, rume Lasare nonge aputigi mulembu andi gu mambe, akubonduse diberi digusepotse mungunge, mbare nyakengi veveni gu gari ruvi dudu.”

²⁵ Tumbe Aberam negumwagule re “Mwane ami, rangemine re gigumbi gi monyu agu gutsi, wudile mbili meboti. Tumbe Lasare abange kegu meguge. Ne kyawu gubonzu gabonzu, ndyayu wugumukengu.

²⁶ Dibandu, ve dubile duneni dwadupasuli yetu nenu, nonge batu barondi ruge gu yetu besagurungule, yetu gwandi dusabenze ruge gu yenu.”

²⁷ Gikiti negwambile re “Tate, nyakulembigi rume Lasare gu biburu bi ami.

²⁸ Mbare nine bane betaye beranu. Ayendi gwebelubuse nonge betsatse ruge yawu gwandi gu mbure yiyi yi mukengu.”

²⁹ Aberam negumwagule re “Bane be taye tsi agu be ne migage mi Moyise ne bebigitsi, bebulilu dikengi.”

³⁰ Gikiti negwambile re “Tate Aberam, besagusinge ke migage mi Moyise ne bebigitsi, pasi re gusarambuge mutu gu batu bafu, ayende gu yawu, mutsageninu awu wusagukaluge.”

³¹ Tumbe Aberam negumwagule re “Pasi re besagulu migage mi Moyise ne bebigitsi, besagudibole re dyambu nesi mutu serambuge gu dufu negwende gu yawu gwebambile, besagukalule mutsageninu.”»