Évangile selon Luc 15 - Gisir

Kugu didombi di tsyemuge di kunde labene

¹ Bebolitsi be lepu ne batu bene mutsageninu wubi. Beruge bebeli ne Sesu gusegulu me yandi gwambile.

² Farisi ne bivunde bi migage mi Moyise bekumugelange re «A mutu wuwu agasobegeni neguye ne batu bavagi mambu mabi?»

³ Sesu akubeverile kugu yi guvagere:

⁴ «Ave gari enu, pasi mutu ane kame medombi, dimosi dyatsyemuge, agusisi motsu mane gugubinge disetsyemuge kwange neve agudyenine?

⁵ Ve yandi gudyenine, agulu mugangu, agudisunze mu mesambeke.

⁶ Akwende ne dyoni gu dimbu akurombe mbatsi tsi andi, ruganu duyayanu mbare didombi dyami ditsibe ditsyemuge nyadyene.

⁷ Munongumosi, nyanwambili, gugube mugangu neni gu nzambi gukyelu muvagitsi mabi wumosi wanzinge, wakaluli mutsageninu, vyagunu ne megumi kambumosi me batu ne batu kambumosi bapikili re besungeme.»

Doli yitsyemuge, yilabene

⁸ «Kundanu gulu, pasi mugetu ane digumi difure, yimosi yatsyemuge, negungenze asagwende gwebangise lambi, akugombule ndagu, akukebe fure yine ne dikengi kwange neve aguyenine?»

⁹ Ve aguyenini, agurombe mbatsi tsi andi ne botsu batsageni ve mbeke andi, akubambile re «Dubyanu ne mugangu mbare fure yisetsyemuge nyayene.

¹⁰ Munongumosi, nyanwambili gumugangu ve wusu yanze tsi Nyambi gukyelu muvagitsi mabi wumosi wanzinge, wafungule bitsimbu bi andi.»

Kugu Mwane wutsyemuge alabene

¹¹ Sesu negukunde gwambile re «Mutu ayibange ne bane bebeyi.

¹² Mugegi kwambile taye re pegi dyami dikabu di meboti, taye negugabe meboti mandi ne bane babeyi.»

¹³ Tsufu neguvyoge, mugegi negusumbise meboti mandi motsu. Ayende ne doli tsine gu bulongu burageme. Gune akube ne mutsageninu wu sandi wuboti, akepakile yunze doli tsibe nandi.

¹⁴ Vane, doli tsyotsu neguvu, mundale neguruge gu bulongu bweni, akupakile gukambilu ne meboti.

¹⁵ Ayende gwedyanze gumbu mutu bulongu bune. Mutu wune amutinde gwedyanze, gwebandekene ngulu.

¹⁶ Arondange guyi nesi biguye bi ngulu, tumbe gusabange mutu gumuvege byoni.

¹⁷ Vane, yandi beni negupikile, negwekwambile re «Gumbu taye ami bedyanzitsi bandi bene mbili biguye. Menu negufungu ne nenzale gugu.

¹⁸ Nikagabugi gumbu taye ami, nigwemwambile re Tate, nyatsimbu ve misu me Nyambi neve misu magu.

¹⁹ Nzegandi ne dinyange digunengu re mwane agu, mbongi munongumosi ne bedyanzitsi bagu.»

²⁰ Agabuge gumbu taye andi. Mwane mbe kitage, taye negumwene akumulu ngebe, negwende mbangu gwemusambegene, negu mugumberene veveni.

²¹ Vane, mwane negwambile taye andi: «Tate, nyatsimbu ve misu me Nyambi neve misu magu. Nzega ne dinyange digunengu re mwane agu.»

²² Tumbe taye negwambile bedyanzitsi bandi re «Beganu mbangu mbangu bidwaru biboti, mudwarisyanu, muveryanu moru mu mulembu ne pondu mu metambi.

²³ Bonganu pagese yavonge, yibokyanu, duyanu, dubyanu ne mugangu.

²⁴ Mbare mwane ami wuwu mbere amafu, amakunde rambuge. Mbere amatsyemuge, amakunde labene.» Vane, bepakile guyaye.

²⁵ «Gigumbi gine, mwane givunde ayibange gu byambe. Neguruge, nesi aguvuduge gu ndagu akulu nimbu ne muyangu wu batu beginange.

²⁶ Negurombe mudyanzitsi negumwivule “Agye gike gu ndagu gune?”

²⁷ Mudyanzitsi negumwagule re “Mwane taye agu maruge, taye agu maboke pagese yivonge, mbare aseruge pembi ne polu.”

²⁸ Mwane givunde negutibe kabu, negubuse gwengene gu ndagu. Taye andi aruge gusemulembige nonge akwingene.

²⁹ Tumbe ne gwagule taye andi: “Yulu, guke mbili mipume, nyakudyanzili, nyakudedugili nesi nane wusebetsipege nesi mwane tabe nikuyaye ne mbatsi tsi ami.

³⁰ Mwane agu wuwu amaye doli tsi agu ne bane be begetu. Amakuruge, wumaboke pagese yivonge gukyelu andi.”

³¹ Vane, taye negumwagule re “Mwane ami, gigumbi gyotsu wunami, byotsu binami bi agu.

³² Tumbe dinonge re dubi anu ne mugangu, duvagi anu mumengu, mbare mwane taye agu wuwu mbere amafu, amakunde gabuge monyu. Mbere amatsyemuge, amakunde labene.”»