Évangile selon Luc 11 - Gisir

Sesu ganenzi dulembu

¹ Wisi mosi, Sesu lembange ve mbure. Negumane lembe, mubingitsi andi wumosi negumwambile re: «Fumu dunenzi gulembe neve San anenzile bebingitsi bandi.»

² Ne gubambile re: «Pasi nwalembi yambilanu re “Taye etu, nonge batu botsu beyabi re dine di agu di rereri. Bulongu bu agu burugi.

³ Duvegi biguye bi wisi wotsu.

⁴ Bunzule bitsimbu bi etu byotsu mbare yetu gwandi dwanyesi ke pagere mutu waduvagi dyambu dibi. Wuyasinge re mirime mi etu mimangu.”»

⁵ Sesu ne gukunde bambile re «Pasi re vegari enu wumosi ane mbatsi yamurageseniu time dibeti, gusemwambile re “Mbatsi nzombisi pembi yireru.”

⁶ Mbatsi ami yimosi ya rugili gu muvevilu ya tagene gu ndagu nzandi ne biguye bigumuvege.

⁷ Pasi gu gari ndagu andi mbatsi yine negumwagule re “Wuyanzugise mune ndagu ami wabandeme. Bane bami ne mebeni dwaningile nzabenze kunde rambuge gusekuvege pembi.”

⁸ Nyanwambili, nesi asarambuge gusemuvege pembi mbare ayi mbatsi andi, agurambuge mbare asamusisi kindi kindi. Agumuvege byotsu bi yandi garondi.

⁹ Menu nyanwambili, yivulanu Nyambi gigumbi gyotsu agunuvege. Kebanu nugusupugile. Dukitsanu agunutsibulile.

¹⁰ Mbare kepagere mutu wagwivuli aguvegu. Wakebi agudile. Wadukitsi agutsibulilu.

¹¹ Taye nye vegari enu pasi re mwane gamwivuli gisonzi agumuvege nyoge ve givinge?

¹² Pasi re amagwivule diki di guye, akemuvege kuru?

¹³ Pasi re yenu batu babi nwayabi vege bivave biboti bane benu. A dibandu gye Taye etu yi gu nzambi saguvege Dinyuni Diboti batu botsu bamwivuli.»

Sesu beluse dibabe

¹⁴ Wisi mosi Sesu sanze dinyuni dibi dibe mu dibabe. Ve dinyuni dibi divudugile, mutu wune negwambile. Vane batu botsu bekemame.

¹⁵ Tumbe batu bemosi bekwambile re «Ne Belesebule, givunde gi menyuni mabi agasanzili menyuni mabi.»

¹⁶ Bemosi gu gumumange murime bekumwivule re avagi gimage gyarugili gu Nyambi.

¹⁷ Tumbe nevu Sesu yabange pikile tsi awu akebambile re «Pasi re batu be bulongu bumosi bekabokeni yawu ne yawu, bulongu bune bwatsyemugi ndagu tsyaberugi yimosi ne yimosi.»

¹⁸ Pasi Sate kadimbeni ne batu be yandi beni, bulongu bune bugukunde gube dikengi? Nyagwambili nane mbare yenu nwagwambili re nyasanzi menyuni mabi ne Belesebule ya pegi dinyange.

¹⁹ Pasi nyasanzi menyuni mabi ne Belesebule, a batu benu bamesanzi ne gye? Re dibandu yawu beni begube betabulitsi benu be bumbanze.

²⁰ Tumbe pasi re ne ndure Nyambi nyasanzi menyuni mabi bulongu bu Nyambi bwaruge kwange negu yenu.

²¹ Sesu negukunde bambile re «Pasi mutu wune ngudu ne mbili birwaninu agabandekeni ndagu andi ne meboti mandi mesabenze bembu nekepagere mutu.

²² Tumbe pasi mutu wamukibi ngudu veveni amaruge, agudenge mutsingu, agubonge birwaninu bi andi byotsu bi yandi sevagilange gitu, akubigabe.

²³ Mutu wusa mbatsi ami agapini, wotsu wusagukigi nami, agapanzi.»

Dinyuni dibi dyagabugi gu disevudugile

²⁴ Sesu negukunde vere kugu yiyi, pasi dinyuni dibi ditsibange ne mutu dyasanzu, dinyuni dine dyagwendi mu mbure tsyumuge gwenekebe mbure tsi gukolile. Pasi re asadile mbure agagwambili re «Nikagabugi gu ndagu yi nzevudugile.»

²⁵ Ve agugabugile gu yandi sesanzilu agweragesenu ndagu ya gombulu bivave bikinzu dikengi.

²⁶ «Vane, akwende gwebonge menyuni mane gumereru mene buvembe vyagenu nandi, bekwingene gusetsagene gu gari mutu wune. Redibandu, mukengu andi wugube vyagenu ne verege.»

Digobe dingenze

²⁷ Gigumbi gi Sesu yambililange nane, gube mugetu wukwamuge gu yulu vegari dibundu negwambile re «Mule gu mugetu wukubure, negukunwise dibeni.»

²⁸ Tumbe Sesu negumwagule re «Mule vyagunu gu batu bagulu musamu Nyambi ne gumubandekene gu mirime mi awu.»

Batu bagwivuli bimage

²⁹ Nevu batu beruge mbili ve mbeke andi, negumutsyenge akubambile re «Dilale didi, dilale dibi. Dyakebi gimage gyarugile gu Nyambi. Nzagunurigitse gimage gi nzusu vengu ka gi mubigitsi Sonase.

³⁰ Mbare nevu Sonase ayibe ndimbu yi batu be Ninive, munongu mosi Mwane mutu agube gwandi ndimbu yi dilale didi.

³¹ Wisi Nyambi gutabulile bumbanze, kanangu mugetu yi bulongu bu Saba, guretseme gengeseni ne batu be nemuni agubevege mbele mbare agarugili tage gusegulu musamu wubase ne dyele di kanangu Salomu. Vave ve mutu wu vyagenu ne Salomu.

³² Wisi Nyambi gutabule bumbanze, batu be Ninive beguretseme ve wusu dilale di nemuni. Begubevege mbele mbare bisi Ninive bekalule mutsageninu ve besingile musamu wu Sonase benenze. Tumbe mutu wuve gari enu ayi vyagenu ne Sonase.»

Disu giyalele gi nyuru

³³ Sesu nekunde gwambile re «Gusandi mutu wabangisi lambi re akukunde yikubige ne mulumbu. Tumbe agayikobigi ve dusongu gu yulu nonge batu bagwingeni gu ndagu yine bekelabe giyalele.

³⁴ Disu di agu lambi yi nyuru tsi agu. Pasi disu di agu di polu, duyuru du agu dwotsu dugu giyalele. Tumbe pasi disu di agu dyabeli duyuru du agu dwotsu gwandi dugu diviseme.

³⁵ Bandekene giyalele gi nagu giyakaluge diviseme.

³⁶ Pasi re duyuru du agu dwotsu dugu giyalele gi Nyambi. Dusandi nesi ne mwe mbure yigu diviseme, dugube dwotsu gu giyalele, neve lambi galabisi giyalele gi andi.»

Sesu gabigisi Farisi ne bivunde bi migage mi Moyise

³⁷ Sesu negumane nenze, Farisi yimosi yikuruge guselembige Sesu nonge akweguye gu mbu gi andi. Sesu negwingene, atsambe ve tavuli.

³⁸ Farisi negulabe re Sesu asagunge mekake nesi aguye akumame.

³⁹ Tumbe Sesu negumwambile re «Yenu Farisi nwagungi dimogi ne gipele gunzime gu gari gubase ne mwinzi.

⁴⁰ Bimbesi, byeni nwayabi re awukinze gu kane re wukinze gu gari?

⁴¹ Veganu bigaye meboti me yenu beni nwarondi ne murime mosi. Pasi re nwavage nane nugube rereri ve misu me Nyambi.

⁴² Milogu gu yenu Farisi mbare nusarondi gube nusungeme ne guronde Nyambi, nesi nane nwavegi Nyambi gimosi gu digumi di bivaru bi enu byotsu, mekadumbe, bukulu.

⁴³ Milogu gu yenu Farisi mbare nwarondi bongange bipu birege bi bundumbe gu ndagu ndembu. Nwarondi pasi banuvegi mbulu ve piti batu bekunugobisange.

⁴⁴ Milogu gu yenu mbare nu munongu mosi ne pesi tsisalabeni, batu batsitsarili mbare besatsyeni.»

⁴⁵ Givunde gimosi gi migage mi Moyise negwambile Sesu re «Mulonzi, ve wagwambili nane gusyenge wadusyengi yetu gwandi.»

⁴⁶ Sesu negumwagule re «Milogu gu yenu gwandi bivunde bi migage mi Moyise mbare nwanagusi batu mifune mitsire mi yenu beni nusarunguli nangule nesi gutsitse ne mulembu.

⁴⁷ Milogu gu yenu mba nwarungi pesi tsi boti tsi bebigitsi be taye tsi enu beboke.

⁴⁸ Nu mbeyi tsisinge mambu me taye tsi enu bevage mbare yawu beboke bebigitsi yenu negurunge ndagu tsi pesi tsi awu.

⁴⁹ Dibandu Nyambi ya yabi mambu motsu agagwambile re: “Nigubetindile bebigitsi ne bilumbi bi musamu ami. Beguboke bemosi, begukwane befimbe.”

⁵⁰ Re dibandu batu be dilale didi be gwivule melungu me bebigitsi botsu beboku ne buvembe bu batu pakile ve Nyambi kinzile bulongu.

⁵¹ Pakile melungu me Abel, kwange ne melungu me Sakari aboku ve gigagari gi ndagu yi rereri ne gitale gi pagu. Negungenze Nyambi gwivule dilale didi.

⁵² Milogu gu yenu bivunde bi migage mi Moyise, mbare nwatsibige nzile yabegi gu Nyambi. Yenu beni nusabingi nzile, nwakali batu barondi yibinge.»

⁵³ Sesu neguvuduge gu ndagu yine, bivunde bi migage mi Moyise ne Farisi bekumutibile kabu neni. Bekumwivulange mbili ngoku nonge akwambile ke pagere dyambu.

⁵⁴ Bekebange dyele digu mufuregile dyambu ne mambu me yandi beni gwambile.