Évangile selon Luc 1 - Gisir

Dibandu di gilombi

¹ Tate Tyofile, mbili batu bemange gurende gilombi gi mambu me monyu ne dufu du Sesu nevu givyogile vegari awu.

² Batu bane berende neve begyulilu ne mbeyi tsilabe ne misu pakile ve dibandu. Yawu botsu bekukaluge bedyanzitsi be Nyambi.

³ Re dibandu menu gwandi nzeronde kebe dikengi nevu divyogile pakile ve dibandu di gilombi gi duburu du Sesu. Nzekurendile gilombi gine dikengi nevu mambu mane mevyogile.

⁴ Nonge wukuyabe re mambu me ndyayu wuse nenzu mambu me ngenze.

Tsangu yi duburu du Sambatisete

⁵ Gigumbi gi Erode abile kanangu gu bulongu bu Sudé, gubange muvegitsi pagu wunengungu re Sakari wu dibundu di gidyanzu di Abya. Mugatsi andi gwandi ayibange mwisi tsapele yi Aron dine di andi Elisabete.

⁶ Yawu botsu babeyi babange besungeme ve wusu Nyambi begobisange migage myotsu mi Fumu.

⁷ Tumbe besabange ne bane mbare Elisabete yibange gingume yawu botsu babeyi mbere banune.

⁸ Wisi mosi Sakari vagange gidyanzu gi andi gu ndagu Nyambi. Mbare gigumbi gi dibundu di andi.

⁹ Sakari salu ne gingane nevu bevagilange ne mbetsi gu mugulu awu, gu gwingene gu ndagu yi rereri gu mbure yi nyenzilungu make me gigagange.

¹⁰ Gigondu gyotsu gi batu gibange gukane mu dulembu gigumbi gi Sakari nyenzilange make me gigagange.

¹¹ Vane, Sakari yingene gu ndagu Nyambi yanze yi Fumu muvudugile tsutsudu meteli ve mebagele me gitale gyanyenzilu make me gigagange.

¹² Sakari negulabe yanze, negutsyemugilu pikile agangu ne wome.

¹³ Tumbe yanze mwambile re «Sakari, wuyadume. Nyambi magwagule ndembu agu, mugatsi agu Elisabete gukuburile mwane dibagele wugumuvege dine di San.

¹⁴ Agube gumbu gi agu dibandu di mugangu neni. Mbili batu gwandi begube ne mugangu ve aguburilu.

¹⁵ Mbare agube mutu muneni ve wusu Fumu. Asemuvege mugage re asagunu melamu magotsu. Agube abase ne Dinyuni diboti nesi aguburu.

¹⁶ Agugabuse mbili bane be Iserayel gu Fumu Nyambi awu.

¹⁷ Aguruge gere gilumbi gi Nyambi ne dinyuni ne ndure mubigitsi Eli. Gere Eli, mwane agu agubege polu ve gari biburu ne bane be awu. Agukalule mirime mi bisi besagobisi Nyambi, sige begube ne pikile gere batu besungeme. Nane begube gukyelu Fumu bumongu bukike.»

¹⁸ Sakari negwambile re «Menu, nyanune. Mugatsi ami gwandi, gigumbi gi gubure gyavyoge. Avane niguyabile re diwanyambile dine dyambu dingenze?»

¹⁹ Yanze negumwagule re «Dine di ami Gabireyel, ni meteli ve wusu Nyambi gu mudyanzile, nzerumu gusekubegile tsangu boti.

²⁰ Yulu, wugube dibabe kwange ne wisi mambu mane megulabene. Mbare wusasinge dimenu nzekwambile, mbare digulabene gigumbi gi Nyambi yandi beni tsonzige.»

²¹ Gigumbi gine, gukane, bumongu bevingilange Sakari, bemamange dibandu di agatsingili gu gari.

²² Neguvuduge, asekunde rungule bambile. Batu neguyabe re aselabe gimage gu gari ndagu yi rereri. Akubambilange kane bingane mba mbe ake dibabe.

²³ Ve tsufu tsi andi tsi gundyanze gu gari ndagu Nyambi tsivilu, akugabuge gu mbu gi andi.

²⁴ Mwe gigumbi neguvyoge, mugatsi andi Elisabete negube ne dimi, akwekuswegange ne dimi di migweli miranu. Akekwekwambilange re

²⁵ «Labe, di Fumu mapage, nzibange ne gisoni vegari batu bami mbare nzaburange, gere Fumu ma kengise amagusule gisoni gi ami.»

Tsangu duburu du Sesu

²⁶ Dimi di Elisabete negube ne migweli misyamenu, Nyambi kurume yanze Gabireyel, gu dimbu di Nasarete di yadi Galile.

²⁷ Gumbu numbe yise betsi yabe bebagele yabandu gu dionge ne mutu wanengu re Sosefe. Wu tsapele yi Kanangu Davide. Dine dinumbe eni Mari.

²⁸ Yanze yine negwingene gumbu gi andi, negumwambile re «Nyakuvegi mbulu Mari, yibe ne mugangu, ndiayu wutse vegu gyesi. Fumu ayi nagu.»

²⁹ Mari akutsyemugilu pikile gukyelu dyambu di mwambile yanze. Negu kwekwivule re «A dibandu gye agapegili mbulu munongu wune?»

³⁰ Yanze ne gumwambile re «Wuyadume, Mari, mba wadile gyesi ve wusu Nyambi.

³¹ Yulu wugube ne dimi, wugubure mwane dibagele wugumuvege dine di Sesu.

³² Agube mundumbe. Agunengu re Mwane Nyambi Yulu. Nyambi gumuvege gipu gi budumbe bu Davide mukoku andi.

³³ Agube kanangu gitsapele gi Iserayel mwendu ne mwendu. Bundumbe bu andi bugube peke peke.»

³⁴ Mari negwambile yanze re «Niguyabile re nine dimi tsye? Nzebetsi yabe bebagele.»

³⁵ Yanze negumwagule re «Dinyuni diboti diguruge gu ndyayu, ne ndure yi Nyambi Yulu yi gukufugemine ne gidunze gi andi. Re dibandu mwane wu rereri wu ndyayu gubure agunengu re mwane Nyambi.»

³⁶ Yulu, Elisabete giburu gi agu, yandi gwandi ake ne dimi. Agubure mwane dibagele gu bununu bu andi awuse nengungu re gingume. Ayibili ne dimi ake ne migweli misyamenu.

³⁷ Mba Nyambi asa ne dyambu di yandi galembu.

³⁸ Mari negwambile re «Ni mudyanzitsi Fumu. Nyambi a pagi nevu wusegwambilile.» Yanze musise.

Mari magwende gwelabe Elisabete

³⁹ Gigumbi gine gyamosi, Mari negurambuge negwende mbangu mbangu gu gyari gi mikongu, mi dimbu digu gari yadi Sudé.

⁴⁰ Neguvuduge, Mari kwingene gu ndagu Sakari, neguvege Elisabete mbulu.

⁴¹ Elisabete negulu mbulu yi Mari, mwane wugu difumu negukognuge. Elisabete negubegisu ne Dinyuni diboti.

⁴² Akwamuge veveni re «Mari, wavegu mule vegari begetu botsu. Mwane wu gu difumu di agu gwandi a ne mule.

⁴³ Adise pakile re tsye di nguye Fumu ami arugi kwange gu menu?

⁴⁴ Ne gungenze nyayabe re wu nguye Fumu ami, mbare gigumbi gi nzegulilu mbulu agu, mwane gu difumu sekognuge ne mugangu.

⁴⁵ Yibe ne mugangu mba wutsibe ne gitu, re Fumu gudyanze motsu me yandi tsekwambile.»

Dumbu du Mari

⁴⁶ Mari negwambile re «Fumu, nyakugobisi ne murime ami wotsu.

⁴⁷ Nine mugangu gukyelu Nyambi mwobutsi ami.

⁴⁸ Mbare amagengise mudyanzitsi andi wusa ne musumbu mu bulongu. Melale me guruge gu nzime ami me gukobise.

⁴⁹ Mbare Givange vange amavage mambu meneni gu menu, dine di andi di rereri.

⁵⁰ Gigebe gi andi gi gunege mu melale motsu me batu ba mudumi.

⁵¹ Nyambi ne ngudu andi arinise mu mbure tsyotsu batu babange ne pikile tsibi tsi gukwe rigitse, gu mirime mi awu.

⁵² Amabonduse batu babe ne menyange meneni. Apandise batu bakwesunzi.

⁵³ Nyambi abungule batu babe ne nzale. Bisine asebevege ke pagere givave.

^54-55 Nyambi maruge guse gwamuse batu bandi be Iserayel. Atunge pangeni ne mikoku mi etu, ne Aberam ne melale mandi motsu, re aguruge guse gwamuse bedyanzitsi bandi bane be Iserayel. Aselibegene pangeni andi, yi gigebe gi mwendu ne mwendu.»

⁵⁶ Migweli mireru mi Mari mane gumbu Elisabete negusuke, Mari kugabuge gumbu gi andi gu Nasarete.

Duburu du Sambatisete

⁵⁷ Gigumbi gi Elisabete gi gubure ne guduke, akubure mwane dibagele.

⁵⁸ Batu be dukeseni nandi ne biburu bi andi bekulu re «Fumu mamurigitse gigebe gi andi.» Yawu botsu babe ne mugangu neni.

⁵⁹ Mwane negudugise tsufu yine ne guyireru, mutsufu ginane, batu beruge guselabe neve batabulili mwane purenziye. Biburu bimosi beronde muvege nduge yi Sakari dine di taye andi.

⁶⁰ Tumbe nguye mwane negwambile re «Nesi agunengu re San.»

⁶¹ Bemwambile re «Gu gitsapele gi agu gusa mutu ne nduge yine.»

⁶² Bevagange bingane gu gyari gi Sakari, bekuyabe nduge yandi garondi vege mwane.

⁶³ Sakari negwivule ne gingane girini gi timbi ne musunde pembi negurende re «Dine di andi San.» Batu botsu negumame.

⁶⁴ Vane ne vane, munu andi negutsibuge dulimi du andi negunamuge sige ayambile dikengi. Akokisange dine di Nyambi.

⁶⁵ Vane, batu botsu betsagenange beli nandi bekugangu ne wome Nyambi, ne betsagenange gwandi gu mikongu myotsu mi Sudé, bekwambesenange mambu motsu neve metsevyogile.

⁶⁶ Tumbe botsu bulu mutangu wune, bekupikilange gu mirime mi awu re «Mwane wune agube tsye?» Negungenze ngudu Fumu yi nandi.

Dumbu du Sakari

⁶⁷ Sakari taye andi negubegisu ne Dinyuni Diboti nonge akuyabange mambu ma rugili gu Nyambi negwambile re

⁶⁸ «Didume gu Fumu Nyambi yi Iserayel mba amabambene ne bane bandi gusebobule.

⁶⁹ Nyambi amadutindile mwobutsi guse gobule bane be Iserayel, be gitsapele gi kanangu Davide mudyanzitsi andi.

⁷⁰ Nyambi yambile bebigitsi bandi mbetsi, bebigitsi gwandi bekwene nenze musamu wune gu batu botsu re

⁷¹ Mugobutsi wuguse dwobule gu batu babi, ne botsu baduvini.

⁷² Nyambi vage motsu mane gu gurigitse gigebe gi andi gu taye tsi etu, aselibegene pangeni yi atunge nawu.

⁷³ Neve atunge pangeni ne Aberam mukoku etu.

⁷⁴ Aleve re pasi amadwobule mu mekake me bevinitsi betu, dusakunde gube ne wome gudyanzile Nyambi.

⁷⁵ Tsufu tsyotsu tsi monyu etu gutsi, durigitsi anu wuboti wu Nyambi garondi, dugugobise migage mi andi.

⁷⁶ Mwane ami, batu be gukunenge re mubigitsi wu Nyambi Yulu. Mba wugwendange ve wusu Fumu gwetsonzige mirime mi batu nonge bekusinge Fumu.

⁷⁷ Wugutsonzige mirime mi batu nonge bekuyabange re Nyambi gubobule, agubunzule bitsimbu bi awu.

⁷⁸ Nyambi etu abase ne gigebe ne girondu. Agudubangisile giyalele gi Nyambi, munongu mosi ne giyalele gi dyumbi gu yulu.

⁷⁹ Neve dyumbi ve dyavudugili dyasanzi diviseme. Mugobutsi gwandi ve agurugile agusegwamuse batu batsageni gu diviseme, bagulu wome gufu, gu guberigitse neve begubegilange monyu yi pembi ne polu.»

⁸⁰ Gigumbi neguvyoge, mwane negukubuge akudyolange mu dinyuni. Atsagenange kagu kumu kwange ne wisi wu yandi beni akwerigitse ve wusu bane be Iserayel.