Actes 9 - Gisir

Sol marombu ne Sesu

¹ Gigumbi gine, Sol ne pikile ke yi gukwane ne guboke bane be Fumu. Negwende gwelabe givunde gi muvegitsi pagu

² negumwivule bisangumu bi bivunde bi ndagu tsi ndembu tsi Damase, bya muvegi dinyange. Pasi, atseragene batu, bebagele ne begetu babingi nzile Fumu Sesu, agubenze begange negubebege gu Serisalem.

³ Sol mbere ki munzile, ake beli ne yadi Damase. Vane ne vane, giyalele girugile gu nzambi gimutsyenge.

⁴ Aberuge vetsi negulu dyufi dyamwambili re «Sol, Sol, gye gi wakwanini?»

⁵ Sol ne gwivule: «Ndya nye Fumu?» Dyufi ne gwagule: «Ni Sesu yi wakwani.

⁶ Tumbe rambuge, yingene gu yadi, vane, begukwambile di wuguvage.»

⁷ Gilonge gi andi gi mwendu gisikeme, nesi gubakule. Bagulu dyufi tumbe besalabi mutu wagwambili.

⁸ Sol rambuge misu mwasi, tumbe akene pafu. Bemugange mu dikake gu gumubegise gu Damase.

⁹ Abe ne pafu mu tsufu yireru, nesi guye nesi gunu.

¹⁰ Gubange gu Damase mubingitsi Sesu wanengu re Ananyas. Fumu muvudugile gu ndosi amwambile re «Ananyas.» Ayagule: «Fumu, me yandi wuwu.»

¹¹ Fumu mwambile re «Yende ne mesavu mu nzile yi Sungeme, yingene gu ndagu Suda, yivule dibagele di mwisi Tarese dyanengu re Sol. Gulembe galembi,

¹² gu ndosi, aselabe dibagele dyanengu re Ananyas ditse gwingene negu mutsabige mekake nonge akulabe.»

¹³ Ananyas yagule: «Fumu, mbili batu betse nyambile me dibagele dine, nyayabi mabi motsu me yandi tsivage bebingitsi bagu gu Serisalem.

¹⁴ Sige atseruge gunu ne dinyange ditse muvege bivunde bi bevegitsi be pagu gwenegange botsu balembi gu dine di agu.»

¹⁵ Tumbe Fumu mwambile re «Yende, ragene dibagele dine. Nyamusale, agundyanzile gu guyabise dine dyami mu beni ne kanangu tsi awu, negu bumongu bu Iserayel.

¹⁶ Nigu murigitse me beni motsu me agukengile gukyelu ami.»

¹⁷ Ananyas yende. Ayingene gu ndagu, atsabige Sol mekake amwambile re «Mwate Sol, Fumu Sesu, yitse kuvugile munzile, atsetume nonge wukulabe ne gubase ne Dinyuni Diboti.»

¹⁸ Vane ne vane, megagele musuge mu misu me Sol vane alabe. Arambuge sige abatisu.

¹⁹ Vane, aye, ngudu tsimugabugile. Sol tsagene betsufu ne bebingitsi be Sesu be Damase.

Sol gagwanzi musamu boti gu Damase

²⁰ Vane ne vane ayende ne gwanze musamu boti mu ndagu tsi ndembu tsi Sif, re Sesu mwane Nyambi.

²¹ Botsu bemulungu besutu bivulange re «Sa yandi tse kwanange gu Serisalem botsu betse lembange mu dine di Sesu? Asarugile gunu ne mekasi gwene begange ne gubebege gu bivunde bi bevegitsi be pagu?»

²² Tumbe Sol gagwambili ne bureti. Agarigitsi re Sesu ayi Kirisete mwobutsi. Sige Sif tsya tsageni Damase tsisegandi guyabe di gumwagule.

²³ Mwe gigumbi neguvyoge, babe ne pikile yigu bokise Sol,

²⁴ tumbe beku munweritse dugwegu du awu. Bekugwasange mingeninu mi yadi, nyangu ne dibeti beku muboke.

²⁵ Vane bebingitsi be Sol bemubege gu gari ponzi dibeti, gu gumuvyose disimu dine di murumbe yadi.

Gu Serisalem, Barnabase rigitse Sol ve bilumbi

²⁶ Neguvuduge gu Serisalem, Sol mange ragene bebingitsi be Sesu, tumbe botsu bene wome, mbare besabange ne gitu re yandi gwandi ake mubingitsi Sesu.

²⁷ Barnabase mubonge negumubege gu bilumbi. Abambile nevu Sol labile Fumu mu nzile, nevu Fumu mwambilile. Abambile gwandi nevu anenzile ne bureti mu dine di Sesu gu Damase.

²⁸ Gigumbi gine, reve Sol abile nawu, agagwendi gagabugi gu Serisalem, negunenzange ne bureti mu dine di Fumu.

²⁹ Agabengune ne Sif tsya gwambili dilongu di girek ayambilange nawu, tumbe yawu bekebange gu mubokise.

³⁰ Ve bane be Nyambi bedyulilu, bemubege gu Sesaré, sige bemwenze gu yadi yi Tarese.

³¹ Gigumbi gine, dibundu dike polu, gu Sudé, gu Galile ne gu Samari. Dyadyole mu gitu dyatsageni kene gugobisange Fumu, ne ngudu Dinyuni Diboti bane be Nyambi bafuni ke fune.

Ené mabeluge

³² Pyere nangange bulongu bwotsu, wisi mosi ayende gu bane be Nyambi batsageni gu Lida.

³³ Gune aragene dibagele dya nengure Ené melamine ve tangi andi mu mipume ginane, ne membogelotu.

³⁴ Pyere mwambile: «Ené, Sesu Kirisete kakubelusi! Rambuge bonge ditogu di agu!» Arambuge vane ne vane.

³⁵ Batu botsu be Lida ne Saru bedyene, begeluge gu gyari gi Fumu.

Tabite rambusu gu dufu

³⁶ Gu Safa, gubange mwane Nyambi mugetu dine di andi Tabite gu dilongu di gereke, «Dorekas», re guvage re tsyesi. Avyosange gigumbi kaguvagange meboti ne gwamusange bigayi.

³⁷ Wisi mosi akugangu ne gubele afu. Bebwitse gibindi, bekisunze gu girini gi ndagu ndiki.

³⁸ Bebingitsi be Safa belu re Pyere ayi gu Lida, beli ne Safa. Berume batu bebeye gwegwambile Pyere re «Kokolu, ruge ne mesavu gu mbu gi etu!»

³⁹ Pyere yende nawu vane ne vane. Ve avudugile, bemubege gu ndiki. Bekwili botsu beruge ve yandi ne gulile, bemurigitse ngoye ne bidwaru bi atobange ve ayibilange monyu.

⁴⁰ Pyere vuduse batu botsu, akuteme negulembe. Vane ageluge gu gyari gi gibindi ayambile re «Tabite, rambuge!» Atsibule misu, ve alabile Pyere, atsagene.

⁴¹ Pyere mugange dikake amurambuse. Sige anenge bane be Nyambi ne bekwili, aberigitse Tabite monyu.

⁴² Tsangu yipanzige ne yadi yotsu, mbili batu bevagile Fumu gitu.

⁴³ Pyere tsagene gigumbi gu Safa gu mbu mudyanzitsi bikate, wanengure Simu.