Actes 8 - Gisir

¹ Sol abe dimosi ne batu be boke Etyene. Wisi wune re wupakile dikwanu di dibundu di Serisalem. Bane botsu be Nyambi, vengu ka bilumbi bi Sesu, bepanzige mu binange bi Sudé ne Samari.

Sol gakwani dibundu di Fumu

² Batu bagobisi Nyambi betsige Etyene negumulile veveni.

³ Tumbe Sol rondange ke panze dibundu. Ayendange mu ndagu tsyotsu, gwene vuduse bane be Nyambi, bebagele ne begetu, negubevere gu nzugu.

Filip ganenzi musamu boti gu Samari

⁴ Bane be Nyambi bepanzegene bendange ke pagere mbure, gwe ne gwanze musamu boti.

⁵ Filip yende gu yadi fimbe yi Samari, gwenegwanze Kirisete mwobutsi.

⁶ Bumongu di awu dimosi, bekutisange me Filip yambilange. Mbare bagulu ne gulabe mambu me range megavagi.

⁷ Menyuni mabi mavudugi mu mbili batu ne myamu mineni, mbili membogelotu ne bipitsu bebeluge.

⁸ Vane gube muyangu neni gu yadi yine.

⁹ Mutu wanengu re Simu tsagenange gu yadi yine. Avagange ngalu-ngalu amamisange mbili batu gu Samari. Ayambilange re ayi mutu didume.

¹⁰ Bane begegi ne binunu byotsu, bemukutisange. Bambilange re «Mutu wuwu, ndure Nyambi, yanengu re “Ndure Neni!”»

¹¹ Veke gigumbi, Simu gamamisi mbili batu ne ngalu-ngalu andi, re dibandu bamulilu dikengi.

¹² Tumbe ve Filip benenzile musamu boti wu Sesu Kirisete ne wu bulongu bu Nyambi. Botsu bene gitu, bebagele ne begetu, bebatisu.

¹³ Simu yandi beni akube ne gitu, akubatisu sige asekunde pasugange ne Filip. Negulabe bimage ne mambu meneni, yandi gwandi akamami!

¹⁴ Gu Serisalem, bilumbi bi Sesu negulu re batu be Samari badile musamu Nyambi, bekuberumine Pyere ne San.

¹⁵ Ve vudugile bilumbi bya beye gu Samari, belembe nonge botsu be ne gitu bekudili Dinyuni Diboti.

¹⁶ Mbare Dinyuni Diboti mbere disebetsi sunde mu kepagere mutu vegari awu. Betsibatisu ke mu dine di Fumu Sesu.

¹⁷ Vane Pyere ne San be betsabige mekake, sige bedile Dinyuni Diboti.

¹⁸ Simu negulabe re botsu bene gitu badile Dinyuni Diboti negutsabigu mekake ne bilumbi. Re dibandu avegile Pyere ne San doli

¹⁹ negubambile re «Pegyanu menu gwami ndure yine. Nonge wotsu wu nigutsabige mekake, adili Dinyuni Diboti.»

²⁰ Tumbe Pyere negumwagule re «Doli tsi agu tsi bungeni, ne ndya beni gwandi! Wapikili re wu benze sumbe ne doli gi Nyambi gavegi mwenzegeli.

²¹ A dya vyogi gugu sa di agu wusa ne dinyange digube vane! Ve wusu Nyambi, pikile agu yisa yiboti.

²² Yabe re di wutsevage disa diboti kalule pikile, lembe Fumu, mandi agunyese pikile tsibi tsine.

²³ Yi, nyalabi re wubase ne migangu, wugu nzugu mabi!»

²⁴ Simu ne gwagule Pyere ne San «Lembanu Fumu yenu beni gukyelu ami, nonge motsu me nutsegwambile me tsatse tugile.»

²⁵ Bilumbi bya beyi ne gwambile me belabe, ne gwegwanze musamu Fumu, sige begabuge gu Serisalem. Mu nzile, benenenzange musamu boti mu mimbu me Samari.

Gibengunu gi Filip ne mundumbe Gityopi

²⁶ Yanze Fumu ne gwambile Filip: «Yende gu gyari gi bande, gu nzile ya gwendi gu Serisalem kuange Gasa. Gigumbi gigi gu sandi mutu munzile.»

²⁷ Vane ne vane Filip negwende. Munzile, negubengune ne dibagele di vangulu gere tabe, mwisi Gityopi, mundube neni. Yandi re gabandekeni menive motsu me Kandase, kanangu mugetu yi Gityopi. Aruge gu Serisalem gutse lembe Nyambi.

²⁸ Negumane lembe, ve gugabuge gumbu gi andi, metsagene gu gari gyendilu gi andi gya dutu ne kalebe, atangunange gisangumu gi mubigitsi Esayi.

²⁹ Dinyuni Diboti ne gwambile Filip: «Dute, yende kwange ve gyendilu gine!»

³⁰ Filip yende mbangu negulu mwisi Gityopi gatanguni gisangumu gi mubigitsi Esayi. Filip negumwivule: «Ke wagulu me watanguni?»

³¹ Mutu wune ne gwagule: «A nigulilu tsye gusa mutu wanenzi?» Arombe Filip gu gunangeme mu gyendilu negutsagene ve mbeke andi.

³² Atangunange gisangumu gi Esayi ve rendu re «Ayi gere didombi dyabegu gweboku, gere mwane didombi wusarapi ve gatsakilu minyoni.

³³ Agarangu gu kulegeni, nesi miranu asevegu. Nye benze gwambile di bane bandi? Gusa mutu, mbare adumbu monyu andi gutsi nesi agube ne bane.»

³⁴ Gityopi negwivule Filip: «Kokolu tsi agu, nyambili mubigitsi gagwambilili nye? Yandi beni vo mutu nzusu?»

³⁵ Vane Filip negwambile. Pakile ve mirendu mi gisangumu gi Esayi, negumunenze musamu boti wu Sesu.

³⁶ Munzile bevuduge ve mwemambe. Gityopi negwambile Filip: «Labe mambe, gye gya kali re nibatisu?»

³⁷ [Filip mwambile re, «Gere wune gitu gu murime agu, wubenze batisu.» Gityopi re «Yi, nine gitu re Sesu Kirisete mwane Nyambi.»]

³⁸ Asikige gyendilu, Filip ne Gityopi besunde gu gari mambe, Filip mubatise.

³⁹ Ve bekatugile gu mambe, Dinyuni di Fumu dyusele Filip. Gityopi se kunde mwene, tumbe abinge nzile andi ne mugangu.

⁴⁰ Filip ake gu Asote, sige ayende gu Sesaré. Mu nzile, akwe ne gwanzange musamu boti mu yadi tsyotsu tsi yandi vyogilange.