Actes 7 - Gisir

Gilombi gite Etyene

¹ Givunde gi muvegitsi pagu negumwivule re «Me bagwambili gukyelu agu me ngenze?»

² Etyene ne gwagule, «Bembatsi nami ne be tate, nyulilu anu. Nyambi didume yi vudugile mukoku etu Aberam gu yandi abilange gu Mesopotami, nesi agwetsagene gu Aran.

³ Nyambi mwambile re “Yusuge bulongu bu agu ne gifumbe gi agu, yende gu bulongu bu nigukurigitse.”

⁴ Aberam ne gusuge bulongu bu Babilone ne gwetsagene gu Aran. Vane taye andi ne gufu, sige Nyambi neguvyose Aberam gu bulongu bu nuvu bubu.

⁵ Vane, Nyambi asemuvege ke pagere mbure, nesi mwe ginange gi gusunze byeru, tumbe Nyambi mutungile ndagi, “Nigukuvege bulongu bubu, bugube bu agu, ne bane bagu gu ginzime gi agu.” Lavane, Aberam gigumbi gine mbere asebetsi ne mwane.

⁶ Nyambi mwambile re “Bane be bane bagu begutsagene gu bulongu sabwawu. Vane begukaluge bevige, begukwanu mu kame yine tsi mipume.

⁷ Tumbe Nyambi gwandi yambile re Nigukilise bumongu bugu bekaluse bevige bawu. Sige, begusuge gu buvige beguruge gunu gutsekitse.”

⁸ Sige Nyambi tunge pangeni ne Aberam. Ndimbu pangeni eni, pure nziye. Vane, Aberam tabule mwane andi Isake pure nziye ve adugisile ginane gi tsufu. Isake tabule mwane andi Sakob pure nziye, Sakob gwandi tabule bane bandi pure tsi nziye, digumi ne be beye di begulu betu.

⁹ Begulu betu babe ne dingandi ne mwane taye awu Sosefe. Bemusumbise gere muvige gu Esipete. Tumbe Nyambi abe nandi,

¹⁰ amwobule mu meguge mandi motsu. Amuvege dyele di gwambile ne Farawu, kanangu yi Esipete. Amuvege gwandi gyesi gi gurondu ne kanangu. Kanangu mubyatse ngowu yi Esipete ne givunde gi ndagu andi yotsu.

¹¹ Tumbe gube mundale gu bulongu bwotsu bu Esipete negu bulongu bu Kanan. Mukengu wube wuneni nesi begulu betu bese kunde dengange biguye.

¹² Sakob negulu re gu biguye gu Esipete, negurume begulu betu nyongu rege.

¹³ Ve bemagwendile nyongu mubeye, Sosefe negukweyabise ne bane be taye tsi andi. Farawu neguyabe gitsapele gi Sosefe.

¹⁴ Sosefe neguberume gwebonge taye andi Sakob ne gitsapele gyotsu. Gibe, megumi mane gumereru me batu ne batu beranu.

¹⁵ Sakob yende gu Esipete gu afile, ne begulu betu botsu gwandi.

¹⁶ Bebege bibindi bi awu gu Sisem, bitsigu gu pesi yi sumbe Aberam ne fure ne bane be Emore, gu Siseme.

¹⁷ Gigumbi gi gurigitse ndagi yi Nyambi tunge ne Aberam gike beli. Bumongu bu etu bufunange ka gufune gu Esipete.

¹⁸ Tumbe, ve byalile kanangu yone gu Esipete yiseyabe Sosefe.

¹⁹ Kanangu yine yi tsimbisu bumongu bu etu negukengise begulu betu kwange negubegandise gu kunde rare bane be kali nonge bekufu.

²⁰ Gigumbi gine re gyaburilu Moyise. Givwandi gi mwane, gi Nyambi ronde. Mu migweli mireru, abungulilu gu ndagu taye andi.

²¹ Va musisile biburu bi andi, mwane Farawu wu mugetu amubonge, amubege gu mbugi andi, abungule gere mwane andi.

²² Reve Moyise nengile dyele dyotsu di bisi Esipete negube mutu didume mu gyambitsi ne givagitsi gi andi.

²³ Negudugise megumi mane me mipume, ayibe ne pikele yi gwelabe bane be taye tsi andi bane be Iserayel.

²⁴ Negulabe mwisi Esipete gadimbi mwisi Iserayel. Moyise gu gukane giburu gi andi, aboke mwisi Esipete.

²⁵ Apikile re bane be taye tsi andi begulu re Nyambi garondi mubonge ve mbure mwobutsi awu tumbe bese dyulilu nane.

²⁶ Mbongwali, Moyise negulabe bane bebeye be Iserayel badimbeni. Negubambile re “Bembatsi anu, nu bane be taye. Gye gi nwabokenini?”

²⁷ Tumbe awukwanange mbatsi negumumage amwambile re “Nye tse kubyatse givunde ne nzonzi vegari etu?

²⁸ Warondi mboke nevu wutsebokile mwisi Esipete mesige?”

²⁹ Moyise negulu nane, negurine. Ayende gwetsagene gu buweni, gu bulongu bu Madyan. Gune, abure bane be beye be bebagele.

³⁰ Mu megumi mane me mipume, gu ginange gyumuge gi beli ne mukongu Sinayi, yanze negu kwelabise ve Moyise, gu gari mulutsu dibake dyanyengi.

³¹ Ve Moyise labile nane, amame. Negugogule gwegengile. Fumu negumwambile re.

³² “Ni Nyambi begulu bagu, Nyambi Aberam, yi Isake ne Sakob.” Moyise neguregeme ne wome asekunde rungule gengile.

³³ Fumu negumwambile re “Yusule pondu tsi agu. Mbare, ve wuvu ve rereri.

³⁴ Nyalabe mukengu bumongu bu ami gu Esipete, nyagulu mibimu mi andi. Nyasunde guse bwobule. Sige, yende, nyakurumi gu Esipete.”

³⁵ Moyise eni yibemage negumwambile re “Nye tse kubyatse givunde ne nzonzi?”, yandi Nyambi rume gere givunde ne mwobutsi, ne gyamusu gi yanze yi muvudugile gu dibake.

³⁶ Moyise re vuduse bane be Iserayel gu Esipete, neguvagange mambu mamamu ne bimage, gu Esipete, gu nzube benge ne gu ginange gyumuge mu megumi mane me mipume.

³⁷ Moyise re kunde gwambile bane be Iserayel re “Nyambi gunutindile mubigitsi gere menu, agube mwane taye enu.”

³⁸ Ve gukemine bumongu mbure mosi gu ginange gyumuge, Moyise abe vane. Abange gikambi ve gari begulu betu ne yanze yi mwambilange gu yulu mukongu Sinayi, amwambilange mambu mavegi monyu gu guduyabise moni.

³⁹ Tumbe begulu betu beseronde mugobise, bemumage, berondange ka gugabuge gu Esipete.

⁴⁰ Ve Moyise abile gu mukongu, bane be Iserayel bambile Aron re “Dutulili nyambi yi gwendange ve wusu etu, mbare Moyise yitseduvuduse gu Esipete, dusayabi gi mamurugile.”

⁴¹ Betule gikokosi gi mwane ngombi bekugivegange pagu, bekube ne mugangu neni wugube ne gikokosi gibetule yawu beni.

⁴² Tumbe Nyambi negubelige nzime, negubesise gulembe mbwelile tsi nzambi, nevu direndilu mu gisangumu gi bebigitsi: “Bumongu bu Iserayel, gu ginange gyumuge menu re wu nuvege bibulu ne pagu tsi susu gu megumi mane me mipume?

⁴³ Vyage, nunangule disambe di nyambi Molok ne gigoleni gi nyambi dumbwelile Refan, bikokosi binupake gu gubikutemine. Re dibandu nigunuragigile ne Babilone.”

⁴⁴ Gu ginange gyumuge, begulu betu babange ne disambe di gibengunu ne Nyambi. Moyise dirunge nevu Nyambi mwambilile. Adirunge kanevu alabile.

⁴⁵ Gigumbi neguvyoge, bane be begulu betu bevegu gwandi disambe dine. Ne Sosué bebyale bulongu bu bumongu bu Nyambi sanze ve wusu awu. Bebege disambe gu bulongu bu Nyambi bevangenine. Dibe gune kwange ne gigumbi gi Davide.

⁴⁶ Davide rondu ne Nyambi. Negumwivule dinyange di gurungile Nyambi yi Sakob ndagu.

⁴⁷ Tumbe Salomu re rungile Nyambi ndagu.

⁴⁸ Lavane Nyambi Yulu satsageni ndagu yi rungu ne batu. Adyambile gu munu mubigitsi:

⁴⁹ “Nzambi gipu gi ami gi kanangu, tsyengi mbure yi nya sunzili byeru bi ami. Ndagu re yi nugubenze tungile? Mbure gye ni benze tsagenine?

⁵⁰ Menu re nisunde byotsu bine ne mekake mami.”»

⁵¹ Etyene negukunde gwambile bivunde bi nzonzi: «Yenu nu batu be range gulu, mirime ne maru menu medibe gu Nyambi. Nu gere begulu benu, nusinde mirime gu Dinyuni Diboti!

⁵² Bekengise bebigitsi botsu! Beboke nesi benegwanzange tsangu yi tugu Mutu Sungeme, Kirisete. Sige vane, nusake Sesu Mutu Sugeme numuboke!

⁵³ Nuvegu mugage Nyambi ne yanze, tumbe nusemugobise!»

Dufu du Etyene

⁵⁴ Ve bivunde bi nzonzi bulilu nane, Betibe kabu. Besyege ngeku, ne kabu gukyelu Etyene.

⁵⁵ Tumbe yandi ne Dinyuni Diboti, ne gugengise gu nzambi, alabe didume di Nyambi, ne Sesu meteli ve mebagele me Nyambi.

⁵⁶ Ne gwambile re «Nyalabi nzambi yitsibuge ne Mwane Mutu meteli ve mebagele me Nyambi.»

⁵⁷ Vane botsu bulu mambu mane bamuge bekwekudibe maru. Yawu botsu besugumugile Etyene,

⁵⁸ bemuvuduse gu yadi, bemutuke memani. Mbeyi besunze bidwaru bi awu gu byeru bi mufudu wanengu re Sol.

⁵⁹ Ve bemutukilange memani, Etyene lembange re «Fumu Sesu, bonge monyu ami.»

⁶⁰ Vane, aberuge mekuteme ne guamuge ne ngudu tsyotsu: «Fumu, benyesi dibi dine!» Ne gumane gwambile nane, afu.