Actes 6 - Gisir

Batu bane gubereru besalu gu gwamuse bilumbi bi Sesu

¹ Gigumbi gine, durangu du bebingitsi be Sesu dufunange kagufune, sige Sif tsya gwambili dilongu di girek bagwanuni ne Sif tsyagwambili dilongu di Eberu. Bagwambili re «Wisi wotsu, gigumbi gyagabilu biguye, balibegeni bekwili be dibundu di etu.»

² Vane digumi ne bebeye di bilumbi bi Sesu be bengune ne bebingitsi bemosi negubevege pikile: «Dusagusile gwanze musamu Nyambi mbare gugabe biguye.

³ Re dibandu, bane be Nyambi, salanu vegari enu bebagale bane gubereru bagobisu ne mutu wotsu, bebase ne Dinyuni Diboti ne dyele. Dubevegi gidyanzu gi gugabe biguye.

⁴ La yetu dukusingine kane gulembe ne gwanze musamu Nyambi.»

⁵ Dibundu dyotsu dibe dimosi nawu. Besale Etyene, mutu base ne gitu ne Dinyuni Diboti. Besale gwandi Filip, Porekore, Nikanore, Timo, Paremenas ne Nikola, yi yadi yi Atyose, wukaluge gu gulembe Nyambi Iserayel.

⁶ Bebegu ve wusu bilumbi bi Sesu. Belembe Nyambi gukyelu awu negu betsabige mekake mu miru mi awu.

⁷ Musamu Nyambi kagu yabegenungu. Gu Serisalem, babingi Sesu befunange kagufune. Mbili bevegitsi be pagu be Sif bevagile Sesu gitu.

Etyene magangu

⁸ Nyambi vege Etyene ngudu ne gyesi. Vane re ve avagile bimage ne mambu mamamu vegari bumongu.

⁹ Sif tsi Sirene ne tsi yadi Lekesanderi bendange ne mbetsi gu ndagu ndembu ya nengu re: «Ndagu ndembu bevige bobulu.» Sif tsi Silisi ne tsi musyengi Asi, besosange gwandi ne Etyene,

¹⁰ tumbe besagudile miranu ve wusu andi. Mbare agagwambile ne dyele dyamuvegi Dinyuni Diboti.

¹¹ Vane besumbe batu be gufure re: «Dutsegulu Etyene gwambile mambu mabi gukyelu Moyise ne Nyambi.»

¹² Vane, bekokise bumongu, bivunde bi dibundu ne bivunde bi migage. Vane bedute beli ne Etyene, bemugange bemubege ve wusu bivunde bi nzonzi.

¹³ Bebege gwandi mbeye tsi befutsi tsyambile re «Mutu wuwu gagwambili mabi gukyelu ndagu Nyambi ne gukyelu mugage Moyise!

¹⁴ Dutsemulu gwambile re Sesu yi Nasarete gupanze ndagu Nyambi ne gukalule mugulu Moyise duvege.»

¹⁵ Botsu babe metsagene gu ndagu bivunde bi nzonzi gisisu ne Etyene. Belabe re ginengu gi andi gike munongu mosi ne gi yanze.