Actes 5 - Gisir

Ananyas ne Safira

¹ Mutu wanengu re Ananyas, ne mugatsi andi Safira babe dimosi gu gusumbise gyambe gi awu.

² Ne gulusenu ne mugatsi andi, arare durangu dumosi du doli nandi. Ananyas abege doli tsisale gu bilumbi bi Sesu.

³ Tumbe Pyere ne gumwambile re: «Ananyas, watsibulile Sate murime agu. Dibandu gye wafure Dinyuni Diboti? Wutsirare durangu dumosi du doli tsi gyambe.

⁴ Nesi mbere wutserare gyambe gi agu, nesi wutsegisumbise, ne guvage dyotsu di warondi ne doli. Gye wutsibile ne pikilile yine gu murime agu? Sa yetu wutsefure, tumbe Nyambi!»

⁵ Ne gulu mambu mane, Ananyas beruge, afu. Botsu be dyulu begangu ne mune wome.

⁶ Befudu beruge, bepyete gibindi ne tsande, bebege gwetsige.

⁷ Gotsu megwere mereru mevyoge, mugatsi Ananyas ne guruge, aseyabe divyoge.

⁸ Pyere negumwivule: «Nyambili, disumbu re didi nutsesumbisile gyambe?» Ne gwagule: «Yi re dine.»

⁹ Ka Pyere ne gumwambile re: «Gye gi ndyayu ne mulumi agu nutseguluseninu gufure Dinyuni di Fumu? Yulu, abarugili gwetsige mulumi agu beke, ve mune ndagu. Begukubege ndyawu gwandi.»

¹⁰ Vane ne vane, mugatsi beruge ve byeru bi Pyere, afu. Befudu bingene, bemwene re amafu. Bemubege, bemutsige ve mbeke mulumi andi.

¹¹ Dibundu dyotsu ne botsu bulu me vyoge begangu ne wome.

Bimage bi bilumbi bi Sesu

¹² Mbili ndimbu tsi bimage ne mambu meneni me vagange bilumbi bi Sesu vegari bumongu. Batu besinge Nyambi be bengunange mbure mosi mu bilembi bi Salomu.

¹³ Tumbe gu sabe mutu wube ne karu bambeme nawu. Lavane batu botsu be bedumisange.

¹⁴ Mbili batu, bebagele ne begetu bene gitu gi Fumu, besobegene ne besinge Fumu mbetsi.

¹⁵ Be begange bibedu mu mimbambe, bi sunzungu mu tangi, mu metogu. Mbare, batu babange ne gitu reve guvyogile Pyere nesi gidunze gi andi pasi gi mabembe nesi wumosi vegari awu.

¹⁶ Mbili batu berugilange mu mimbu me beli ne Serisalem. Be begange bibedu ne batu be ne menyuni mabi, botsu be beluge.

Bilumbi bi Sesu byagangu, Nyambi negubobule

¹⁷ Vane givunde gi bevegitsi be pagu ne botsu be nandi, mu dibundu di Saduseyi, babe ne digwavi, ne dibagi di guvage dyotsu dibapikili.

¹⁸ Begange bilumbi bi Sesu bebevere gu nzugu ve misu me batu botsu.

¹⁹ Tumbe, dibeti, yanze Fumu tsibule mune ndagu nzugu, yivuduse bilumbi bi Sesu ne gubambile re:

²⁰ «Yendanu gu ndagu Nyambi. Vane, yambilanu bumongu mambu motsu me monyu wone.»

²¹ Bilumbi bi Sesu begobise. Mekyele meneni, bende gu ndagu Nyambi, bepakile nenze. Gigumbi gine, givunde gi muvegitsi pagu ne botsu be nandi berombe dibundu di batu batabuli misosu. Sige berume gori tsi ndagu Nyambi gwebonge bilumbi bi Sesu gu nzugu,

²² tumbe ne guvuduge, bese beragunu. Begabuge gu ndagu migage gwegwambile re:

²³ «Dutseragene nzugu yi bandeme dikengi. Beraritsi be nzugu mu wusu minemindagu, tumbe ve dutsitsibulile, duseragene mutu gu gari.»

²⁴ Givunde gi beraritsi be ndagu Nyambi ne bivunde bi bevegitsi be pagu ne gulu nane, bekumame gukyelu bilumbi bi Sesu. Bekwe gwivusenange nevu divyogile.

²⁵ Vane mutu ruge abambile re «Batu be nutsevere gu nzugu beke gu ndagu Nyambi negunenzange bumongu!»

²⁶ Vane givunde gi gori yende ne gori tsi andi. Begabuse bilumbi bi Sesu, pembi ne polu, mbare bedumange bumogu gubetinde memani.

²⁷ Gori negubege bilumbi bi Sesu ve wusu batu batabuli misosu. Givunde gi bevegitsi be pagu negubivule.

²⁸ Yandi re «Dutsenugandise gunenze gu dine di mutu wune, tumbe yenu, nwabase Serisalem ne ginenzitsi gi enu! Nwarondi re dufu du mutu wune du singemi gu yetu!»

²⁹ Pyere ne bilumbi bimosi bagule: «Nonge gobise Nyambi ke digugobise batu.

³⁰ Yenu, nuboke Sesu ne gumugomine mu kurusu, tumbe Nyambi begulu betu yi murambuse gu dufu.

³¹ Nyambi munangule gu mebagele mandi negumubyatse givunde ne mwobutsi, nonge bumongu bu Iserayel bukaluli mutsageninu wandi negubunzule mabi mandi.

³² Du mbeyi tsi motsu mane, yetu ne Dinyuni Diboti, di Nyambi vege bamugobisi.»

³³ Ve batu batabuli misosu bulilu mambu mane, betibe kabu beronde bokise bilumbi bi Sesu.

³⁴ Tumbe vegari awu, mutu retseme. Mwisi dibundu di Farisi wanengu re Gamalyele givunde gi migage, bumogu bwotsu bwamugobisi. Avege dinyange di guvuduse bilumbi bi Sesu mwe gigumbi.

³⁵ Abambile re «Batu be Iserayel, nu bandekene di nwarondi vage batu bane.

³⁶ Ve sabe gitsinge, dulabile mutu wanegu re Tedas. Wu kwekudumisange, gotsu kame yine tsi batu bemubinge. Tumbe akuboku, botsu babe nandi benegwende mekulegeni.

³⁷ Ve nzime andi, dulabe Suda mwisi Galile. Abege yandi gwandi mbili batu nandi. Gigumbi gi givunde gi kanangu avege dinyange di gurange batu be musyengi andi. Tumbe Suda afu yandi gwandi, botsu babe nandi bepanzegene ne bulongu.

³⁸ Sige, nikanwambili, nuyasingene ne batu babe besilyanu gwende. Pasi re pikile tsi awu ne mebavagi marugili gu batu megutsyemuge.

³⁹ Tumbe pasi re marugili gu Nyambi, nusabenze metsyemune. Nubandekene, mbare Nyambi tsatse duragunu mu dibundu di batu bamuvini!» Batu batabuli misosu besinge ditsegwambile Gamalyele.

⁴⁰ Berugise bilumbi bi Sesu, be bedimbise. Bebegandise gukunde gwambile gu dine di Sesu, sige bebesile.

⁴¹ Bilumbi bi Sesu busuge ndagu ya tabulilu misosu. Botsu ne munganzu mbare Nyambi tsebene re bebenze kenge gu dine di Sesu.

⁴² Wisi wotsu, gu ndagu Nyambi ne mu ndagu, bevagange ka gunenze ne gwanze musamu boti wu Sesu Kirisete.