Actes 4 - Gisir

Pyere ne San ve wusu bivunde bi migage

¹ Ve Pyere ne San bambilange bumongu, bivunde bi bevegitsi be pagu, givunde gi gori tsyarari ndagu Nyambi ne be dibundu di Saduseyi beruge.

² Betibe kabu mbare Pyere ne San benenzange bumongu bambilange re batu bafu bebenze gabuge monyu mbare Sesu rambuge gu dufu.

³ Begange Pyere ne San bebevere gu nzugu dibeti dine, mbare wisi mbere magwide.

⁴ Botsu bulu mambile Pyere ne San gukyelu Sesu, mbili babe negitu. Babe gotsu toseni yiranu tsi batu.

⁵ Mbongwali, bivunde bi bevegitsi be pagu, bivunde bi dibundu bi Sif ne bivunde bi migage be bengune gu Serisalem.

⁶ Gube Ane givunde gi bevegitsi be pagu, Kayife, San, Lekesandere, ne botsu be gifumbe gi Ane.

⁷ Bevuduse Pyere ne San gu nzugu, bebesunze vegari, batu bane bebivule re «Ne ndure yi nye vo mu dine di nye nusebelusile mutu wune?»

⁸ Vane Pyere ne Dinyuni Diboti, abambile re «Bivunde byotsu bi bumongu,

⁹ gere nwadwivuli ne muni, gukyelu diboti di dusevage digubeluse membogelotu wa,

¹⁰ yabanu dikengi, yenu botsu ne bumongu bu Iserayel, ne ngudu ne ndure yi dine di Sesu Kirisete yi Nasarete yi mutu wunwalabi ve wusu enu pembi ne polu, asebelugile. Sesu yi yenu nugomine mu kurusu, yi Nyambi rambuse gu dufu.

¹¹ Sesu re “Dimani dibume batu barungi, dyakaluge dimani dyadyotsi ndagu.”

¹² Sesu vike re benze nwobule, mbare gu bulongu bwotsu yandi vike vegari batu botsu re wu Nyambi rume gu gusebobule.»

¹³ Yawu negulabe karu yi Pyere ne San, besadumi ve bambililange, bekumame mbare bebeyabange re batu besenenge, batu be mekulegeni, bekuyabe gwandi re batu be gilonge gi Sesu.

¹⁴ Tumbe ve belabange meteli ve mbeke awu mutu wusebeluge besekunde gwambile kepagere dyambu.

¹⁵ Bebambile re «Nukivuduge gu ndagu yi betabulilange misosu.» Yawu ne yawu besale vike gu gutsonzige.

¹⁶ Bambile re «Gye duguvage batu babe? Beserigitse ndimbu gimage, ne gungenze batu botsu be Serisalem bayabi. Dusabenze gale.

¹⁷ Tumbe nonge dyambu dine diyayabegenu gu bumongu, dubegandisi ne buvembe nonge betsatse kunde gwambile dine di Sesu kepagere mutu.»

¹⁸ Beberombe, bebambile re «Kakingi nuyakunde gwambile, nesi gunenze mu dine di Sesu.»

¹⁹ Pyere ne San bagule re «Gye ginonge ve wusu Nyambi, gu nugobise vo gugobise Nyambi? Yenu beni pitsanu.

²⁰ Tumbe yetu dusabenze tsibige minu gu di duselabe ne gulu.»

²¹ Bekunde bekenine, bebesise gwende gumbu gi awu. Besekunde bekwane mbare bedumange bumongu. Batu botsu bedumisange Nyambi negulabe dise vyoge,

²² mbare mutu wubelusu ne gimage gine mbe mavyose megumi mane me mipume aburilu.

Ndembu tsi batu besinge Sesu

²³ Pyere ne San negusisu, bende gu bembatsi tsi awu bambile motsu me bivunde bi bevegitsi be pagu ne bivunde bi bumongu bebambile.

²⁴ Negulu me yawu bambile botsu babe dimosi belembe re «Fumu, ndyayu re wuvange nzambi ne tsyengi, nzube ne byotsu bimune.

²⁵ Ne Dinyuni Diboti ndyawu re wambile Davide mukoku etu, mudyanzitsi agu, wambile gu munu andi: “Dibandu gye melongu me beni batibili kabu, bumongu bune pikile tsi sandi ne musumbu?

²⁶ Kanangu tsi butambe batsonzige guvage ngube, bene menyange basobegene pikile tsi guvine Fumu, neguvine Kirisete kanangu, yi yandi sale.”

²⁷ Negu ngenze Erode ne Pose Pilate, melongu me beni ne bumongu bu Iserayel bebengune gu yadi yine, gu gukebe dyele digukwane Sesu Kirisete mudyanzitsi agu wu rereri wu ndyawu se sale.

²⁸ Bevage kegudyanze me ndyayu vange ne ndure ne tondeni agu.

²⁹ Sige Fumu, gengise dikwanu di awu. Vege bedyanzitsi bagu ngudu yi gunenze musamu agu ne gitu.

³⁰ Rigitse ndure agu, bibedu be belugi, ndimbu tsi bimage ne mambu meneni me labeni gu dine di Sesu mudyanzitsi agu wu rereri.»

³¹ Ne gumane lembe, butambe neguregeme ve babile. Yawu botsu bebase ne Dinyuni Diboti, benenze musamu Nyambi ne gitu.

Dukabu du meboti

³² Mbili batu bevagile Sesu gitu babe di awu dimosi, murime mosi ne pikile mosi. Gusabange mutu wuvagange re meboti mame megwami vike, mabange meyawu botsu.

³³ Ne ndure yineni, bilumbi bi Sesu bene gwabilange musamu re Fumu Sesu rambuge gu dufu. Yawu botsu bebase ne gyesi gi Nyambi.

³⁴ Ve gari awu gusabange gigaye mbare botsu babange ne byambe ne ndagu. Besumbisange bekubegange dufunu,

³⁵ bekebivegange bilumbi bi Sesu. Yawu gwandi bekugabange mwane mwane wotsu wukambilu ne dyambu.

³⁶ Gube Sosefe, mwisi gifumbe gi Levi aburulu gu Sipere, wu bilumbi beluge Barenebase, re guvage re: «Mutu wagwarisi batu.»

³⁷ Asumbise gyambe gi andi abege doli, atsivege bilumbi bi Sesu.