Actes 27 - Gisir

Pol gavegitsu gu Rom

¹ Dibagi digudwenze mu watange gu Itali negubongu, Pol ne bisi nzugu bemosi besambulu givunde gi gori gyanengu re Suluse. Ayi mu dibundu di gori dyanengu re «dibundu di Sesare.»

² Dukwine mu watange wu yadi yi Adamite, wuguvyogile gu gyari gi musyengi Asi. Sige dwende. Risetareke, mwisi Masedwan yi Tesalonik abe netu.

³ Mbongwali, dusikeme ve Sidu. Suluse rigitse Pol girondu gi andi, amuvege dinyange di gwelabe mbatsi tsi andi bekemwamuse.

⁴ Negusuge vane, duvyogile mu mugogu ningi yi Sipere. Mbare punge yirambugilange gu wusu etu.

⁵ Dudale nzube yi Silisi ne yi Pafili, duvuduge ve yadi Mire, gu Lisi.

⁶ Vane, givunde gi gori Rom ragesenu watange wu yadi Lekesanderi wendange gu Itali. Adukwinise mune.

⁷ Mu mbili tsufu, watange wendange nedikengi, ne page yotsu, duvuduge ve yadi yi Kenide. Tumbe punge yidukambise mwendu gu gyari gine, vane duvyogile gu gyari gi ningi Kerete, gu Salemone.

⁸ Ne page, duvuduge ve mbure yanengu re Bisyeni-Biboti, beli ne yadi yi Lasé.

⁹ Mbere dwatsyemune mune gigumbi, sige veke wome gubinge mwendu, mbare wisi wu gusindile nzale wavyoge, re varigitsi re gigumbi gi mipunge gu nzube gike beli. Re dibandu Pol nweritsile batu babegisi watange,

¹⁰ abambile re «Bembatsi, nyalabi re mwendu wuwu wusagube wuboti, mbare sike watange ne mifune myotsu migubungene, ne yetu beni dubenze gufu.»

¹¹ Tumbe givunde gi gori yi Rom ane gitu ne munga watange ne mutu wayibegisi, vyagunu ne mambu me Pol gagwambili.

¹² Gisyeni gi sandi giboti gu guvyosile gigumbi gi gyotsi gineni. Re dibandu batu bemosi mu watange bene dibagi di gusuge vane, barondi vuduge nesi gu Fenisek, gisyeni gi Kerete gu guvyose gigumbi gi gyotsi ne gusweme mikunge mi nzube.

Mukunge gu nzube

¹³ Mwe punge bande neguvuge, batu babe mu watange bepikile re mwendu wugunonge. Bedute nzumbu yasimbi watange bevyogile mu mugogu wu ningi Kerete.

¹⁴ Tumbe mepape, mukunge tandu warugile gu mikongu mi ningi wavuge.

¹⁵ Watange wusibigu, duserungule gagene ne punge, dusise punge gudusibige.

¹⁶ Duvyogile mu mugogu ningi yigegi yanengu re Kod. Durungule ne page gubonge bwatu bu gyamusu butungu gu nzime watange,

¹⁷ bedyanzitsi bebunangige mu watange. Sige betunge mbili mikudu mu mbeke gu gudyotse watange. Neve bedumange gwesige gu musyegi mugogu wu Libi, bebume ndelenge mu mambe, sige besile watange gusibigu ne mukunge.

¹⁸ Mbongwali, neve mukunge wukibe gibitse watange ne ngudu, vane bebume mifune gu nzube.

¹⁹ Wisi mureru, bebume yawu beni gu nzube bivave bitsire bi mu watange.

²⁰ Mu mbili tsufu, duselabe dyumbi nesi mbwelile. Mukunge ke vane ne vane, dusekunde gube ne gitu gi gobulu.

²¹ Duke tsufu dusegaye. Vane Pol, meteli ve wusu awu, abambile re «Bembatsi anu, mbere nutsenyulilu, ne gubuse rambuge Kerete, mbere nutsegonge mukunge, mbere nusatsyemuse megumbe.

²² Tumbe vave banganu ne karu mbare gu sandi mutu wu gufu dugutsyemune ke watange.

²³ Ne dibeti, yanze yi Nyambi yi nyadyanzili yitsetagene

²⁴ yinyambile re “Wuyadume, Pol! Nonge wutabulilu bumbanze ve wusu Sesare, sige gukyelu agu, Nyambi gusile monyu botsu bavevili nagu.”

²⁵ Bembatsi, garmuge anu! Nine gitu ne Nyambi, digube ke neve atsenyambilile.

²⁶ Dugusige ve mugogu ningi.»

²⁷ Ve digumi di mebeti ne mebeti mane, reve mupunge dubegisile mu nzube Mediterane. Gyari gi time dibeti, batu badyanzi mu watange bepikile re dukebeli ne disimu.

²⁸ Bebume mukudu wune nzumbu gu gupitse muronge. Nyongu rege berange megumi mereru me take ne take yine guyireru. Negukunde gogule, gyetsu girigitse megumi mebeye ne take ginane.

²⁹ Ne wome watange gugurule memani, bebume mikudu mine mi ne nzumbu gu metine gu gusimbe watange. Sige bevingile wisi gutsamuge.

³⁰ Batu badyanzi mu watange bekebange gurine. Benyangule bwatu bu gyamusu ne gufure gwetunge mukudu gu numbu.

³¹ Pol yambile givunde gi gori ne gori tsyotsu re «Pasi re batu bane besabe gu gari watange nusabenze gobuge.»

³² Vane, gori betabule mikudu mi bwatu bu gyamusu, bebusile gwende mu nzube.

³³ Ve guvingile wisi gutsamuge, Pol bambile re yanganu mwe giguye: «Ne muni, guke digumi di tsufu ne tsufu yine nwavingili, nusegaye.

³⁴ Kabe nyanwambili yanganu mbare nune keri, gu gobuge. Gusandi mutu wugutsyemune nesi dunange du muru.»

³⁵ Negumane gwambile, Pol bonge dibenzi, agabusile Nyambi diboti ve wusu batu botsu, agabe, aye.

³⁶ Vane batu botsu begarumuge, baye gwandi.

³⁷ Yetu botsu gu watange, dube kame beye, ne megumi mane gumereru me batu ne batu be syamenu.

³⁸ Negumane guye, negukure, bebume tsine puke tsi biguye gu mambe nonge watange wukulenge.

Batu botsu babe gu watange bagobuge.

³⁹ Wisi negutsamuge, batu badyanzi mu watange belabe mutambe, tumbe beseyabe mbure yibavu. Belabe musyegi bebonge dibagi di gubege watange kwange gune, pasi re betserungule.

⁴⁰ Benyangule nzumbu tyasimbi watange betsesile mu nzube. Benyangule gwandi kafi yakweri watange. Sige bepandise dikumbi ve wusu nonge punge yikusibige watange gu gyari gi musyegi.

⁴¹ Tumbe numbu watange yisige ve musyegi watange wusekunde pupe. Metine mebulige ne mupunge.

⁴² Gori babe nepikile yi guboke bisi nzugu, nonge nesi wumosi atsatse rine ne gurale.

⁴³ Tumbe givunde gi gori yi Rom ane dibagi di gobule Pol, abuse pikile yine. Avege batu bayabi gurale dinyange di guregile puteme, gu gudenge disimu.

⁴⁴ Bemosi begubebinge mu timbi nesi mu bipepeli bi watange wuse bulige. Re nane botsu bedengile disimu pembi ne polu.