Actes 26 - Gisir

Pol gakwekani ve wusu Agirip

¹ Agirip yambile Pol, «Wune dinyange di gwambile.» Vane Pol nangule dikake gu gukwekane:

² «Kanangu Agirip, nyagulu mugangu neni nemuni wu gukwekane ve wusu agu gukyelu mambu me bamvurigili.

³ Mbare wayabi dikengi migulu mi Sif ne misosu mi awu. Kabe kokolu nyulilu.

⁴ Sif tsyotsu tsyayabi monyu ami pakile bulengi, bayabi neve nzibilange ve dipakililu ne bumongu bu ami gu Serisalem.

⁵ Bendyabile veke gigumbi bebenze nwambile, pasi re beseronde, re nibegise monyu ami vegari dibundu di Farisi dyagobisi migage dikengi.

⁶ Mbare nine gitu ne ndagi yi Nyambi tunge ne begulu betu, nyasosisilu.

⁷ Digumi ne bibeye di bifumbe bi bumongu bene gitu gi gulabe ndagi ne gudyanzile Nyambi ne ndure ne nyangu ne dibeti. Kanangu ami, Sif bamvurigili dibandu gitu gine!

⁸ Gye gi nwapikili re Nyambi sabenze rambuse mutu gu dufu?

⁹ Mebeni nibe ne pikile yi guvage dyotsu di gukwane dine di Sesu yi Nasarete.

¹⁰ Re dinivage gwandi gu Serisalem. Nivegu dinyange ne bivunde bi bevegitsi be pagu di guvere gu nzugu mbili bane be Nyambi. Sige, ve be bekilisange kwange gu dufu nivegange dinyange di ami.

¹¹ Gigumbi gi nyendilange mu ndagu tsi ndembu, nibetsugisange vyagunu mbare nirondange bebakige gugale gitu gi awu. Fimi ami nawu yibange kwange gwene bekwane kwange mu yadi tsi nzusu.

Pol gagwambili nevu singile Sesu

¹² Re nane wisi, nyende gu Damas ne dinyange di bivunde bi bevegitsi be pagu gwende negangise bane be Nyambi.

¹³ Kanangu Agirip, nibe mu nzile gigumbi gi dyumbi gabili ve yulu muru, re ve nilabile giyalele girugilange gu nzambi, vyagunu ne gi dyumbi, gi nzyenge ne gilonge gi ami.

¹⁴ Duberuge yetu botsu sige nyulu dyufi dinyambile gu dilongu di Sif, “Sol, Sol, gye gi wakwanini? Gu kulegeni wavagili giretiti gere mondi ne duvandi du fumu andi.”

¹⁵ Nivule, “Ndya nye, Fumu?” Fumu negunyagule, “Menu Sesu, yi wakwani.

¹⁶ Tumbe rambuge, bange meteli. Nzekwekurigitse ve ndyayu nonge wukube mudyanzitsi ami, wugube mbeyi ami gu gwanze neve wutsenyenine nemuni ne gwanze me nigukunde kurigitse.

¹⁷ Nigukobule gu bumongu bu Sif ne melongu me nzusu mu nigukuvegitsilange.

¹⁸ Nigukurume nonge wukubetsibule misu, wukubusule gu diviseme bekube gu giyalele, ne gubusule gu dinyange di Sate bekube gu dinyange di Nyambi. Pasi re betsibe ne gitu nami, begubunzulu mabi mawu ne gube ne mbure vegari dibundu di batu bami.”

Pol gagwambili me gidyanzu gi andi

¹⁹ Sige kanangu ami, nzelevule dyeni di tugile gu nzambi.

²⁰ Tumbe nyanze musamu boti gu bisi Damas ne bisi Serisalem, Sudé yotsu ne melongu me nzusu. Nibambile gukalule mutsageninu, ne gugeluge gu gyari gi Nyambi ne gurigitse re bakaluge.

²¹ Re dibandu Sif betsekangile gu nzibile gu ndagu Nyambi neve mbere bembokile.

²² Tumbe Nyambi tsekane kwange nemuni sige niki mbeye gu gwambile ne bane begegi ne bivunde. Nzagwambili menzusu ka megulabene me bebigitsi ne Moyise banze

²³ re Kirisete gukenge, agube murege gurambuge vegari batu bafu, re agwanze giyalele gi Nyambi gu bumongu bu etu ne melongu memosi.»

Pol gagwambili Agirip gube ne gitu

²⁴ Ve Pol kwekaninange, Fesetis ne mwamu, «Wabeli, Pol! Ginenge gi agu gya vave wuke givulu!»

²⁵ Pol mwagule, «Nza givulu, Fesetis. Mambu me nyagwambili mengenze mesungeme.

²⁶ Kanangu Agirip nweritsu mu mambu mane sige nyagwambili ne gitu ve wusu andi. Nyayabi re asatsimbu nesi dimosi, mbare mesavyogile gu tsweminine.

²⁷ Kanangu Agirip, wune gitu ne mambile bebigitsi? Nyayabi re wune gitu!»

²⁸ Agirip yambile Pol, «Wapikili re wugukaluse Kereti, mwane Nyambi, ne kyawu?»

²⁹ Pol yagule, «Ne nekyawu ne wisi nzusu, nyalembi Nyambi re sike ndyayu, tumbe ne yenu botsu nwanyulu nemuni, nubi nemenu, vengu ke pange!»

³⁰ Kanangu, ngowu, Berenis ne botsu be nawu, berambuge

³¹ bevuduge, bambesene re «Mutu wuwu asavage dibi di guverilu gu nzugu ne di gubokilu.»

³² Vane Agirip yambile Fesetis, «Mutu wuwu mbere asagwivule gwesosisu gu Sesare, mbere atsesilu.»