Actes 24 - Gisir

Pol ve wusu ngowu Felikese

¹ Tsufu yiranu tsivyoge, givunde gi muvegitsi pagu Ananyas yende gu Sesaré ne bivunde bi dibundu ne gikambi gyanengu re Teretilis. Gutse funde Pol gu ngowu Felikese.

² Pol ne gurugisu, sige Teretilis negumufuregile: «Ngowu etu Felikese, dibandu ndyayu dwatsagenini pembi ne polu, dibandu givagitsi gi agu ne pikile tsi agu gu bulongu bu etu.

³ Dwakugabusili diboti gu motsu me dwadili gigumbi gyotsu kepagere mbure.

⁴ Tumbe nzagukunde tsyemune gigumbi, re dibandu nyakwivuli kokolu yi gudulimbilile mwegigumbi.

⁵ Dwalabi re mutu wuwu pire ginwangu, agatubi misosu gu Sif tsyotsu tsi bulongu, lavane givunde gi dibundu di Sesu yi Nasarete.

⁶ Mbere aronde sumune ndagu Nyambi yi rereri, vane dumugange. [Mbere dumusosise neve gwambili mugage etu.

⁷ Tumbe gidyeti Lisyase aruge ne ngube gutse mupatule mu mekake metu,

⁸ gu guduvege dinyange digu mufunde gu ndyayu.] Pasi re wutsemwivule ndya beni wugulu re me dwagwambili gukyelu andi me ngenze.»

⁹ Bidyeti bi Sif bekokune re negungenze.

Pol gakwekani ve wusu ngowu Felikese

¹⁰ Ngowu muvege dinyange di gwambile, vane Pol yandi re «Nyayabi re wavagi bureti gu bulongu bu etu mu mbili mipume, kabe ne gitu nyarugili ve wusu agu.

¹¹ Neve wubenze gengile ndya beni, gusame vyoge digumi di tsufu ne tsufu beye nyendile gu Serisalem gwekutemine Nyambi.

¹² Nzameragunu gu ndagu Nyambi re nyasosi ne kepagere mutu, vo gukokise kumvu gu ndagu Nyambi, gulu gulu ne gu ndagu tsi ndebu ne kepagere mbure gu yadi.

¹³ Batu babe besabenze kuvege gilimbe gi mambu mebagwambili gukyelu ami.

¹⁴ Tumbe, ve wusu agu nyasingi re nyadyanzili Nyambi begulu betu mu dibundu di “Nzile” Fumu. Gu yawu, bavagi re nzile gufure. Tumbe menu, nine gitu ne motsu merendu mubisangumu bi migage ne bebigitsi.

¹⁵ Nine gitu ne Nyambi re batu botsu babi ne beboti begurambuge gu dufu, gitu gi nawu gwandi.

¹⁶ Re dibandu nyakwebokili gigumbi gyotsu re niyabe ne togu ve wusu Nyambi ne ve wusu batu.

¹⁷ Mbili mipume nyendile, nzerugile gu Serisalem gutsegwamuse bumongu bu ami ne doli ne pagu gu Nyambi ami.

¹⁸ Labe gi nivagange ve betagenine gu ndagu Nyambi. Mbere nyabande mususu, gusabe bumongu ve mbeke ami, gusabe dimbunge.

¹⁹ Tumbe be Sif tsi musyengi Asi tsibe vane, yawu re mbere betseruge ve wusu agu gusegwambile, gere bene dyambu nami.

²⁰ Avo, batu babe bevave bambili dibi dinzebegilu ve wusu dibundu dyatabuli misosu.

²¹ Gotsu digube ke gukyelu di nzegwambile, meteli ve wusu agu “Mbare nine gitu ne durambugu du dufu nyabegilu nemuni gutsesosisu ve wusu enu!”»

²² Felikese, wuyabange dikengi «Nzile» Fumu, aragige musosu gigumbi ginzusu ne gwambile befunditsi re «Pasi re gidyeti Lisyase maruge nigutabule musosu enu.»

²³ Avege givunde gi gori dinyange di gurare Pol gu nzugu, ne gumusile kindi kindi, ne guvege bembatsi bandi dinyange di gutsemudyanzile.

Pol ve wusu Felikese ne Duresil

²⁴ Be tsufu kwe, Felikese ruge ne mugatsi andi Duresil, wu Sif. Arume batu gwebonge Pol gu gulu di agwambile gukyelu gitu gu Sesu Kirisete.

²⁵ Tumbe gigumbi gi Pol yambililange gukyelu mutsageninu wusungeme, gukyelu gusinde murime ne bumbanze bu musitu, Felikese, ne medume, yandi re «Dukisukile vane. Pasi re nike ne gigumbi, nigukunenge.»

²⁶ Apikilange re Pol gumuvege doli, re dibandu amurugisange gu gwambile nandi.

²⁷ Mipume mibeye mivyoge, akurondu ne Sif Felikese asile Pol gu nzugu. Sige Poresyus Fesetis muvyagesene.