Actes 23 - Gisir

¹ Pol tsoke bisi dibundu dyatabuli misosu gisisu yandi re «Bane be taye, ne murime mosi nyadyanzili Nyambi kwange ne muse nemuni.»

² Ananyas givunde gi muvegitsi pagu vege dinyange gu batu babe beli ne Pol gu mudimbe ve munu.

³ Vane Pol mwambile re «Nyambi re gukudimbe givyangi gyeni! Wuvane gu gutabulile bumbanze nevu mugage garondili. Sige, wamusumuni ne guvege dinyange di gundimbe?»

⁴ Ababe beli ne Pol bemwambile re «Gine givunde gi muvegitsi pagu Nyambi gi ndya wasyengi!»

⁵ Pol yagule, «Nzayabange re givunde gi muvegitsi pagu. Mbare direndu re “Wusagwambile dibi gukyelu givunde gi bumongu bu agu!”»

⁶ Pol yabange re dibundu dyatabuli misosu dine mebundu mebeye Saduseyi ne Farisi, re dibandu ayambilile ve wusu awu re «Bane be taye, ni Farisi, mwane Farisi. Mbare ni ne gitu gi tambugu dufu re ve nyatsundisilu.»

⁷ Ve ayambilile nane mebundu mepakile sose, mepasuge.

⁸ Mbare, gu dibundu di Saduseyi gu sandi durambugu du dufu, gu sandi yanze ne menyuni, tumbe Farisi bene gitu ne motsu mane.

⁹ Myamu ke gurange myarangi. Batu bemosi be bivunde bi mugage Moyise, bisi dibundu di Farisi, berambuge ne ngube, «Dusalabi dibi gu mutu wuwu. Mandi dinyuni vo yanze mwambile?»

¹⁰ Musosu negurange gidyeti gi gori yulu wome re beboki Pol. Re dibandu avegile gori tsi andi dinyange di gusunde gwepatule Pol mu mekake mawu ne gumugabuse gu ndagu gori.

¹¹ Dibeti di duke, Fumu vudugile Pol tsutsudu amwambile re «Garemuge! Wumabe mbeye ami gugu gu Serisalem, nonge wubi gwandi mbeye ami gu Rom.»

Dugwegu dutungu gukyelu Pol

¹² Mbogwali Sif betunge dugwegu, beleve re «Dusaguye, dusagunu, Nyambi dulogi pasi re dusaboke Pol.»

¹³ Abetunge dugwegu, babe vyagunu ne megumi mane.

¹⁴ Beragene bivunde bi bevegitsi be pagu ne bivunde bi dibundu, gu gubambile re «Dwaleve ve wusu Nyambi re dusaguye pasi re dusameboke Pol.

¹⁵ Kabe yenu, yulusenwanu ne dibundu dyatabuli misosu, yivulanu gidyeti gi gori gunubegile Pol, negufure re nwarondi kunde pitse dyambu di andi dikengi. Gu yetu dwakikise gu gumuboke nesi aguvuduge gunu.»

¹⁶ Tumbe mwane katsi andi ne gulu dugelu dune. Ayende gu ndagu gori gwenweritse Pol.

¹⁷ Vane Pol nenge givunde gi mosi gi gori amwambile re «Bege mufudu wuwu gu gidyeti gi gori mbare ane dyambu digumwabile.»

¹⁸ Gori yine mubege gu gidyeti ne gwambile re «Pol mwisi nzugu atsepage re nikubegili mufudu wuwu ane mwe dyambu digukwambile.»

¹⁹ Gidyeti gi gori mugange ve dikake, bekungeme, amwivule, «Gye gi warondi nyambile?»

²⁰ Amwagule, «Bidyeti bi Sif bagulusenu gutsekwivule Pol mugese ve wusu dibundu dyatabuli misosu, gu guvage re barondi gukunde pitse dyambu di andi dikengi.

²¹ Tumbe wuyabulilu mbare guke vyagunu ne megumi mane ve yawu bamutungile dugwegu. Betseleve ve wusu Nyambi re besaguye ne gunu pasi re besamemuboke. Sige bakikise, bavingili ke dinyange di agu.»

²² Gidyeti gi gori negwambile mufudu re «Wuyagwambile mutu re wutsenweritse.» Amusile gwende.

Pol mavegitsu gu ngowu Felikese

²³ Vane gidyeti gi gori nenge bivunde bibeye bi gori, abevege dinyange, «Gukiganu kame beye tsi gori, megumi mane gu mereru me gori tsyanangemi kalebe ne kame beye tsi gori tsyagangi mekongu. Kikisanu gu gwende gu Sesaré kole megwere kambumosi me tsisige.

²⁴ Kikisanu gwandi kalebe tsi gubegile Pol pembi ne polu gu ngowu Felikese.»

²⁵ Sige arende gisangumu gigi:

²⁶ «Tate Felikese, menu Kolode Lisyase nyakuvegi kame mbulu.

²⁷ Sif mbere bagange mutu wu nyakuvegitsili wuwu gu gumuboke, ve nzigulu re mwisi Rom, nyende ne gori tsi ami nimukane.

²⁸ Nevu nirondange yabe dyambu di Sif bamufuregili, nimubege ve wusu dibundu di awu dyatabuli misosu.

²⁹ Nisupugile re bamufurigili gukyelu mambu me migage mi awu, tumbe gusabe gigume gi gumubokile ne gi gumuvere gu nzugu.

³⁰ Sige ninweritsu re guke dugwegu gukyelu andi, vane nibonge dinyange digu muvegitse gu ndyayu ne gwambile bamufurigili re betsemufunde gu ndyayu.»

³¹ Gori begobise menyange me bevegu, bebege Pol dibeti gu yadi Atipatirise.

³² Mbogwali, gori tsyendange ne byeru tsi gabuge gu ndagu gori, negusile tsi ne kalebe gubinge mwendu ne Pol.

³³ Ve bevudugile gu Sesaré, bevege ngowu gisangumu, bemurigitse Pol.

³⁴ Ngowu tangune gisangumu ne gwivule Pol ginange gi garugili. Ne gulu re mwisi Silisi,

³⁵ amwambile re «Nigukwivule pasi re bakufuregili baruge.» Sige avege dinyange di gumubandekene gu ndagu yi Erode.