Actes 21 - Gisir

Pol gagwendi gu Serisalem

¹ Ve dupasugile nawu, dwende mu watange sungumi gu ningi Kos, mbogwali duvuduge gu ningi Rode, vane dwende gu gisyeni gi Patare.

² Duragene watange wendange gu Fenisi, dukwine dwende.

³ Neguvuduge regi regi ne Sipere, duvyogile gu bande ningi ine, gu gwende gu gyari gi Siri. Duduke ve Tir, ve watange yisunzile mifune.

⁴ Duragene bebingitsi, dutsagene nawu tsonu ne pundu. Negunweritsu ne Dinyuni Diboti, bambile Pol re wuyagwende gu Serisalem.

⁵ Tumbe tsonu negusuke, dukunde bonge nzile. Bebingitsi ne begetu ne bane, beduvegitse kwange divudugilu di yadi. Vane dukuteme ve mbare nzube, dulembe.

⁶ Negulagile bembatsi, dukwine mu watange, reve bagabugile gu mbu gi awu.

⁷ Ve dwamanine dale mu watange bandile Tir kwange Petelemayi. Negubwegise bane be Nyambi gu yadi yine, dutsagene nawu wisi mosi.

⁸ Mbogwali dwende duvuduge gu Sesaré. Vane dwingene gu ndagu Filip yalagi musamu boti, dutsagene gu mbu gi andi. Abe mu durangu du bane gubereru besalu gu Serisalem gu gugabe biguye.

⁹ Abange ne bane be begetu bane be pundu, bebigisange mu dine di Nyambi.

¹⁰ Dube vane mbili tsufu, vane re varugile mubigitsi gu Sudé wanegure Agabis.

¹¹ Aruge ve yetu, abonge mutumbe wu Pol, akwekutunge byeru ne myogu, negwambile re «Yulu anu ditsegwambile Dinyuni Diboti, mutu wu denge mutumbe wuwu, agutungu nane ne bidyeti bi Sif gu Serisalem, sige begumusake beni.»

¹² Negulu nane, yetu beni ne bane be Nyambi be Sesaré dulembige Pol re ayagwende gu Serisalem.

¹³ Tumbe ayagule re «Gye gi nwarondili boke karu ami ne metsange menu? Ningu, menu, sike gutungu, tumbe ne gufu gu Serisalem gukyelu Fumu Sesu.»

¹⁴ Neve duserungule mukalule pikile, dusile, dwambile re «Dibi neve Fumu garondili!»

¹⁵ Be tsufu neguvyoge, dukikise sige dwende gu Serisalem.

¹⁶ Bebingitsi be Sesaré bende netu, bedubege gumbu Menasu me Sipere, wu mubingitsi mbetsi gu duvyosile gilatsi.

Pol gagwelabe Sake

¹⁷ Ve duvudugile gu Serisalem, bane be Nyambi bedusangile ne mugangu.

¹⁸ Mbongwali, Pol yende netu gumbu Sake, gu bivunde byotsu bi dibundu bebengunine.

¹⁹ Pol bebwegise, sige abambile dikengi motsu me Nyambi dyanze nandi gumbu batu be sandi Sif.

²⁰ Negumulilu, begitse Nyambi. Sige bambile Pol re «Mwate, walabi, toseni ne toseni tsi Sif tsyavagile Fumu Sesu gitu, botsu bene digibe mu mugage Moyise.

²¹ Labe, me betsegwambilu gukyelu agu, wanenzi Sif tsyotsu tsyatsageni vegari bumongu bu nzusu, gusile mugage Moyise, wabambili re beyakunde tabuse bane pure nziye, ne gubinge mugulu Sif.

²² Duvagi tsye? Gotsu begulu re waruge.

²³ Sige, vage di dugukwambile. Vave, ve bebagele bane betsetunge pangeni Nasarite.

²⁴ Bebegi, vage nawu mugitse mususu, bamusi gusumbe bibulu bigusake pagu nonge bekutsaku pendi gu gurigitse re pangeni yimavu. Nane batu botsu beguyabe re mambu me gufure, metsegwambilu gukyelu agu. Tumbe, ndyayu gwandi, wumu digobe di mugage Moyise.

²⁵ Gukyelu batu be melongu memosi beke bane be Nyambi, dutsebambile pikile tsi etu mu gisangumu re, beyaye nyame tsyasaku pagu gu nyambi tsi bikokosi, beyaye melungu, beyaye nyame tsyaswekigu mingunge, beragemi ne monyu bulembi.»

²⁶ Sige mbongwali, Pol bege batu ba bane, abe nawu ve mugitse mususu. Ayende gu ndagu Nyambi, gweyabise gigumbi gi gusukile tsufu tsi mususu, gigumbi gi gusakilu pagu tsi awu.

Pol magangu gu ndagu Nyambi

²⁷ Tsufu yine guyireru tsi mususu beli gusuke. Sif tsi musyengi Asi belabe Pol gu ndagu Nyambi. Bekokise bumongu bwotsu, bemugange,

²⁸ ne gwamugange, «Bisi Iserayel, dwamusyanu! Labanu mutu wavegi mwotsu ne mutu wotsu ndongi tsibi gukyelu bumongu bu Iserayel ne gukyelu mugage Moyise ne ndagu Nyambi. Sige, amagwingise gu ndagu Nyambi batu be sandi Sif nane amasumune mbure yi rereri!»

²⁹ Mbare bemwene konge ne Torefim yi Efese gu yadi, bepikilange re Pol mwingise gu ndagu Nyambi.

³⁰ Kumvu yi lalegene ne yadi yotsu, sige bumongu buruge mbangu mutsyelu tsyotsu. Begange Pol bemudute gu kane betsibige megugi me ndagu Nyambi.

³¹ Bekebange muboke, reve gwambililu gidyeti gi dibundu di toseni di gori tsi Rom re guke kumvu gu Serisalem.

³² Vane ne vane, abege nandi mebundu me kame gori ne mbangu gu gyari gi bumongu. Ve bemwenine ne gori, besile gudimbe Pol.

³³ Adute beli nandi, amugangise, avege dinyange digu mutunge ne pange beye, sige ayivule: «Awuwu nye, gye atsevage?»

³⁴ Tumbe vegari bumongu, bemosi negwambile didi, bane nane. Gidyeti gi gori aseyulu dyambu nepundu ne duvogusu, vane avege dinyange di gumuvere gu ndagu gori.

³⁵ Ve Pol vuduge ve dipandilu di ndiki, gori tsimunangule, gukyelu ngube bumongu,

³⁶ mbare bumongu bumubingage ne myamu, «Afu!»

Pol kakwekani

³⁷ Gigumbi gi bemwigisile gu ndagu gori, Pol yivule, «Nine dinyange di gwambile?» Gidyeti gi gori mwivule, «Wagwambili girek?

³⁸ Kabe wu sandi mwisi Esipete wurambuse kumvu dine, negubege toseni yine tsi bikongu ne mesambi gu ginange?»

³⁹ Pol yagule, «Menu, ni Sif, yiburu gu Tarese gu Silisi, mwisi yadi neni. Kokolu, pegi dinyange digwambile ne bumongu.»

⁴⁰ Gori muvege dinyange. Pol meteli ve dipandilu, anangule dikake, bumongu buke vole. Botsu bevole sige Pol bambile gu dilongu di Sif: