Actes 20 - Gisir

Pol kunde gabuge gu Masedwan negu Girese

¹ Kumvu negusuke, Pol gukige bebingitsi abegaremuse, sige abelagile, ayende gu Masedwan.

² Alabuge ginange gine negwende ne garemusange bane be Nyambi. Sige ayende gu Girese gwanengu gwandi re Akayi,

³ gu abile migweli mireru. Mbere abonge bwatu gu gwende gu Siri, tumbe nevu ayulu re Sif batunge dugwegu gukyelu andi. Vane abonge dibagi digu gabugile gu Masedwan.

⁴ Sopateros, mwane Pirus, mwisi yadi yi Bere, asobe gilonge ne Risetareke ne Sekundus yi Tesalonik, Gayus yi Derebe, Timote, sige Tisik ne Torefim, yi musyengi Asi.

⁵ Bane bende wusu, beduvingile gu Torwas.

⁶ Sige yetu, dukwine gu bwatu ve Filip, mumengu mebenzi ne guvu, mu tsufu yiranu duberagene gu Torwas ve dwavyosile tsonu.

Tugu musukisilu yi Pol gu Torwas

⁷ Wisi tsonu, dube mbure mosi gu gugabene mebenzi, vane Pol kwambile ne dibundu kwange gari gari, mbare apasugange nawu mbongwali.

⁸ Gube mbili lambi gu girini gi ndagu yi dugukemine gu ndiki.

⁹ Mufudu wanengu re Etise abe metsagene ve mbeke pengule. Negwende gwelu ve Pol yambililange, asakumuge gu ndiki mureru. Bemunangule, tumbe mbere amafu.

¹⁰ Pol sunde, mbangu ve yandi, abandeme amunagule mu mekake mandi, yandi re «Nuyadume, ayi monyu!»

¹¹ Sige apande, agabe mebenzi baye. Negukunde gwambile kwange wisi gutsamuge, ayende.

¹² Bebege mufudu monyu gumbu gi andi dibe mugangu neni gu batu botsu.

Muvevilu Torwas kwange Mile

¹³ Pol ronde re yetu dubongi bwatu gu guregile gu Asos, yandi aduragene ne byeru.

¹⁴ Ve aduragenine gu Asos, dumubonge mu bwatu gu gwende gu Mitilen.

¹⁵ Vane, dwende duvuduge mbogwali gu time ningi yi Kyo. Wisi wu duke, duvuduge gu ningi yi Samos, sige wune mosi gu gisyeni gi yadi Mile.

¹⁶ Pol, vane, abonge dibagi di guvyogile gu time Efese asesikeme, mbare gutsyemune gigumbi gu musyengi Asi. Alenzange mwendu gu guvuduge gu Serisalem, wisi Pantekote.

Pol gagwambili ne bivunde bi Efese

¹⁷ Pol rume gilumbi ve Mile gu Efese gu gurugise bivunde bi dibundu.

¹⁸ Ve bevudugile ve yandi, abambile re «Nwayabi mutsageninu ami nenu, bandile wisi rege wunirugile gu musyengi Asi.

¹⁹ Nzidyanzile Fumu ne ndembu, mu metsange ne meguge me nzelabe gukyelu megwegu me Sif.

²⁰ Nwayabi re nzaswege motsu me nenu ne keri, nzenwanzile ne gunenze motsu, ve piti ne mu mendagu menu.

²¹ Nzenenge Sif ne be sandi Sif gu gugeluge gu Nyambi ne guvagile Fumu Sesu gitu.

²² Sige vave, nikagwendi gu Serisalem, nevu Dinyuni Diboti garondi, nzayabi digutugile.

²³ Nyayabi re, Dinyuni Diboti dyambigisi mu yadi tsyotsu re nzugu ne meguge mapingili.

²⁴ Tumbe monyu ami wusa nemusumbu ve misu mami, adinami ne keri, gusukise mwendu ne gumane gidyanzu gi Fumu Sesu tsepege, gwanze musamu boti wu gyesi gi Nyambi.

²⁵ Nzevyose vegari enu negwanze bulongu bu Nyambi, vave nyayabi re gu sandi kunde gube mutu wugukunde nyene.

²⁶ Re dibandu, nemuni nyanubongili gere mbeyi, pasi re wumosi ve yenu setsyemuge, disakengili.

²⁷ Mbare nzenwanzile motsu me Nyambi vange, nzanuswege nesi dimosi.

²⁸ Kwebandekenyanu sige raranu gigondu gi tsenuvege Dinyuni Diboti ne muraritsi tabe. Banganu beraritsi be boti gukyelu dibundu di Nyambi denge mu dufu du mwane andi.

²⁹ Nyayabi re pasi nyagwende batu be gere mekoyu begwingene vegari enu gu gupanze dibundu.

³⁰ Nesi vegari enu, batu begufure mambu gu gudute bebingitsi gu nzime awu.

³¹ Kabe tsibulanu misu, rangeminanu re, mu mipume mireru, ne nyangu ne dibeti, nzakole nubigise ne metsange.

³² Sige vave, nyanusambuli Nyambi mu gyesi gi musamu andi. Wune dinyange digu nugwarise mu gitu neguvege disale di aswegile botsu bamuvagili gitu.

³³ Nzabe ne keri ne doli ne menive ne bidwaru bi pagere mutu.

³⁴ Nwayabi yenu beni re nzedyanze ne mekake mami gu gudenge byotsu bibe netu ne keri gu batu begilonge gi ami ne menu beni.

³⁵ Nzenurigitse neve negudyanzilange nonge nukwamusange bigayi ne mebebeli negu rangemine dyambile Fumu Sesu re “Gu mbili meboti pasi re wavegi vyagunu ne guvegu!”»

³⁶ Vane negumane gwambile, Pol kuteme nawu alembe.

³⁷ Botsu belile, bemusambegene.

³⁸ Babe ne busane mbare Pol bambile re besa kunde mwene. Vane bemuvegitse kwange gu watange.