Actes 19 - Gisir

Pol ganenzi gu Efese

¹ Gigumbi gi Apolose abile gu Korinte, Pol dale ginange gi mikongu gi Asi, avuduge gu Efese. Vane aragunu be bebingitsi

² ne gubivule, «Nusedile Dinyuni Diboti ve nusevagile gitu?» Bagule re «Dusamegulu re gu Dinyuni Diboti.»

³ Pol bivule re «Bateme yi nye nutsedile?» Yawu re «Yi Sambatisete.»

⁴ Pol bambile re «Sambatisete batise batu besinge kalule mutsageninu, sige ayambile bumongu bu Iserayel gu vagile gitu gu mutu warugi ve nzime andi, kabe Sesu.»

⁵ Negulu mambu mane, bebatisu mu dine di Sesu.

⁶ Pol betsabige mekake bedile Dinyuni Diboti bambile melongu me nzusu ne gubigise mu dine di Nyambi.

⁷ Babe digumi ne bebeye.

⁸ Pol yendange gigumbi gyotsu gu ndagu ndembu sige, mu migweli mireru ayambilange ne gitu. Ayanzange bulongu bu Nyambi, agwarisange guvote batu bamulilu.

⁹ Tumbe bemosi badyotsi mirime, babusi vege gitu, badoki botsu babingi nzile Fumu ve wusu bumongu. Vane Pol besile, abege bebingitsi negubenenzange wisi wotsu gu ndagu ginenge yi Tiranos.

¹⁰ Ditsinge gotsu mipume mibeye, nonge batu botsu batsageni musyengi Asi, Sif ne be sandi Sif, bulu musamu Fumu.

Bane be Seva

¹¹ Nyambi vagange bimage bineni mu ginzime gi Pol.

¹² Re ve benesunzilange mu bibedu tsande ne mibunzi mi Pol bembange. Bebelugange, ne menyuni mabi gwandi mevudugange mu yawu.

¹³ Sif tsimosi tsyenegwendange ke pagere mbure gu gwene sanze menyuni mabi mu dine di Fumu Sesu re «Mu dine di Sesu yi Pol gagwanzi, nyakuvegi dinyange, vuduge!»

¹⁴ Re nane bane bane gubereru be givunde gi muvegitsi pagu Sif, Seva, bevagilange.

¹⁵ Tumbe wune wusi dinyuni dibi negubagule re «Nyayabi Sesu, nyayabi Pol, tumbe yenu nu nye?»

¹⁶ Sige awube ne dinyuni dibi akwekubume ve yawu, abekibe ngudu, aberyabe kube yi berinine ndagu andi peni ne bivure mu nyuru.

¹⁷ Dyambu diyabegenu ne bisi Efese botsu, Sif ne be sandi Sif babe ne wome Nyambi ne guyabe buvunde bu dine di Fumu Sesu.

¹⁸ Mbili bekaluge bane be Nyambi, berugange gutse save mabi mawu ve piti.

¹⁹ Mune durangu du batu bevagange ngalu ngalu bebege bisangumu bi awu bi ngalu ngalu binyenzu ve wusu bumongu. Berange doli tsisumbilu bisangumu bine, gube bi digumi di toseni tsi fure.

²⁰ Re nane, ne ndure Fumu, musamu andi wu panzegene ne ngudu.

Kumvu yi Efese

²¹ Mambu mane neguvyoge, Pol vange mwendu wu Serisalem, tumbe avyogile gu Masedwan ne gu Akayi. Akunde gwambile re «Pasi re nike gune nonge nivyogi gwandi gu Rom.»

²² Arume gu Masedwan Timote ne Erasete bedyanzange nandi, tumbe yandi kunde sale mwe gigumbi gu musyengi Asi.

²³ Gigumbi gine kumvu yibe yineni gu Efese, gukyelu batu babingi nzile Fumu.

²⁴ Sige mutulitsi myoru, wanengu re Dimetirus atulange be ndagu tsi myange tsi nyambi mugetu Aretimise, tsivegange betulitsi bane mbili menive.

²⁵ Dimetiruse gukige betulitsi, ne botsu bevagange gidyanzu gimosi, negu bambile re «Bembatsi namyanu, nwayabi re bukiti bu etu bwarugili gu gidwanzu gigi.

²⁶ La nwalabi, ne gulu mavyogi, Pol yiyi gavagi re, nyambi tsi bikokosi byapaku ne mekake me batu, tsi sandi nyambi! Atsedenge gitu gi mbili batu sake gugu gu Efese, tumbe gotsu musyengi wotsu wu Asi.

²⁷ Mbere dugubunu gidyanzu gi etu. Vyagunu ne vane, ndagu nyambi etu Aretemise mbere yi gutsyemuse didume di andi. Besakunde yabe re Aretemise nyambi yi neni, lavane batu botsu bamugitsi gu musyengi Asi ne mu mutambe wotsu.»

²⁸ Negulu nane, batu bebase ne kabu bamuge: «Aretemise, nyambi yineni yi bisi Efese!»

²⁹ Kumvu yi lalegene mu yadi yotsu. Batu bebege nawu Gayus ne Risetareke, bisi Masedwan babange gilonge gi mwendu gi Pol, bende diguki gu tsapele.

³⁰ Pol ronde kwekurigitse ve wusu bumongu, tumbe bebingitsi bemukale.

³¹ Be mindumbe mi musyengi Asi, mbatsi tsi andi, bemuvegitsile gilumbi re ayagwende gu tsapele.

³² Gigumbi gine, dibundu dibe gutsye kumvu. Babe negwambile didi, bane nane, bemosi beseyabange nesi dibandu dibegukemine.

³³ Batu bemosi ve dibundu bambilange Lekesandere, wu Sif besunze ve wusu dibandu di dyambu. Lekesandere besovise ne dikake, mbere ronde gwambile ve wusu bumongu.

³⁴ Tumbe ve batu beyabe re Sif avu, bamuge yawu botsu kwange gotsu megwere mebeye: «Aretemise, nyambi ineni yi bisi Efese!»

³⁵ Vane, gidyeti gi yadi arungule votse bumongu: «Bisi Efese, batu botsu bayabi re yadi yi Efese re yarari ndagu nyambi neni Aretemise ne gikokosi gi andi gisunde gu nzambi.

³⁶ Gu sandi mutu wugudigale. Kabe, nukisigeme negupikile nesi nugunanguge.

³⁷ Nwabege batu babe gugu, lavane besadage gu ndagu Aretemise, nesi gumusyenge.

³⁸ Pasi re Dimetirus ne mbatsi tsi andi tsi gidyanzu, bene dyambu ne mutu, gu ndagu tsi migage ne nzonzi, re gune begwefundile.

³⁹ Sige gere nukine dinzusu digwambile, digutsonzigilu gu dibundu di migage.

⁴⁰ Mbere dugufuregilu re dusekokise bumongu gu dyambu dirange ditsevyoge nemuni. Dusabenze vege dibandu digulunu gukyelu gibengunu gigi.»

⁴¹ Vane, apanze bumongu.